ନୂଆଦିଲ୍ଲୀ,୨୦।୩: କରେନା ଭାଇରସ ବା କୋଭିଡ-୧୯ ଏବେ ସମଗ୍ର ବିଶ୍ୱ ପାଇଁ ଚିନ୍ତାର କାରଣ ପାଲଟିଛି। ଏହି ଭୂତାଣୁର ସଠିକ୍ ଚିକିତ୍ସା ପଦ୍ଧତି ନ ଥିବାରୁ ଏବେ ଏହା ସାରା ବିଶ୍ୱକୁ ତା’ କବଳକୁ ନେଇ ସାରିଛି। ଚାଇନାରୁ ଆରମ୍ଭ ହୋଇଥିବା କରୋନା ଭାଇରସ ଏବେ ଇଟାଲି ଓ ଇରାନରେ କାୟା ବିସ୍ତାର କରିଥିବା ବେଳେ ବିଶ୍ୱବ୍ୟାପୀ ୮ ହଜାରରୁ ଊର୍ଦ୍ଧ୍ୱ ଲୋକଙ୍କ ଜୀବନ ନେଇ ସାରିଲାଣି। ଗତ ଦୁଇଦିନ ହେବ ଇଟାଲିରେ ଦିନକୁ ଶହ ଶହ ଲୋକ କରୋନା ଭାଇରସରେ ସଂକ୍ରମିତ ହେଉଥିବା ବେଳେ ଚାଇନାରେ କିନ୍ତୁ କେହି ଜଣେ ହେଲେ କରୋନାରେ ସଂକ୍ରମିତ ହୋଇ ନ ଥିବା କୁହାଯାଉଛି। ତେଣୁ ଚାଇନା କିପରି କରୋନାକୁ କାବୁ କରିପାରିଲା ତାହା ଏବେ ସମସ୍ତଙ୍କ ପ୍ରଶ୍ନ। ଭାରତରେ ଥିବା ଚାଇନାର ରାଷ୍ଟ୍ରଦୂତ ସନ୍ ଓ୍ବିଙ୍ଗଡଙ୍ଗ ଶୁକ୍ରବାର କହିଛନ୍ତି, ଚାଇନା ୟୁରେସିଆ ଓ ସାଉଥ୍ଏସିଆର ପ୍ରାୟ ୧୦ ଦେଶକୁ ନେଇ ଶୁକ୍ରବାର ଏକ ଭିଡ଼ିଓ କନ୍ଫରେନ୍ସର ଆୟୋଜନ କରିଛି। ଯେଉଁଥିରେ କରୋନାର ପ୍ରତିକାର ଓ କୋଭିଡ-୧୯କୁ କିପରି କାବୁ କରାଯିବ ତା’ଉପରେ ଆଲୋଚନା କରାଯିବ। ଏଥିରୁ ରକ୍ଷା ପାଇବାକୁ ଚାଇନା ତା’ର ପଡୋଶୀଙ୍କ ଦୁର୍ଦ୍ଦିନରେ ସାହାଯ୍ୟ କରିବ ବୋଲି ସନ୍ ଓ୍ବିଙ୍ଗଡଙ୍ଗ କହିଛନ୍ତି। ଭାରତର ସ୍ବାସ୍ଥ୍ୟ ମନ୍ତ୍ରଣାଳୟର ଅଧିକାରୀମାନେ ଏହି ଭିଡ଼ିଓ କନଫରେନ୍ସରେ ଯୋଗଦେବେ ବୋଲି ଜଣାପଡିଛି।