ଲଣ୍ଡନ,୧୦।୪ (ଏଏଫ୍ପି)- ପୂର୍ବତନ ଇଂଲଣ୍ଡ ଫୁଟବଲର ତଥା ଲିଡ୍ସ ଡିଫେଣ୍ଡର ନର୍ମାନ ହଣ୍ଟର କରୋନା ଭାଇରସ ସଂକ୍ରମଣ କାରଣରୁ ହସ୍ପିଟାଲରେ ଭର୍ତ୍ତି ହୋଇଛନ୍ତି ଓ ତାଙ୍କର ଚିକିତ୍ସା କରାଯାଉଛି। ୭୬ ବର୍ଷୀୟ ହଣ୍ଟର ୧୫ ବର୍ଷର କ୍ୟାରିୟରରେ ୭୨୬ଟି ମ୍ୟାଚ୍ ଖେଳିଥିଲେ। ସେ ଦୁଇଟି ଲିଗ୍ ଟାଇଟଲ ହାସଲ କରିଥିଲେ। ୧୯୭୫ରେ ସେ ୟୁରୋପିଆନ୍ କପ୍ ଫାଇନାଲ ଖେଳିଥିଲେ ଓ ବେୟର୍ନ ମ୍ୟୁନିକ୍ଠାରୁ ପରାସ୍ତ ହୋଇଥିଲେ। ୧୯୬୬ ବିଶ୍ୱକପ୍ରେ ଇଂଲଣ୍ଡ ବିଶ୍ୱକପ୍ ଜିତିଥିଲା ଓ ହଣ୍ଟର ଦଳରେ ସାମିଲ ହୋଇଥିଲେ ମଧ୍ୟ ଟୁର୍ନାମେଣ୍ଟ ଖେଳି ନ ଥିଲେ।
ଇଂଲଣ୍ଡ ପାଇଁ ସେ ମୋଟ ୨୮ଟି ମ୍ୟାଚ୍ ଖେଳିଥିଲେ। କେବଳ ଲିଡ୍ସ ପାଇଁ ୫୪୦ଟି ମ୍ୟାଚ୍ ଖେଳିଥିଲେ। ୧୯୭୪ରେ ତାଙ୍କୁ ପ୍ରଥମ ପିଏଫ୍ଏ ପ୍ଲେୟାର ଅଫ୍ ଦି ଇୟର ପୁରସ୍କାର ପ୍ରଦାନ କରାଯାଇଥିଲା। ସେ କରୋନା ଭାଇରସ ଦ୍ୱାର ସଂକ୍ରମିତ ହୋଇଥିବା କଥା କ୍ଲବ ଓ୍ବେବ୍ସାଇଟରେ ସୂଚନା ଦିଆଯାଇଛି। ହଣ୍ଟର ଫା କପ, ଲିଗ୍ କପ୍ ଓ ଇଣ୍ଟରୟ- ସିଟିଜ ପେୟାର୍ସ କପ୍ସରେ ମଧ୍ୟ ବିଜୟୀ ହୋଇଥିଲେ। ସେ ୧୯୭୬ରେ ଲିଡ୍ସ ଛାଡିଥିଲେ ଓ ଏହାପରେ ବ୍ରିଷ୍ଟଲ ସିଟି, ବାର୍ନସ୍ଲି, ରୋଥରହାମ ତରଫରୁ ଖେଳିଥିଲେ। ଶେଷରେ ସେ ୧୯୮୨ରେ ଅବସର ଘୋଷଣା କରିଥିଲେ।
