ଜୟପୁର, ୧୪।୯(ଡି.ଏନ୍.ଏ.): କୋରାପୁଟ ଜିଲାରେ ହାଇକୋର୍ଟ ସ୍ଥାୟୀ ବେଞ୍ଚ ପ୍ରତିଷ୍ଠା ଦାବିରେ ଓକିଲଙ୍କ କୋର୍ଟ ବର୍ଜନ ଆନ୍ଦୋଳନ ଡିସେମ୍ବର ୪ରୁ ଚାଲୁ ରହିଛି। ଦୀର୍ଘ ୧୦ମାସ ହେବ ଏହି ଦାବିନେଇ ଆନ୍ଦୋଳନ ଜାରି ରହିଥିବା ବେଳେ ଶନିବାର ଜାତୀୟ ଲୋକ ଅଦାଲତକୁ ମଧ୍ୟ ଆଇନଜୀବୀମାନେ ବନ୍ଦ କରିଛନ୍ତି। ଅବିଭକ୍ତ କୋରାପୁଟ ଜିଲାର ୧୩ ବାର୍ ତରଫରୁ ଏହି ଜାତୀୟ ଅଦାଲତକୁ ବନ୍ଦ କରାଯାଇଛି। ଅଦାଲତ ବନ୍ଦ ଯୋଗୁ ଆପୋସ ସମାଧାନ, ମୋଟର ଯାନ ଦୁର୍ଘଟଣା ମାମଲା, କ୍ଷତି ପୂରଣ, ଜମି ଜମା ମାମଲା, ବ୍ୟାଙ୍କ ଋଣ, ଚେକ୍ ବାଉନ୍ସ ଆଦି ବହୁ ମାମଲାର ସମାଧାନ ହୋଇପାରି ନାହିଁ। ଆଇନଜୀବୀଙ୍କ ଆନ୍ଦୋଳନ ଯୋଗୁ ଦୂରଦୂରାନ୍ତରୁ ଆସିଥିବା ମହକିଲମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏହି ଆନ୍ଦୋଳନ ଆସନ୍ତା ଅକ୍ଟୋବର ୨୧ ଯାଏ କୋର୍ଟ ବର୍ଜନ କରିବାକୁ ନିଷ୍ପତ୍ତି ହୋଇଛି ା ଏହି ଭିତରେ ଅବିଭକ୍ତ କୋରାପୁଟ ଜିଲାର ଆଦିବାସୀ ସଂଘକୁ ନେଇ ଏକ ଗୁରୁତ୍ୱପୂର୍ଣ୍ଣ ବୈଠକ ଆୟୋଜିତ ହେବ। ସମସ୍ତ ଏମ୍ପି, ବିଧାୟକ ସର୍ବଦଳୀୟ ନେତା, ଆଇନଜୀବୀଙ୍କୁ ନେଇ ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରି ଦାବି ପୂରଣ ପାଇଁ ଚାପ ପକାଇବା ସହ ରାଜ୍ୟ ବାର୍ କାଉନସିଲକୁ ମଧ୍ୟ ଦାବିପତ୍ର ଦେବା ନେଇ ନିଷ୍ପତ୍ତି ହୋଇଛି ା