ଓ୍ବେଲିଂଟନ,୨।୫ (ପି.ଟି.): କୋଭିଡ-୧୯ ମହାମାରୀ ଦ୍ୱାରା ପ୍ରଭାବିତ ହୋଇଥିବା ପରିବାର ତଥା ଲୋକଙ୍କୁ ସାହାଯ୍ୟ କରିବା ପାଇଁ ନ୍ୟୁଜିଲାଣ୍ଡ ବ୍ୟାଟ୍ସମ୍ୟାନ ହେନେରୀ ନିକୋଲ୍ସ ଏବେ ଆଗକୁ ଆସିଛନ୍ତି। ଗତବର୍ଷ ଇଂଲଣ୍ଡରେ ଖେଳାଯାଇଥିବା ବିଶ୍ୱକପ୍ ଫାଇନାଲ ମ୍ୟାଚ୍ରେ ସେ ପିନ୍ଧିଥିବା ଶାର୍ଟ ଦାନ କରିବାକୁ ନିକୋଲ୍ସ ନିଷ୍ପତ୍ତି ନେଇଛନ୍ତି। ସେ ଏହି ଜର୍ସିକୁ ୟୁନିସେଫ୍ ନ୍ୟୁଜିଲାଣ୍ଡକୁ ଦାନ କରିବେ।
କରୋନ ଭାଇରସ ସଂକ୍ରମଣ କାରଣରୁ ନ୍ୟୁଜିଲାଣ୍ଡରେ ଲକ୍ଡାଉନ୍ ଜାରି ରହିଛି। ଲକ୍ଡାଉନ୍ ଜାରି ହେବା ପରଠାରୁ ନ୍ୟୁଜିଲାଣ୍ଡର ଖାଦ୍ୟ ବା ଫୁଡ ପାର୍ସଲର ଆବଶ୍ୟକତା ୩ ଗୁଣ ବଢିଯାଇଛି। ତେଣୁ ଖରାପ ସମୟରେ ଗତି କରୁଥିବା ଲୋକଙ୍କୁ ସହାଯ୍ୟ କରିବାକୁ ମନସ୍ଥ କରିଥିଲି ବୋଲି ନିକୋଲ୍ସ କହିଛନ୍ତି। ଏଥିପାଇଁ ବିଶ୍ୱକପ୍ ଫାଇନାଲ ଜର୍ସିକୁ ଦାନ କରିବାକୁ ନିଷ୍ପତ୍ତି ନେଇଛି ଓ ଏହା ଦ୍ୱାରା ଲୋକ ଉପକୃତ ହୋଇପାରିବେ ବୋଲି ସେ କହିଛନ୍ତି। ୟୁନିସେଫ୍ ନ୍ୟୁଜିଲାଣ୍ଡ ମଧ୍ୟ ଏ ନେଇ କାର୍ଯ୍ୟ କରିବା ଆରମ୍ଭ କରିଛି। ବିଶ୍ୱକପ୍ ଫାଇନାଲ ମ୍ୟାଚ୍ରେ ନ୍ୟୁଜିଲାଣ୍ଡ ତରଫରୁ ନିକୋଲ୍ସ ସର୍ବାଧିକ ୫୫ ରନ ସଂଗ୍ରହ କରିଥିଲେ। ଏହି ମହାମାରୀ କାରଣରୁ ପ୍ରଭାବିତ ହୋଇଥିବା ଲୋକଙ୍କୁ ସାହାଯ୍ୟ କରିବା ପାଇଁ ପୂର୍ବରୁ ଭାରତୀୟ ଅଧିନାୟକ ବିରାଟ କୋହଲି, ପୂର୍ବତନ ଦକ୍ଷିଣ ଆଫ୍ରିକା ବ୍ୟାଟ୍ସମ୍ୟାନ ଏବି ଡିଭିଲର୍ସ ସେମାନଙ୍କର ୨୦୧୬ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଖେଳିଥିବା ଗୁଜରାଟ ଲାୟନ୍ସ ବିପକ୍ଷ ମ୍ୟାଚ୍ର କିଟ୍ସକୁ ନିଲାମ କରିବାକୁ ଦାନ କରିଥିଲେ। ସେହିପରି ଇଂଲଣ୍ଡ ଉଇକେଟକିପର ଜୋସ ବଟଲର ନିଜର ବିଶ୍ୱକପ୍ ଫାଇନାଲ ନିଲାମ କରି ୬୫,୦୦୦ ପାଉଣ୍ଡ ଅର୍ଥ ସଂଗ୍ରହ କରିଥିଲେ।
