ବେଙ୍ଗାଲୁରୁ,୯।୫ (ପି.ଟି.): କରୋନା ମହାମାରୀ ବିରୋଧରେ ସାରା ବିଶ୍ୱରେ ଲଢେଇ ଚାଲୁ ରହିଛି। ଭାରତୀୟ ପୂର୍ବତନ ଅଧିନାୟକ ଅନିଲ କୁମ୍ବଲେ ଏହି ଲଡେଇ କୁ କୌଣସି ରୋମାଞ୍ଚକ ଟେଷ୍ଟ ମ୍ୟାଚ୍ର ଦ୍ୱିତୀୟ ଇନିଂସ ସହିତ ତୁଳନା କରିଛନ୍ତି। ଏହି ମହାମାରୀରେ ସାରା ବିଶ୍ୱରେ ଏପର୍ଯ୍ୟନ୍ତ ୨,୭୬,୦୦୦ ଲୋକ ମୃତ୍ୟୁବରଣ କରିଛନ୍ତି। ପୁଣି ୪୦ ଲକ୍ଷରୁ ଅଧିକ ଲୋକ ଏଥିରେ ସଂକ୍ରମିତ ହୋଇଛନ୍ତି।
କୋଭିଡ-୧୯ ସଂକ୍ରମଣରୁ ସାରା ବିଶ୍ୱରେ ଦେଖା ଦେଇଥିବା ସ୍ବାସ୍ଥ୍ୟଗତ ବିପର୍ଯ୍ୟୟ କାରଣରୁ କ୍ରୀଡ଼ା ପୂରା ଠପ୍ ହୋଇଯାଇଛି। ଏକାଧିକ ମୋଗ ଇଭେଣ୍ଟ ବାତିଲ ହୋଇଥିବା ବେଳେ ଆଉ କେତେକ ଇଭେଣ୍ଟକୁ ସ୍ଥଗିତ ରଖାଯାଇଛି। ଟୋକିଓ ଅଲିମ୍ପିକ୍ସ, ୟୁରୋପିଆନ ଫୁଟବଲ ଚାମ୍ପିୟନଶିପ ଓ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)କୁ ମଧ୍ୟ ଘୁଞ୍ଚାଇଦିଆଯାଇଛି।
ଏହି ଭାଇରସ୍ ବିରୋଧରେ ଲଢେଇ ଜାରି ରଖିବାକୁ ହୋଲ ଆମ ସମସ୍ତଙ୍କୁ ଏକାଠି ହେବାକୁ ପଡିବ। ଏହା ଟେଷ୍ଟ ମ୍ୟାଚ୍ ଭଳି। ଟେଷ୍ଟ ୫ ଦିନ ଧରି ଖେଳାଯାଇଥାଏ। କିନ୍ତୁ ଏହା ଆହୁରି ଅଧିକ ସମୟ ବିଶିଷ୍ଟ ହୋଇଛି ବୋଲି କୁମ୍ବଲେ ତାଙ୍କ ଟୁଇଟର ଆକାଉଣ୍ଟରେ ଏକ ଭିଡିଓ ପୋଷ୍ଟ କରି କହିଛନ୍ତି। ଟେଷ୍ଟ ମ୍ୟାଚ୍ ୨ ଇନିଂସ ବିଶିଷ୍ଟ ହୋଇଥାଏ। ପ୍ରଥମ ଇନିଂସରେ ଅଗ୍ରଣୀ ହୋଇଥିଲେ ମଧ୍ୟ ଦ୍ୱିତୀୟ ଇନିଂସରେ ଅଧିକ ଚ୍ୟାଲେଞ୍ଜ୍ର ସମ୍ମୁଖୀନ ହେବାକୁ ପଡିଥାଏ। ଆମକୁ ଏହି ଲଢେଇରେ ଜିତିବାକୁ ହେବ। ପ୍ରଥମ ଇନିଂସରେ ଅଗ୍ରଣୀ ହୋଇଥିଲେ ମଧ୍ୟ ଟେଷ୍ଟ ଜିତିବା ପାଇଁ ଏହା ଯଥେଷ୍ଟ ହୋଇ ନ ଥାଏ। ତେଣୁ ଦ୍ୱିତୀୟ ଇନିଂସରେ ମଧ୍ୟ ଆହୁରି ଭଲ ଖେଳିବାକୁ ହେବ ବୋଲି କୁମ୍ବଲେ କହିଛନ୍ତି।
ଏହି ମହାମାରୀରେ ଆମ ଦେଶରେ ୨,୦୦୦ ଲୋକ ମୃତ୍ୟୁବରଣ କରିଥିବା ବେଳେ ୫୯, ୦୦୦ ଲୋକ ସଂକ୍ରମିତ ହୋଇଛନ୍ତି। ଏହି ଅବସରରେ ସେ ସବୁ ଡାକ୍ତର, ନର୍ସ, ଆଟେଣ୍ଡର, ଭଲ୍ୟୁଣ୍ଟିୟର, ସରକାରୀ କର୍ମଚାରୀ, ଅଧିକାରୀ ପୋଲିସକୁ କୃତଜ୍ଞତା ଜଣାଇଛନ୍ତି।