ନୂଆଦିଲ୍ଲୀ,୨୨।୪ (ପି.ଟି.): ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍) କ୍ଲବ କେରଳ ବ୍ଲାଷ୍ଟର୍ସ ହେଡ୍ କୋଚ୍ ଏଲ୍କୋ ସ୍କାଟୋରୀଙ୍କଠାରୁ ଅଲଗା ହୋଇଛି। ଏ ସଂକ୍ରାନ୍ତରେ କେରଳ ବୁଧବାର ଘୋଷଣା କରିଛି। ନେଦରଲାଣ୍ଡ୍ସର ସ୍କାଟୋରୀ କେରଳର କୋଚି ସହର ପର୍ଯ୍ୟବସିତ ଆଇଏସ୍ଏଲ୍ ଦଳ କେରଳର ହେଡ୍ ଭାବେ ଗତ ସେସନରେ ଦାୟିତ୍ୱରେ ଥିଲେ। ସେ ଆଇଏସ୍ଏଲ୍ ୨୦୧୯- ୨୦ ସେସନ ପାଇଁ ତାଙ୍କୁ ନିଯୁକ୍ତ କରାଯାଇଥିଲା। ତେବେ କେରଳ ଆଶାନୁରୂପ ପ୍ରଦର୍ଶନ କରି ନ ପାରି ସପ୍ତମ ସ୍ଥାନରେ ରହି ଅଭିଯାନ ଶେଷ କରିଥିଲା। ଫଳରେ ଶେଷରେ କେରଳ ଏଲ୍କୋଙ୍କ କୋଚ୍ ପଦରୁ ହଟାଇଛି। ତେବେ ସ୍କାଟୋରୀଙ୍କୁ କେରଳ ଟିମ୍ ମ୍ୟାନେଜମେଣ୍ଟ ତାଙ୍କ କାର୍ଯ୍ୟ ପାଇଁ ପ୍ରଶଂସା କରିଛି। ମିଳିଥିବା ଦାୟିତ୍ୱକୁ ଏଲ୍କୋ ଭଲ ଭାବେ ସମ୍ପାଦନ କରିବାକୁ ପ୍ରୟାସ କରିଛନ୍ତି ଓ କେରଳ ବ୍ଲାଷ୍ଟର୍ସ ଏ ନେଇ ଟୁଇଟ୍ କରିଛି।
୨୦୧୨ରେ ଏଲ୍କୋ କୋଲକାତାର ପ୍ରୟାଗ ୟୁନାଇଟେଡର କୋଚ୍ ଦାୟିତ୍ୱ ଗ୍ରହଣ କରିଥିଲେ। ସେ ଆଇଏଫ୍ଏ ସିଲ୍ଡ ହାସଲ କରିଥିଲେ ଓ ନିଜ ଦଳକୁ ଆଇ- ଲିଗ୍ରେ ଚତୁର୍ଥ ସ୍ଥାନରେ ପହଞ୍ଚାଇଥିଲେ। ଏହାପରେ ସେ କୋଲକାତାର ଇଷ୍ଟ ବେଙ୍ଗଲ ପାଇଁ ୨୦୧୫ ସେସନ୍ରେ ହେଡ କୋଚ୍ ଦାୟିତ୍ୱ ଗ୍ରହଣ କରିଥିଲେ। ଏହାପରେ ସେ ନର୍ଥଇଷ୍ଟ ୟୁନାଇଟେଡର ଦାୟିତ୍ୱ ଗ୍ରହଣ କରିଥିଲେ। ନିଜର ପ୍ରଥମ ସେସନ୍ରେ ସେ ନର୍ଥଇଷ୍ଟ ୟୁନାଇଟେଡକୁ ସେମିଫାଇନାଲରେ ପହଞ୍ଚାଇଥିଲେ। ତେବେ ଏହି ସଫଳତାକୁ ସେ କେରଳ ସହିତ ଦୋହରାଇବାରେ ବିଫଳ ହୋଇଥିଲେ। କେରଳ ତାରକା ଖେଳାଳିମାନେ ଆହତ ହେବା ତାଙ୍କ ପାଇଁ ସମସ୍ୟା ସୃଷ୍ଟି କରିଥିଲେ। ସନ୍ଦୋଶ ଝିନ୍ଗାନଙ୍କ ଭଳି ମୁଖ୍ୟ ଖେଳାଳି ଇଞ୍ଜୁରିରେ ଶିକାର ହେବା କେରଳର ପ୍ରଦର୍ଶନ ପ୍ରଭାବିତ କରିଥିଲା। କେରଳ ୧୮ଟି ମ୍ୟାଚ୍ ଖେଳି ୧୯ ପଏଣ୍ଟ ହାସଲ କରିବା ସହ ସପ୍ତମ ସ୍ଥାନରେ ରହି ଅଭିଯାନ ଶେଷ କରିଥିଲା। କେରଳ ଶ୍ରେଷ୍ଠ ୪ରେ ସ୍ଥାନ ପାଇ ନ ଥିଲେ ମଧ୍ୟ ଆକ୍ରମଣାତ୍ମକ ଶୈଳୀ ତଥା ଯୋଜନା ଅପଣାଇବା ପାଇଁ ସ୍କାଟୋରୀଙ୍କୁ ବେଶ୍ ପ୍ରଶଂସା କରାଯାଇଥିଲା।