ନୂଆଦିଲ୍ଲୀ,୧୪। ୪ (ପି.ଟି.)- ଏସିଆନ ଫୁଟବଲ ଫେଡେରେଶନ (ଏଏଫ୍ସି) ଅଲଇଣ୍ଡିଆ ଫୁଟବଲ ଫେଡେରେଶନ (ଏଆଇଏଫ୍ଏଫ୍)କୁ ଭୂୟସୀ ପ୍ରଶଂସା କରିଛି। କୋଭିଡ୍-୧୯ ମୁକାବିଲାରେ ଏଆଇଏଫ୍ଏଫ୍ ସମେତ ଭାରତୀୟ ଫୁଟବଲରମାନେ ଉଲ୍ଲେଖନୀୟ ଭୂମିକା ଗ୍ରହଣ କରି ଉଦାହରଣ ସୃଷ୍ଟ କରିଛନ୍ତି ବୋଲି ଏଏଫ୍ସି କହିଛି। ଆର୍ଥିକ ଭାବେ ସହାୟତା କରିବା ସହ ଭାରତୀୟ ଫେଡେରେଶନ ଓ ଖେଳାଳିମାନେ ବିଭିନ୍ନ ସମାଜ ମଙ୍ଗଳ କାର୍ଯ୍ୟକ୍ରମ କରି ଏହି ଲଢେଇକୁ ଆଗକୁ ନେବାରେ ସଫଳ ହୋଇଛନ୍ତି ଓ ଏଥିପାଇଁ ଏମାନେ ପ୍ରଶଂସାର ପାତ୍ର ବୋଲି ଏଏଫ୍ସି କହିଛି।
ଏଆଇଏଫ୍ଏଫ୍ ସମେତ ଗୁଆମ ଫୁଟବଲ ଆସୋସିଏଶନ (ଜିଏଫ୍ଏ), ଦି ଜେ. ଲିଗ ଓ ଉହାନ ଫୁଟବଲ ଆସୋସିଏଶନ ମଧ୍ୟ ଅର୍ଥ ଦାନ ଦେବା ସହ କୋଭିଡ୍-୧୯ ନେଇ ଜନସଚେତନତା ସୃଷ୍ଟି କରିଛନ୍ତି ଏଏଫ୍ସି ତରଫରୁ କୁହାଯାଇଛି। ଉଲ୍ଲେଖଥାଉ କି, ଏଆଇଏଫ୍ଏଫ୍ ପ୍ରଧାନମନ୍ତ୍ରୀ କେୟାର୍ସ ଫଣ୍ଡକୁ ୨୫ ଲକ୍ଷ ଟଙ୍କା ପ୍ରଦାନ କରିଥିଲା। ସେହିପରି ଭାରତର ପ୍ରୀତମ କୋଟାଲ, ପ୍ରଣୟ ହାଲଦାର, ପ୍ରବୀର ଦାସ ଓ ଅରିନ୍ଦମ ଭଟ୍ଟାଚାର୍ଜୀଙ୍କ ଭଳି ଫୁଟବଲର ବିଭିନ୍ନ ଚ୍ୟାରିଟି ଓ ଗରିବ ଲୋକଙ୍କୁ ଖାଦ୍ୟ ପ୍ରଦାନ ମାଧ୍ୟମରେ ମିଳିତ ଭାବେ ୧୪୫,୦୦୦ ଟଙ୍କା ପ୍ରଦାନ କରିଛନ୍ତି ବୋଲି ଏଏଫ୍ସି ତରଫରୁ କୁହାଯାଇଛି।
ଫରଓ୍ବାର୍ଡ ଜେଜେ ଲାଲପେଖଲୁଆ ମିଜୋରାମ୍ର ଦର୍ତ୍ତଲାଙ୍କସ୍ଥିତ ସିନୋଡ ହସ୍ପିଟାଲରେ ରକ୍ତାଦାନ କାର୍ଯ୍ୟକ୍ରମ ହାତକୁ ନେଇଛନ୍ତି। ସେହିପରି ସି.କେ. ବିନିତ୍ କେରଳସ୍ଥିତ ନିଜ ଘରୋଇ ସହରରେ ସରକାରଙ୍କ ହେଲ୍ପ ଲାଇନ୍ ସେଣ୍ଟରରେ ନିଜ ଆଡୁ ଯୋଗ ଦେଇଛନ୍ତି। ଯେତେ ସମ୍ଭବ ଏହି ମହାମାରୀ ମୁକାବିଲାରେ ଆମେ ସାହାଯ୍ୟ ସହଯୋଗ କରିବାକୁ ପ୍ରସ୍ତୁତ ବୋଲି ଏଆଇଏଫ୍ଏଫ୍ ଅଧ୍ୟକ୍ଷ ତଥା ଫିଫା କାଉନ୍ସିଲ ଓ ଏଏଫ୍ସି କାର୍ଯ୍ୟକାରୀ କମିଟି ସଦସ୍ୟ ପ୍ରଫୁଲ୍ଲ ପଟେଲ କହିଛନ୍ତି। ଏହି ବିପତ୍ତିରୁ ଉଦ୍ଧାର ପାଇବାକୁ ହେଲେ ଆମେ ସମସ୍ତେ ଏକାଠି ହୋଇ ପ୍ରୟାସ କରିବା ଉଚିତ ବୋଲି ସେ କହିଛନ୍ତି।
