ନୟାଗଡ଼ ଅଫିସ/ରଣପୁର,୬ା୫(ସ୍ବ.ପ୍ର.): ରାଜ୍ୟରେ କରୋନା ସଂକ୍ରମଣ ରୋକିବା ଲାଗି ରାଜ୍ୟ ସରକାର ବିଭିନ୍ନ ପଦକ୍ଷେପ ନେଉଛନ୍ତି। ବିଭିନ୍ନ କୋଭିଡ୍ ହସ୍ପିଟାଲ୍ ଯାଇ ସ୍ଥିତି ପରଖୁଛନ୍ତି। ଏହି କ୍ରମରେ ବୁଧବାର ୫-ଟି ସଚିବ ଭି.କେ. ପାଣ୍ଡିଆନ ଓ ଉନ୍ନୟନ କମିଶନର ସୁରେଶ ମହାପାତ୍ର ନୟାଗଡ଼ ଜିଲା ରଣପୁର ବ୍ଲକ ଚାନ୍ଦପୁରସ୍ଥିତ କୋଭିଡ୍ ହେଲଥ୍ ସେଣ୍ଟର ପରିଦର୍ଶନ କରି ଫେରିଛନ୍ତି। ପୂର୍ବାହ୍ନ ସାଢ଼େ ୯ଟାରେ ପହଞ୍ଚିବା ପରେ ଉଭୟଙ୍କୁ ସୁରକ୍ଷା ବଳୟ ଭିତରେ ଡାକ୍ତରଖାନା ଭିତରକୁ ନିଆଯାଇଥିଲା। ଉଭୟେ ହସ୍ପିଟାଲର ବିଭିନ୍ନ ୱାର୍ଡ ବୁଲି ଦେଖିବା ସହ ନିୟୋଜିତ କର୍ମଚାରୀଙ୍କୁ ସ୍ବାସ୍ଥ୍ୟସେବା ସମ୍ପର୍କରେ ପଚାରି ବୁଝିଥିଲେ। କରୋନା ମୁକାବିଲା ପ୍ରସ୍ତୁତି ସମ୍ପର୍କରେ ସମୀକ୍ଷା କରିଥିଲେ। ରାଜ୍ୟ ସରକାରଙ୍କ ୧୦ଟି ଆଇସିୟୁ ଶଯ୍ୟା ଓ ୫ଟି ଭେଣ୍ଟିଲେଟରକୁ ଶୀଘ୍ର କାର୍ଯ୍ୟକ୍ଷମ କରିବାକୁ ଜିଲାପାଳ ଓ ସିଡିଏମଓଙ୍କୁ ପରାମର୍ଶ ଦେଇଥିଲେ। କରୋନା ମୁକାବିଲା କ୍ଷେତ୍ରରେ ଜିଲା ପ୍ରଶାସନର ପଦକ୍ଷେପ ସମ୍ପର୍କରେ ଜିଲାପାଳଙ୍କୁ ପଚାରି ବୁଝିଥିଲେ। ଚାନ୍ଦପୁର କୋଭିଡ୍ ହେଲଥ୍ ସେଣ୍ଟରରେ ୧୩ଜଣ ଡାକ୍ତରଙ୍କ ସମେତ ୧୦୦ଜଣ ବୈଷୟିକ ଜ୍ଞାନକୌଶଳଧାରୀଙ୍କୁ ନିୟୋଜିତ କରାଯାଇଥିବା ଜିଲାପାଳ ଦର୍ଶାଇଥିଲେ। ସେହିଭଳି ଦୁଇଟି କୋଭିଡ୍ ୧୯ କେୟାର ହସ୍ପିଟାଲ ଚାଲୁଥିବା କହିଥିଲେ। ଗ୍ରୀନ ଜୋନରେ ଥିବା ନୟାଗଡ ଜିଲାରେ ସାମାଜିକ ଦୂରତା ରକ୍ଷାକୁ ଅଣଦେଖା କରା ନ ଯାଉ ବୋଲି ୫-ଟି ସଚିବ ପରାମର୍ଶ ଦେଇଥିଲେ। ଜିଲାପାଳ ପୋମା ଟୁଡୁ, ଏସ୍ପି ପ୍ରତ୍ୟୁଷ ଦିବାକର, ସିଡିଏମ୍ଓ ଶ୍ୱେତ ମହାପାତ୍ର, ଚାନ୍ଦପୁର କୋଭିଡ୍ ହେଲ୍ଥ ସେଣ୍ଟରର ଡାକ୍ତର ବି. ସୁର଼୍ୟା ରାଓ ଉପସ୍ଥିତ ଥିଲେ।