ସୋନପୁର,୨।୫(ନି.ପ୍ର.): ଲକ୍ଡାଉନ୍ ଯୋଗୁଁ ରାଜସ୍ଥାନର କୋଟାରେ ଫସି ରହିଥିବା ସୁବର୍ଣ୍ଣପୁର ଜିଲାର ୩୭ଜଣ ଛାତ୍ରୀଛାତ୍ର ଘରକୁ ପେରୁଛନ୍ତି। ସ୍ବାସ୍ଥ୍ୟ ପରୀକ୍ଷା ପରେ ଶନିବାର ମଧ୍ୟାହ୍ନ ୧୨ଟାରେ ୧୨ ଛାତ୍ରୀ ଓ ୨୫ ଛାତ୍ର ୨ଟି ବସ୍ ଯୋଗେ କୋଟାରୁ ବାହାରିଛନ୍ତି। ୨୫ଘଣ୍ଟାର ଯାତ୍ରା ପରେ ରବିବାର ସନ୍ଧ୍ୟା ସୁଦ୍ଧା ଛାତ୍ରୀଛାତ୍ର ସୁବର୍ଣ୍ଣପୁରରେ ପହଞ୍ଚତ୍ବେ ବୋଲି ସୂଚନା ମିଳିଛି। ଅଭିଭାବକମାନେ ନିଜ ଖର୍ଚ୍ଚରେ ସେମାନଙ୍କ ପିଲାମାନଙ୍କୁ ଆଣୁଛନ୍ତି । ପ୍ରକାଶ ଯେ, ଜିଲାର ୬ ଗୋଟି ବ୍ଲକର ୫୫ରୁ ଊର୍ଦ୍ଧ୍ୱ ଛାତ୍ରୀଛାତ୍ର ଗତ ୧ ବର୍ଷ ଧରି କୋଟାରେ ମେଡିକାଲ କୋଚିଂ ନେଉଥିଲେ। କରୋନା ଭୂତାଣୁ ସଂକ୍ରମଣକୁ ରୋକିବା ପାଇଁ ସାରା ଦେଶରେ ଲକ୍ଡାଉନ୍ ଘୋଷଣା ହେବା ପରେ ସରକାରଙ୍କ କଟକଣା ଯୋଗୁଁ ମେଡିକାଲ କୋଚିଂ ବନ୍ଦ ହୋଇଥିଲା। ଛାତ୍ରାବାସରେ ଅନ୍ତେବାସୀଙ୍କୁ ଠିକ୍ ଭାବେ ଖାଇବାକୁ ମିଳି ନଥିଲା। ଏଥିପାଇଁ ଉତ୍ତରପ୍ରଦେଶ, ବିହାର, ଗୁଜୁରାଟ, ଛତିଶଗଡ, ପଶ୍ଚିମବଙ୍ଗ ଓ ଝାଡଖଣ୍ଡ ଭଳି ରାଜ୍ୟର ଛାତ୍ରୀଛାତ୍ରଙ୍କୁ ସେଠାକାର ସରକାର ନିଜ ରାଜ୍ୟକୁ ବସ୍ ଯୋଗେ ନେଇ ଯାଇଥିଲେ। ଓଡିଶାର ଛାତ୍ରୀଛାତ୍ରମାନେ ମାନସିକ ଚାପରେ ଥିଲେ। ଅଭିଭାବକମାନେ ଯେତେ କହିଲେ ହେଲେ ମଧ୍ୟ ସେମାନଙ୍କ କଥା କେହି ଶୁଣି ନଥିଲେ। ତେବେ ସୁବର୍ଣ୍ଣପୁର ଜିଲାର ପ୍ରାୟ ୧୮ ଛାତ୍ରୀଛାତ୍ର ପରିଚିତ ଲୋକଙ୍କ ଜରିଆରେ ଅନ୍ୟ ରାଜ୍ୟ ସରକାରଙ୍କ ମାଧ୍ୟମରେ ସେମାନଙ୍କ ପିଲାଙ୍କୁ ନେଇ ଆସିଥିଲେ। କେନ୍ଦ୍ର ଗୃହ ମନ୍ତ୍ରଣାଳୟର ନୂତନ ବିଜ୍ଞପ୍ତି ପ୍ରକାଶ ପରେ ସୁବର୍ଣ୍ଣପୁର ଜିଲାପାଳ ମୋନିଷା ବାନାର୍ଜୀ କୋଟା ଜିଲାପାଳ ଏବଂ ଏଲେନ ମେଡିକାଲ କୋଚିଙ୍ଗ ପରିଚାଳକ ନବୀନ ମାହେଶ୍ୱରୀଙ୍କ ସହ ଯୋଗାଯୋଗ କରି ଛାତ୍ରୀଛାତ୍ର କିଭଳି ଘରକୁ ଫେରିବେ ଉଦ୍ୟମ କରିଥିଲେ।
