ଦୋହା,୧।୫(ଏଏଫ୍ପି): କାତାରରେ ଆୟୋଜନ ହେବାକୁଥିବା ୨୦୨୨ ଫିଫା ବିଶ୍ୱକପ୍ର ଜଣେ ଆମ୍ବାସାଡର କରୋନ ଭାଇରସ୍ ପଜିଟିଭ୍ ବୋଲି ଜଣାପଡିଛି। ବିଶ୍ୱକପ୍ର ଅନ୍ୟତମ ଆମ୍ବାସାଡର ତଥା ପୂର୍ବତନ କାତାର ମିଡ୍ପିଲ୍ଡର ୫୪ ବର୍ଷୀୟ ଆଡେଲ ଖାମିସ୍ ଦୁର୍ଭାଗ୍ୟବଶତଃ କୋଭିଡ-୧୯ ଟେଷ୍ଟରେ ପଜିଟିଭ ବୋଲି ଜଣାପଡିଛି। ଏ ନେଇ ଟୁର୍ନାମେଣ୍ଟ ଆୟୋଜକ ଟୁଇଟ୍ କରି ସୂଚନା ଦେଇଛନ୍ତି।
ଏଥିସହିତ ୩ଟି ଷ୍ଟାଡିୟମ ନିର୍ମାଣରେ ସାମିଲ ରହିଥିବା ମୋଟ ୮ ଜଣ ବ୍ୟକ୍ତି କୋଭିଡ-୧୯ ସଂକ୍ରମିତ ହୋଇଛନ୍ତି। ତେବେ ଏପ୍ରିଲ ୧୭ ତାରିଖ ପରଠାରୁ ଆୟୋଜନମାନେ ଏ ସଂକ୍ରାନ୍ତରେ କୌଣସି ଅପ୍ଡେଟ ଦେଇନାହାନ୍ତି। କାତାରରେ ଏପର୍ଯ୍ୟନ୍ତ ୧୩, ୪୦୯ ଜଣ ସଂକ୍ରମିତ ହୋଇଛନ୍ତି। ଏମାନଙ୍କ ମଧ୍ୟରୁ ୧,୩୭୨ଜଣ ଆରୋଗ୍ୟ ଲାଭ କରିଛନ୍ତି। ତେବେ ୧୦ଜଣ ଏଥିରେ ମୃତ୍ୟୁବରଣ କରିଛନ୍ତି।
ବିଶ୍ୱକପ୍ ଆୟୋଜନ ପାଇଁ କାତାରରେ ନିର୍ମାଣ କାର୍ଯ୍ୟ ପୂରା ଦମ୍ରେ ଆଗେଇ ଚାଲିଛି। ନିର୍ମାଣ କାର୍ଯ୍ୟରେ ନିୟୋଜିତ ହୋଇଥିବା ଶ୍ରମିକ ଓ ଅନ୍ୟ ଷ୍ଟାଫ୍ମାନଙ୍କ ସ୍ବାସ୍ଥ୍ୟ ଓ ନିରାପତ୍ତାକୁ ଗୁରୁତ୍ୱ ଦିଆଯାଉଛି ବୋଲି ଆୟୋଜକମାନେ ସୂଚନା ଦେଇଛନ୍ତି।
ଖାମିସ୍ଙ୍କ ସମେତ ଅଷ୍ଟ୍ରେଲିଆର ଟିମ୍ କାହିଲ ଓ ବାର୍ସିଲୋନା ଲିଜେଣ୍ଡ ଜାଭି ହେର୍ନାଣ୍ଡିଜ୍ ମଧ୍ୟ ବିଶ୍ୱକପ୍ ପାଇଁ ଆମ୍ବାସାଡର ନିଯୁକ୍ତ ହୋଇଛନ୍ତି। କରୋନା ଭାଇରସ୍ କାରଣରୁ ସ୍ବାସ୍ଥ୍ୟ ଜନିତ ବିପର୍ଯ୍ୟୟ ସତ୍ତ୍ୱେ ନିର୍ମାଣ କାର୍ଯ୍ୟ ଚାଲୁ ରହିବ ବୋଲି କୁହାଯାଇଛି।