ନୂଆଦିଲ୍ଳୀ, ୬।୪(ପି.ଟି.)- ଭାରତୀୟ ପୂର୍ବତନ ଅଫ୍- ସ୍ପିନର ହରଭଜନ ସିଂ ଓ ତାଙ୍କ ସ୍ତ୍ରୀ ତଥା ଅଭିନେତ୍ରୀ ଗୀତା ବାସ୍ରା ତାଙ୍କ ହୋମ୍ ଟାଉନ୍ ଜଳନ୍ଧରରେ ୫,୦୦୦ ପରିବାରକୁ ଖୁଆଇବେ ବୋଲି କଥା ଦେଇଛନ୍ତି। କୋଭିଡ୍-୧୯ ମହାମାରୀର ରୂପ ନେଇଥିବା ବେଳେ ଏହା ଦ୍ୱାରା ପ୍ରଭାବିତ ପରିବାରଙ୍କୁ ଖାଦ୍ୟ ଦେବାର ଆବଶ୍ୟକତା ଅଛି ବୋଲି ସେ ହୃଦୟଙ୍ଗମ କରିଛନ୍ତି। କେବଳ ଭାରତରେ ଏହି ଭାଇରସ୍ ଦ୍ୱାରା ୩୦୦୦ରୁ ଊର୍ଦ୍ଧ୍ୱ ଲୋକ ସଂକ୍ରମଣର ଶିକାର ହୋଇଛନ୍ତି ଓ ୭୦ ଜଣ ମୃତ୍ୟୁବରଣ କରିଛନ୍ତି। ଜଳନ୍ଧରରେ ରହୁଥିବା ୫,୦୦୦ ପରିବାରକୁ ଆମେ ରାଶନ ଦେବୁ। ଏହି କଷ୍ଟକର ସମୟରେ ଯେଉଁମାନେ ସେମାନଙ୍କ ପରିବାରକୁ ଖୁଆଇବା ପାଇଁ ସଂଘର୍ଷ କରୁଛନ୍ତି ସେମାନଙ୍କୁ ଆମେ ସାହାଯ୍ୟ କରିବୁ । ଆମେ ଏହି ପରିବାରଗୁଡିକୁ ସାହାଯ୍ୟ ଓ ସମର୍ଥନ ଜାରି ରଖିବୁ ଓ ସେମାନଙ୍କ ବୋଝ କମ୍ କରିବାକୁ ପ୍ରୟାସ କରିବୁ ବୋଲି ହରଭଜନ କହିଛନ୍ତି। ମୁମ୍ବାଇରେ ରହି ମଧ୍ୟ ସେ ଏହି କାର୍ଯ୍ୟ ଜାରି ରଖିଛନ୍ତି। ମୋର ନିକଟତମ ବନ୍ଧୁ ୫୦୦ଟି ପରିବାରକୁ ଶୁଖଲା ରାଶନ ପ୍ରଦାନ କରିଛନ୍ତି। ପଞ୍ଜାବ ପୋଲିସ୍ର ଡିସିଙ୍କ ସହିତ ଫୋନ୍ରେ ଆଲୋଚନା କରିଛି ଓ ତାଙ୍କ କହିବା ଅନୁଯାୟୀ ଖାଦ୍ୟ ପ୍ୟାକେଟ ବଣ୍ଟନ କରାଯିବ ବୋଲି ସେ କହିଛନ୍ତି। ଯେପର୍ଯ୍ୟନ୍ତ ସ୍ଥିତି ସ୍ବାଭାବିକ୍ ନ ହୋଇଛି, ସେ ପର୍ଯ୍ୟନ୍ତ ଗୃହହୀନ ଓ ବେରୋଜଗାର ଲୋକଙ୍କୁ ଖାଦ୍ୟ ଯୋଗାଇବେ ବୋଲି ୩୯ ବର୍ଷୀୟ ହରଭଜନ କହିଛନ୍ତି। ୫ କେ.ଜି. ଚାଉଳ, ଅଟା, ତେଲ ଓ ଅନ୍ୟାନ୍ୟ ରୋଷେଇ ସାମଗ୍ରୀ ବଣ୍ଟନ କରାଯିବ। ପଞ୍ଜାବ ପୋଲିସ୍ ଓ ପିଲା ବେଳର ବନ୍ଧୁମାନଙ୍କ ଦ୍ୱାରା ଏହା ସମ୍ଭବ ହେବ। ତେବେ ବହୁତ କାର୍ଯ୍ୟ ବାକି ରହିଛି ବୋଲି ହରଭଜନ କହିଛନ୍ତି।