ଛତ୍ରପୁର, ୧୫।୫(ଡି.ଏନ.ଏ.): ଗଞ୍ଜାମ ଜିଲାରେ କରୋନା ପଜିଟିଭ ସଂଖ୍ୟା ଦିନକୁ ଦିନ ବଢ଼ିବାରେ ଲାଗିଛି। ଜିଲାରେ ଏବେ ଗୋଟିଏ କୋଭିଡ ହସ୍ପିଟାଲ ରହିଛି। ଅପରପକ୍ଷରେ ଛତ୍ରପୁରସ୍ଥିତ ସରକାରୀ ବିଜ୍ଞାନ ମହାବିଦ୍ୟାଳୟକୁ କୋଭିଡ କେୟାର ସେଣ୍ଟରରେ ପରିଣତ କରାଯାଇଛି। ଏଥିରେ ଥିବା ଆଇସୋଲଶନ ୱାଡ୍ରେ ୧୦୦ ଶଯ୍ୟା ରହିଛି। ଛତ୍ରପୁର ହସ୍ପିଟାଲର ସୁପରିଡେଣ୍ଟ ଡାକ୍ତର କାହ୍ନୁଚରଣ ପାତ୍ର ଏହି କେୟାର ସେଣ୍ଟର ନୋଡାଲ ଅଫିସର ଅଛନ୍ତି। ସେହିପରି ଶିତଳାପଲି ନିକଟ ପାରଳା ମହାରାଜା ଇଂଜିନିୟରିଂ କଲେଜକୁ ୫୦୦ ଶଯ୍ୟାର କୋଭିଡ କେୟାର ସେଣ୍ଟରରେ ପରିଣତ କରାଯାଇଛି। ଏଠାରେ ମାଇଲଡ୍ ପଜିଟିଭ ବ୍ୟକ୍ତି ଭର୍ତି ହୋଇ ଚିକିତ୍ସିତ ହେବେ। କାହାର ସ୍ବାସ୍ଥ୍ୟାବସ୍ଥା ଗୁରୁତର ହେଲେ ଉକ୍ତ ବ୍ୟକ୍ତିଙ୍କୁ କୋଭିଡ ହସ୍ପିଟାଲକୁ ପଠାଯିବ। ଡାକ୍ତର, ନର୍ସ, ଆଟେଣ୍ଡାଣ୍ଟ ଆଦି ବିଭିନ୍ନ ମେଡିକାଲରୁ ଡେପୁଟେଶନରେ ଯାଇ କୋଭିଡ କେୟାର ସେଣ୍ଟରରେ ରୋଗୀ ସେବା କରିବେ। ସେହିଭଳି ସୁଇପର, ସୁରକ୍ଷା କର୍ମୀ ମଧ୍ୟ ରହିବେ। ଫେଜ ୱାରୀ ଡାକ୍ତର, ନର୍ସ ଟିମ ଡେପୁଟେଶନରେ ଯିବେ। ଆମ୍ବୁଲାନ୍ସ ମଧ୍ୟ ସେଠାରେ ଉପସ୍ଥିତ ରହିବ। ଡାକ୍ତର, ନର୍ସ ଆଦି ଷ୍ଟାଫ ଓ ରୋଗୀ ମାନଙ୍କର ଖାଇବା ବ୍ୟବସ୍ଥା କରାଯିବ। ଛତ୍ରପୁର କୋଭିଡ କେୟାର ସେଣ୍ଟରରେ ଖାଇବା ଦାୟିତ୍ୱ ଏନ୍ଏସି ନିର୍ବାହୀ ଅଧିକାରୀଙ୍କୁ ପ୍ରଦାନ କରିଛନ୍ତି। ଡାକ୍ତର, ନର୍ସ ଆଦି ଷ୍ଟାଫ ଉକ୍ତ କୋଭିଡ କେୟାର ସେଣ୍ଟର ରେ ହିଁ ରହିବେ ବୋଲି ସୂଚନା ମିଳିଛି।