ପ୍ୟାରିସ୍,୧୫।୪ (ଏପି): ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ଟୁର ଡି ଫ୍ରାନ୍ସ ଆୟୋଜନ ହେବ ବୋଲି ଆଶା କରାଯାଉଥିଲେ ମଧ୍ୟ ଶେଷରେ ଏହାକୁ ସ୍ଥଗିତ ରଖାଯାଇଛି। ବିଶ୍ୱର ଏହି ଶ୍ରେଷ୍ଠ ତଥା ସବୁଠାରୁ ଲୋକପ୍ରିୟ ସାଇକେଲ ରେସ୍କୁ ସ୍ଥଗିତ ରଖିବାକୁ ନିଷ୍ପତ୍ତି ନିଆଯାଇଛି। କୋଭିଡ୍-୧୯ ମହାମାରୀର ରୂପ ନେଇଥିବାରୁ ଶେଷରେ ବାଧ୍ୟ ହୋଇ ଆୟୋଜକମାନେ ଏହି ନିଷ୍ପତ୍ତି ନେଇଛନ୍ତି।
୩ ସପ୍ତାହ ଧରି ଆୟୋଜିତ ହୋଇ ଆସୁଥିବା ଏହି ମେଗା ଇଭେଣ୍ଟ ବାତିଲ ହେବ ନାହିଁ ଓ ଚଳିତବର୍ଷ ଆୟୋଜିତ ହେବ ବୋଲି ଫ୍ରେଞ୍ଚ୍ ଗଣମାଧ୍ୟମଗୁଡିକ ମଙ୍ଗଳବାର ସୂଚନା ଦେଇଛନ୍ତି। ଆସନ୍ତା ଅଗଷ୍ଟ ମାସ ଶେଷ ଆଡକୁ ନୂଆ ତାରିଖରେ ଏହା ଆୟୋଜନ ହେବ ବୋଲି ଆୟୋଜକମାନେ ସୂଚନା ଦେଇଛନ୍ତି। ଏହି ରେସ୍ ଏବେ ଅଗଷ୍ଟ ୨୯ରୁ ସେପ୍ଟେମ୍ବର ୨୦ ତାରିଖ ମଧ୍ୟରେ ଆୟୋଜନ କରିବାକୁ ଆୟୋଜକମାନେ ଆଶା ରଖିଛନ୍ତି। ପୂର୍ବରୁ ଏହି ରେସ୍ ଜୁନ୍ ୨୭ରୁ ଆରମ୍ଭ ହେବାର କାର୍ଯ୍ୟକ୍ରମ ଥିଲା। ତେବେ ଏହାର ଆୟୋଜନ ବର୍ତ୍ତମାନ ସମ୍ଭବ ନୁହଁ ବୋଲି ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନ ଘୋଷଣା କରିଥିଲେ। ରାଷ୍ଟ୍ରକୁ ସମ୍ବୋଧିତ କରୁଥିବା ବେଳେ ବହୁ ସଂଖ୍ୟାରେ ଦର୍ଶକଙ୍କ ସହ ଆୟୋଜିତ ହେଉଥିବା କୌଣସି ପବ୍ଲିକ୍ ଇଭେଣ୍ଟ ଜୁଲାଇ ମଧ୍ୟ ଭାଗ ପର୍ଯ୍ୟନ୍ତ ଆୟୋଜନ ହୋଇପାରିବ ନାହିଁ ବୋଲି ସେ ସ୍ପଷ୍ଟ କରିଥିଲେ। ଉଲ୍ଲେଖଥାଉ କି, ଏହା ପୂର୍ବରୁ ଦ୍ୱିତୀୟ ବିଶ୍ୱଯୁଦ୍ଧରୁ ଫ୍ରାନ୍ସ ମୁକୁଳିବା ପରେ ୧୯୪୬ରେ ଓ ପ୍ରଥମ ବିଶ୍ୱଯୁଦ୍ଧ କାରଣର ଟୁର ଡି ଫ୍ରାନ୍ସ ଆୟୋଜିତ ହୋଇପାରି ନ ଥିଲା। ବିନା ଦର୍ଶକ ଓ ପ୍ରଶଂସକଙ୍କ ଉପସ୍ଥିତିରେ ଏହି ସାଇକେଲ ରେସ୍ର ମାନ କିଛି ନାହିଁ ବୋଲି ଆୟୋଜକମାନେ ବିଶ୍ୱାସ କରନ୍ତି। ଏହି ସାଇକେଲ ରେସ୍କୁ ଫ୍ରାନ୍ସର ଦର୍ଶକମାନେ ଏକ ଉତ୍ସବ ହିସାବରେ ଗ୍ରହଣ କରିଥାନ୍ତି। ଚଳିତବର୍ଷ ଏହି ଇଭେଣ୍ଟ ୨୧ଟି ଷ୍ଟେଜ୍ ତଥା ପର୍ଯ୍ୟାୟରେ ଆୟୋଜନ ହୋଇଥାଏ।