ନୂଆଦିଲ୍ଲୀ,୧୦।୫(ପି.ଟି.): କୋଭିଡ- ୧୯ ମହାମାରୀ ଜନିତ ବିପଦ ସହ କ୍ରିକେଟରମାନଙ୍କୁ ଆଗାମୀ ଦିନରେ ବଞ୍ଚିବାକୁ ହେବ। କୋଭିଡ-୧୯ ମହାମାରୀ ଦୃଶ୍ୟପଟ ପରେ ଖେଳାଯିବାକୁ ଥିବା କ୍ରିକେଟରେ ସେଭଳି କୌଣସି ବଡ଼ ଧରଣର ପରିବର୍ତ୍ତନ ହେବ ନାହିଁ ବୋଲି ପୂର୍ବତନ କ୍ରିକେଟର ଗୌତମ ଗମ୍ଭୀର କହିଛନ୍ତି। କେବଳ ବଲ୍ରେ ଲାଳ ନ ଲାଗାଇବାକୁ କୁହାଯାଇପାରେ। ଲାଳ ବଦଳରେ ଅନ୍ୟ କୌଣସି କୁତ୍ରିମ ପଦାର୍ଥ ବ୍ୟବହାର କରିବାକୁ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଚିନ୍ତା କରୁଛି। କରୋନା ମହାମାରୀ ପରେ କ୍ରିକେଟରେ ନିୟମ ଓ କାନୁନ୍ରେ କୌଣସି ପରିବର୍ତ୍ତନ ଆସିବ ନାହିଁ। ତେବେ ଲାଳର ବିକଳ୍ପ ବ୍ୟବହାର କରାଯାଇ ପରେ। ଏହା ଛଡ଼ା ଅଧିକ କିଛି ହେବ ନାହିଁ ବୋଲି ଷ୍ଟାର ସ୍ପୋଟର୍ସକୁ ଗମ୍ଭୀର ସକ୍ଷାତକାର ଦେଇ କହିଛନ୍ତି।
ଖେଳାଳିଙ୍କ ସମେତ ସମସ୍ତଙ୍କୁ ଏବେ ଏହି ଭାଇରସ ସହ ବଞ୍ଚିବାକୁ ହେବ। ଶେଷରେ କୋଭିଡ-୧୯ ବିପଦ ସହ ବଞ୍ଚିବା ଅଭ୍ୟାସରେ ପରିଣତ ହେବ। ଏହି ଭାଇରସ ଜୀବନର ଏକ ଅଂଶବିଶେଷ ହୋଇଯିବ। କ୍ରିକେଟରେ ଯଦିଓ ସାମାଜିକ ଦୂରତା ରକ୍ଷା କରାଯାଇପାରିବ କିନ୍ତୁ ଅନ୍ୟ କ୍ରୀଡ଼ାରେ ଏହା ସମ୍ଭବ ହୋଇପାରିବ ନାହିଁ ବୋଲି ସେ କହିଛନ୍ତି। ଯେକୌଣସି କ୍ରୀଡ଼ାରେ ସାମାଜିକ ଦୂରତ୍ୱ ରକ୍ଷା କରିବାକୁ ଆଦୌ ସହଜ ହେବ ନାହିଁ। ତେବେ କ୍ରିକେଟତ୍ରେ ଏହା ଅବଶ୍ୟ ସମ୍ଭବ। ତେବେ ଫୁଟବଲ, ହକି ଓ ଅନ୍ୟ କ୍ରୀଡ଼ାରେ ସାମାଜିକ ଦୂରତାକୁ ବଜାୟ ରଖିବା କଷ୍ଟକର ହେବ। ତେଣୁ ଏହା ସହ ଆମକୁ ବଞ୍ଚିବାକୁ ହେବ। ଏହାକୁ ଯେତେଶୀଘ୍ର ଗ୍ରହଣ କରିବା ସେତେ ଭଲ ହେବ ବୋଲି ଗମ୍ଭୀର କହିଛନ୍ତି।