ଲକ୍ଷ୍ନୌ,୧୭।୪: କରୋନା ସହ ମୁକାବିଲା ପାଇଁ କେନ୍ଦ୍ର ସରକାର ସାରା ଦେଶରେ ଲକ୍ଡାଉନ୍ ଘୋଷଣା କରିଥିଲେ। ଲକ୍ଡାଉନ୍ ଯୋଗୁ ବିଭିନ୍ନ ରାଜ୍ୟର ଲୋକ ଓ ଛାତ୍ରୀଛାତ୍ର ବିଭିନ୍ନ ସ୍ଥାନରେ ଫସିରହିଛନ୍ତି। ଇତିମଧ୍ୟରେ ରାଜସ୍ଥାନର କୋଟାରେ ଫସି ରହିଥିବା ଛାତ୍ରୀଛାତ୍ରଙ୍କୁ ଉଦ୍ଧାର କରିବା ପାଇଁ ଯୋଗୀ ସରକାର ପ୍ରକ୍ରିୟା ଆରମ୍ଭ କରିଛନ୍ତି। କୋଟାରୁ ଉତ୍ତରପ୍ରଦେଶର ପିଲାଙ୍କୁ ଫେରାଇ ଆଣିବା ପାଇଁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବସ୍ ପଠାଇଛନ୍ତି। ଶୁକ୍ରବାର କୋଟା ଅଭମୁଖେ ୩୦୦ଟି ବସ୍ ବାହାରିଥିବା ଜଣାପଡ଼ିଛି। କରୋନା ଭାରରସ୍କୁ ରୋକିବା ପାଇଁ ଦେଶରେ ମାର୍ଚ୍ଚ ୨୫ରୁ ଆରମ୍ଭ ହୋଇଥିବା ଲକ୍ଡାଉନ୍ ଯୋଗୁ କୋଟା, ଉତ୍ତରପ୍ରଦେଶ, ବିହାରର ସମେତ ବିଭିନ୍ନ ରାଜ୍ୟରେ ହଜାର ହଜାର ଛାତ୍ରୀଛାତ୍ର ଫସିରହିଛନ୍ତି। ସେଠାରୁ ବାହାରିବା ପାଇଁ ଗତ କିଛି ଦିନ ତଳେ ପିଲାମାନେ ଟୁଇଟରରେ #SendUsBackHome ଅଭିଯାନ ଆରମ୍ଭ କରିଥିଲେ। ତେବେ ଛାତ୍ରୀଛାତ୍ରଙ୍କ ସମସ୍ୟାକୁ ଦୃଷ୍ଟିରେ ରଖି ଲୋକସଭା ବାଚସ୍ପତି ଓମ ବିର୍ଲା ଗତ ୨ଦିନ ଧରି କେନ୍ଦ୍ରର ଏଜେନ୍ସିଙ୍କ ଆଲୋଚନା କରିଥିଲେ। ଏହି ଆଲୋଚନାର କୌଣସି ନିଷ୍କର୍ସ ବାହାରି ପାରି ନ ଥିବା ବେଳେ ଏବେ କେନ୍ଦ୍ରୀୟ ଏଜେନ୍ସିଙ୍କ ନିର୍ଦ୍ଦେଶରେ କୋଟାରୁ ପିଲାଙ୍କୁ ଆଣିବା ପାଇଁ ପ୍ରକ୍ରିୟା ଆରମ୍ଭ ହୋଇଛି। ଏହାପୂର୍ବରୁ ଜମ୍ମୁ-କଶ୍ମୀର ପ୍ରଶାସନ କୋଟାରେ ଫସିରହିଥିବା ନିଜ ରାଜ୍ୟର ପିଲାଙ୍କୁ ଫେରାଇ ଆଣିବାକୁ ଚାହୁଁଥିଲେ। ହେଲେ ସେମାନଙ୍କୁ ଅନୁମତି ପ୍ରଦାନ କରାଯାଇ ନଥିଲା। ତେବେ ଉତ୍ତରପ୍ରଦେଶ ସରକାରଙ୍କ ପଦକ୍ଷେପ ପରେ ଜମ୍ମୁ-କଶ୍ମୀର ପ୍ରଶାସନ ପିଲାଙ୍କୁ ଆଣିବାର ପ୍ରକ୍ରିୟା ଆରମ୍ଭ କରିପାରନ୍ତି ବୋଲି କୁହାଯାଉଛି।