ନୂଆଦିଲ୍ଲୀ,୧୫।୫(ପି.ଟି.): କୋଭିଡ-୧୯ ସଂକ୍ରମଣ କାରଣରୁ ଆମେରିକାରେ ଫସି ରହିଥିବା ପୂର୍ବତନ ହକି ଖେଳାଳି ତଥା ବିଶ୍ୱକପ୍ ବିଜେତା ଅଶୋକ ଦିଓ୍ବାନ ଶେଷରେ ଘରକୁ ଫେରିଛନ୍ତି। ଲକ୍ଡାଉନ୍ ଜାରି ରହିଥିବା କାରଣରୁ ଆମେରିକାର ଯାତ୍ରା କଟକଣା ଜାରି କରାଯାଇଥିଲା। ଫଳରେ ସେ ଭାରତ ଆସିପାରି ନ ଥିଲେ। ତେବେ ଶୁକ୍ରବାର ସେ ପ୍ରତ୍ୟାବର୍ତ୍ତନ କରିଛନ୍ତି।
ଆମେରିକାରେ ସେ ଭୟଙ୍କର ଭାବେ ଅସୁସ୍ଥ ହେବା ସହ ଫସି ରହିଥିଲେ। ଫଳରେ ସେ ସାହାଯ୍ୟ ପାଇଁ ଭାରତୀୟ ଅଲିମ୍ପିକ୍ସ ଆସୋସିଏଶନ (ଆଇଓଏ) ନରିନ୍ଦର ବାତ୍ରାଙ୍କୁ ଅନୁରୋଧ କରିଥିଲେ ଓ ତାଙ୍କ ସମସ୍ୟା ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇବା ପାଇଁ ନିବେଦନ କରିଥିଲେ। କ୍ରୀଡ଼ା ମନ୍ତ୍ରଣାଳୟ ମଧ୍ୟ ତାଙ୍କ ଅନୁରୋଧକୁ ବୈଦେଶିକ ମନ୍ତ୍ରଣାଳକୁ ଅବଗତ କରାଇଥିଲା।
ଏବେ ଦିଲ୍ଲୀକୁ ଫେରିଛି ଓ ଦ୍ୱାରକା ହୋଟେଲ ୧୪ ଦିନିଆ ବାଧ୍ୟତାମୂଳକ କ୍ୱାରେଣ୍ଟାଇନ୍ରେ ରହୁଛି ବୋଲି ଦିଓ୍ବାନ କହିଛନ୍ତି। ଆମେରିକାରେ ମୋର ସ୍ବାସ୍ଥ୍ୟରେ ଅବନତୀ ହୋଇଥିଲା। ତେବେ ନିଜ ଦେଶକୁ ଫେରିବା ପରେ ବହୁତ ଖୁସି ଅଛି। ସଙ୍କଟ ସମୟରେ ବରିଷ୍ଠ ଖେଳାଳି, ସହଯୋଗୀ, ହକି ପ୍ରଶଂସକ ଓ ବନ୍ଧୁ ମୋତେ ସାହାସ ଦେଇଥିଲେ। ଏବେ ମୋ ସ୍ବାସ୍ଥ୍ୟରେ ଉନ୍ନତି ହୋଇଛି ବୋଲି ବୋଲି ସେ କହିଛନ୍ତି।
୧୯୭୫ ହକି ବିଶ୍ୱକପ୍ ବିଜୟୀ ଦିଓ୍ବାନ କଷ୍ଟକର ସମୟରେ ସହାଯ୍ୟ ତଥା ସହାୟତା ପାଇଁ ବାତ୍ରା, କ୍ରୀଡ଼ା ମନ୍ତ୍ରୀ କିରେନ ରିଜିଜୁ ଓ ଆମେରିକା ସ୍ଥିତ ଭାରତୀୟ ଦୂତାବାସକୁ କୃତଜ୍ଞତା ଜଣାଇଛନ୍ତି। ସମର୍ଥନ ପାଇଁ ସେ ଦେଶବାସୀଙ୍କୁ ଧନ୍ୟବାଦ ଜଣାଇଛନ୍ତି। ଦିଓ୍ବାନ ୧୯୭୬ ଅଲିମ୍ପିକ ଭାରତୀୟ ଦଳର ସଦସ୍ୟ ଥିଲେ। ପୁଅ ସହ ସମୟ ବିତାଇବା ପାଇଁ ସେ ଗତ ଡିସେମ୍ବର ୧୨ତାରିଖରେ ଆମେରିକାର ସାକ୍ରାମେଣ୍ଟା ଯାତ୍ରା କରିଥିଲେ। ତାଙ୍କୁ ପୁଅ ସେଠାରେ ଚାକିରି କରୁଛନ୍ତି। ଏପ୍ରିଲ ୨୦ରେ ସେ ଭାରତ ଫେରିବାର କାର୍ଯ୍ୟକ୍ରମ ଥିଲା।