ଢାକା,୨୨।୪(ପି.ଟି.): କୋଭିଡ୍-୧୯ ମହାମାରୀ ମୁକାବିଲା ପାଇଁ ବାଂଲାଦେଶ ତାରକା ଅଲରାଉଣ୍ଡର ଶକିବ୍ ଅଲ ହାସନ ଆଗକୁ ବାହାରିଛନ୍ତି। ଅର୍ଥ ସଂଗ୍ରହ ପାଇଁ ସେ ୨୦୧୯ ବିଶ୍ୱକପ୍ରେ ବ୍ୟବହାର ବ୍ୟାଟ୍ ନିଲାମ କରିବାକୁ ନିଷ୍ପତ୍ତି ନେଇଛନ୍ତି। ଏହି ନିଲାମରୁ ସଂଗ୍ରହ କରାଯାଇଥିବା ପାଣ୍ଠି ଶକିବ ଅଲ ହାସନ ଫାଉଣ୍ଡେଶନକୁ ପ୍ରଦାନ କରାଯିବ। ଉଇକେଟକିପର ବ୍ୟାଟ୍ସମ୍ୟାନ ମୁଶଫିକର ରହିମଙ୍କ ପରେ ସେ ଦ୍ୱିତୀୟ ବାଂଲାଦେଶ କ୍ରିକେଟର ଭାବେ ବ୍ୟାଟ ନିଲାମ କରିବାକୁ ନିଷ୍ପତ୍ତି ନେଇଛନ୍ତି।
ଦୁର୍ନୀତି କରିବାକୁ ପ୍ରସ୍ତାବ ଦିଆଯାଇଥିବା କଥା ସେ ବାଂଲାଦେଶ କ୍ରିକେଟ ବୋର୍ଡ (ବିସିବି) କିମ୍ବା ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି)କୁ ରିପୋର୍ଟ କରି ନ ଥିବାରୁ ତାଙ୍କୁ କ୍ରିକେଟରୁ ଦୁଇ ବର୍ଷ ବାସନ୍ଦ କରାଯାଇଛି।
ଗତ ବିଶ୍ୱକପ୍ରେ ବ୍ୟବହାର କରିଥିବା ବ୍ୟାଟ୍ ମୋର ଅତି ଫେଭରାଇଟ। ତେବେ ଏହାକୁ ପୂର୍ବରୁ ନିଲାମ କରିବାକୁ କହିଛି ବୋଲି ଶକିବ ଏକ ଫେସ୍ବୁକ୍ ଲାଇଭ୍ ସେସନ୍ରେ ଯୋଗଦେଇ କହିଛନ୍ତି। ଇଂଲଣ୍ଡରେ ଅନୁଷ୍ଠିତ ୨୦୧୯ ବିଶ୍ୱକପ୍ରେ ୩୩ ବର୍ଷୀୟ ଶକିବ ବେଶ୍ ସଫଳତା ହାସଲ କରିଥିଲେ। ୮ଟି ମ୍ୟାଚ୍ ଖେଳି ୮୬. ୫୭ ହାରରେ ସେ ୬୦୬ ରନ ସଂଗ୍ରହ କରିଥିଲେ। ଏଥିରେ ୨ଟି ଶତକ ଓ ୫ଟି ଅର୍ଦ୍ଧଶତକ ସାମିଲ ଥିଲା। ବୋଲିଂରେ ମଧ୍ୟ ୧୧ଟି ଉଇକେଟ ହାସଲ କରିଥିଲେ। ବିଶ୍ୱକପ୍ରେ ଏକମାତ୍ର କ୍ରିକେଟର ଭାବେ ସେ ୧୦ ଉଇକେଟ ନେବା ସହ ୬୦୦ ରନ ସଂଗ୍ରହ କରି ବିରଳ ସଫଳତା ହାସଲ କରିଥିଲେ। ସାରା ବିଶ୍ୱକପ୍ରେ ଗୋଟିଏ ବ୍ୟାଟ୍ ବ୍ୟବହାର କରିଥିଲି ଓ ଅଶାନୁରୂପ ସଫଳତା ପାଇଥିଲି ବୋଲି ଶକିବ କହିଛନ୍ତି। ବିଶ୍ୱକପ୍କୁ ବାଦ୍ ଦେଲେ ଏହି ବ୍ୟାଟ୍ରେ ୧୫୦୦ ରନ ସଂଗ୍ରହ କରିଥିଲି। ଏହି ବ୍ୟାଟ୍ ମୋର ଅତି ପ୍ରିୟ ହୋଇଥିଲେ ମଧ୍ୟ ଏହାକୁ ନିଲାମ କରିବାକୁ ନିଷ୍ପତ୍ତି ନେଇଛି। କାରଣ ଦେଶବାସୀ ଏହି ବ୍ୟାଟଠାରୁ ଅଧିକ ପ୍ରିୟ ବୋଲି ଶକିବ କହିଛନ୍ତି।