ଭୁବନେଶ୍ୱର, ୨୫।୨ (ସ୍ପୋଟର୍ସ ବ୍ୟୁରୋ)- ପୂର୍ବତନ ବିଶ୍ୱ ତୀରନ୍ଦାଜୀ ୟୁଥ୍ ଚାମ୍ପିୟନଶିପ୍ ସ୍ବର୍ଣ୍ଣ ପଦକ ବିଜୟିନୀ କୋମାଳିକା ବାରିଙ୍କୁ ଚଳିତ ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ାରେ ନିରାଶ ହେବାକୁ ପଡ଼ିଛି। ସୋମବାର ଏଠାରେ ଅନୁଷ୍ଠିତ ବାଳିକା ରିକର୍ଭ ତୀରନ୍ଦାଜୀ ଇଭେଣ୍ଟରେ ଝାଡ଼ଖଣ୍ଡର କୋଲହାନ ବିଶ୍ୱବିଦ୍ୟାଳୟ ପକ୍ଷରୁ ପ୍ରତିନିଧିତ୍ୱ କରୁଥିବା କୋମାଳିକା ସେମିଫାଇନାଲରୁ ବିଦାୟ ନେଇଛନ୍ତି। ମହର୍ଷି ଦୟାନନ୍ଦ ବିଶ୍ୱବିଦ୍ୟାଳୟ (ରୋହତକ)ର ପ୍ରିୟଙ୍କା ଥାକରନ୍ ସେମିଫାଇନାଲରେ କୋମାଳିକାଙ୍କୁ ପରାସ୍ତ କରିଛନ୍ତି। ପ୍ରିୟଙ୍କା ଏଥିପୂର୍ବରୁ ରାଉଣ୍ଡ-୧୬ରେ କୋଲହାନ ବିଶ୍ୱବିଦ୍ୟାଳୟର ଅନ୍ୟତମ ତୀରନ୍ଦାଜ ବାସନ୍ତୀ ବିରୁଆଙ୍କୁ ୧୨୭-୧୧୮ ସ୍କୋରରେ ହରାଇଥିଲେ। ଏହାପରେ କ୍ୱାର୍ଟର ଫାଇନାଲରେ ପ୍ରିୟଙ୍କା ୮୨-୬୨ରେ ମଣିପୁର ନ୍ୟାଶନାଲ ସ୍ପୋଟର୍ସ ବିଶ୍ୱବିଦ୍ୟାଳୟର ଦୁର୍ଗେଶ ଗୋସ୍ବାମୀଙ୍କୁ ମାତ୍ ଦେଇ ସେମିଫାଇନାଲରେ ପହଞ୍ଚତ୍ଥିଲେ। ଯେଉଁଠି ସେ ୨୦୧୯ ବିଶ୍ୱ ତୀରନ୍ଦାଜୀ ୟୁଥ୍ ଚାମ୍ପିୟନଶିପ୍ର ସ୍ବର୍ଣ୍ଣ ପଦକ ବିଜୟିନୀ କୋମାଳିକାଙ୍କୁ ପରାସ୍ତ କରିଛନ୍ତି। ‘ନିଶ୍ଚିତ ଭାବେ ମୁଁ ଜାଣିଥିଲି କୋମାଳିକା ପ୍ରତିଯୋଗିତାର ଜଣେ ଶ୍ରେଷ୍ଠ ତୀରନ୍ଦାଜ। କିନ୍ତୁ ମୋ ଖେଳ ଉପରେ ମୁଁ ଫୋକସ୍ କରିଥିଲି ଏବଂ ଏହାର ଫଳ ପାଇଛି’ ବୋଲି ଜନ୍ମଦିନରେ ବଡ଼ ବିଜୟ ହାସଲ କରିଥିବା ପ୍ରିୟଙ୍କା କହିଛନ୍ତି। ପ୍ରିୟଙ୍କାଙ୍କ ପ୍ରଦର୍ଶନରେ ତାଙ୍କ କୋଚ୍ ଅନିଲ କୁମାର ଖୁସି ଜାହିର କରିଛନ୍ତି। ନବମ ଶ୍ରେଣୀରେ ପଢ଼ୁଥିବାବେଳେ ପ୍ରିୟଙ୍କା ତୀରନ୍ଦାଜୀ କ୍ରୀଡ଼ାରେ ପ୍ରବେଶ କରିଥିଲେ। ୨୦୧୮ ନ୍ୟାଶନାଲରେ ସେ ରୌପ୍ୟ ପଦକ ବିଜୟୀ ହରିୟାଣା ଦଳର ସଦସ୍ୟା ରହିଥିଲେ।