ମୁମ୍ବାଇ,୧୭।୭(ପି.ଟି.)- ଗୁରୁପୂର୍ଣ୍ଣିମାର ଶୁଭ ତଥା ପବିତ୍ର ଦିବସ ଅବସରରେ ପୂର୍ବତନ କ୍ରିକେଟର ସଚିନ ତେନ୍ଦୁଲକର ଓ ବିନୋଦ କାମ୍ବଲି ପିଲା ଦିନର କୋଚ୍ ରମାକାନ୍ତ ଆଚରେକରଙ୍କୁ ମନେପକାଇ ଶ୍ରଦ୍ଧାଞ୍ଜଳି ଜଣାଇଛନ୍ତି। ବିଶ୍ୱର ଅନ୍ୟତମ ଶ୍ରେଷ୍ଠ କ୍ରିକେଟର ବିବେଚିତ ହେଉଥିବା ସଚିନ ଟୁଇଟ କରି ଆଚରେକରଙ୍କୁ କୃତଜ୍ଞତା ଜଣାଇଛନ୍ତି। ଜଣେ ଶିଷ୍ୟକୁ ଅନ୍ଧକାରରୁ ଉଦ୍ଧାର କରି ଗୁରୁ ଅବହେଳାରୁ ରକ୍ଷା କରିଥାନ୍ତି। ଗୁରୁ ହିସାବରେ ଆଚରେକର ସାର୍ଙ୍କ ପାଇଁ ଜଣେ ସଫଳ କ୍ରିକେଟର ହୋଇପାରିଛି। ଏଥିପାଇଁ ତାଙ୍କ ନିକଟରେ କୃତଜ୍ଞ ବୋଲି ସଚିନ ଟୁଇଟ କରି ଉଲ୍ଲେଖ କରିଛନ୍ତି। ଆଚରେକର ଗତ ଜାନୁୟାରୀ ୨ ତାରିଖରେ ସେଣ୍ଟ୍ରାଲ ମୁମ୍ବାଇର ଶିବାଜୀ ପାର୍କସ୍ଥିତ ତାଙ୍କ ବାସଭବନରେ ଦେହତ୍ୟାଗ କରିଥିଲେ।
ସେହିପରି ୧୭ଟି ଟେଷ୍ଟ ଓ ୧୦୪ଟି ଦିନିକିଆ ମ୍ୟାଚ୍ ଖେଳିଥିବା କାମ୍ବଲି ମଧ୍ୟ ତାଙ୍କୁ କୃତଜ୍ଞତା ଜଣାଇଛନ୍ତି। ଜଣେ ଭଲ କ୍ରିକେଟର ଓ ଭଲ ମଣିଷ ଭଳି ମୋତେ ଗଢିତୋଳିବାରେ ଆଚରେକର ସାର୍ଙ୍କର ଉଲ୍ଲେଖନୀୟ ଭୂମିକା ରହିଥିଲା। ଆମେ ଆପଣଙ୍କୁ ସବୁଦିନ ମନେରଖିବୁ ବୋଲି କାମ୍ବଲି ଟୁଇଟ କରି ଜଣାଇଛନ୍ତି। ସଚିନ ଓ କାମ୍ବଲିଙ୍କୁ ବାଦ୍ ଦେଲେ ବଲବିନ୍ଦର ସିଂ ସାନ୍ଧୁ, ଚନ୍ଦ୍ରକାନ୍ତ ପଣ୍ଡିତ, ପ୍ରବୀନ ଆମ୍ରେ, ଅଜିତ୍ ଅଗରକର ଓ ରମେଶ ପାଓ୍ବାରଙ୍କ ଭଳି କ୍ରିକେଟର ମଧ୍ୟ ଆଚରେକରଙ୍କ ଶିଷ୍ୟ ଥିଲେ। ହିନ୍ଦୁଧର୍ମ ଅନୁଯାୟୀ ଗୁରୁପୂର୍ଣ୍ଣିମାରେ ଶିଷ୍ୟାମନେ ସେମାନଙ୍କ ଗୁରୁଙ୍କର ବନ୍ଦାପନା କରିଥାନ୍ତି।