କୋରାପୁଟ,୯।୮(ସ୍ବ.ପ୍ର.):କୋରାପୁଟ ଜିଲାରେ ଗତ ସୋମବାର ୮୭୦.୮ ମିମି ବର୍ଷା ରେକର୍ଡ କରାଯାଇଛି। ସେଥିମଧ୍ୟରୁ ଜିଲାର କୋଟପାଡ ବ୍ଲକରେ ସର୍ବାଧିକ ୧୯୪ ମିମି ବର୍ଷା ହୋଇଥିବାବେଳେ ଲକ୍ଷ୍ମୀପୁର ବ୍ଲକରେ ସର୍ବନିମ୍ନ ୬ ମିମି ବର୍ଷା ହୋଇଥିବା ଜିଲା ଜରୁରୀ ବିଭାଗ ପକ୍ଷରୁ ସୋମବାର ରେକର୍ଡ କରାଯାଇଛି। ଏହି ରେକର୍ଡ ଅନୁଯାୟୀ ଜିଲାର ପଟ୍ଟାଙ୍ଗୀ ବ୍ଲକରେ ୧୪୯, ବୋରିଗୁମ୍ମାରେ ୯୨.୮, କୁନ୍ଦ୍ରାରେ ୮୦.୮, ବୈପାରିଗୁଡାରେ ୭୦ ମିମି, ଲମତାପୁଟରେ ୫୨.୪ ମିମି ବର୍ଷା ରେକର୍ଡ କରାଯାଇଛି। କୋରାପୁଟ ବ୍ଲକରେ ୪୦.୪ମିମି, ଜୟପୁରରେ ୩୯.୮, ସେମିଳିଗୁଡାରେ ୭୧, ବନ୍ଧୁଗାଁରେ ୧୬ ମିମି , ନାରାୟଣପାଟଣାରେ ୯.୬ମିମି , ନନ୍ଦପୁର ବ୍ଳକରେ ୪୧ ମିମି, ଦଶମନ୍ତପୁର ବ୍ଲକରେ ୮ ମିମି ବର୍ଷା ହୋଇଥିବା ଜଣାପଡିଛି। ବର୍ତ୍ତମାନ ସୁଦ୍ଧା ବର୍ଷା ଯୋଗୁ କୋରାପୁଟ ଜିଲାର ସେମିଳିଗୁଡା ବ୍ଲକର ୪ଟି ଘର ଭାଙ୍ଗିଯାଇଥିବା ସୋମବାର ଜିଲା ଜରୁରୀ ବିଭାଗ ପକ୍ଷରୁ ଜଣାପଡିଛି। କୋରାପୁଟ ଜିଲାରେ ଗତ ୩ଦିନ ଧରି ଜିଲାରେ ପ୍ରବଳ ବର୍ଷା ଜାରି ରହିଥିବାବେଳେ ଏଥିଯୋଗୁ ଜିଲାର ତେଲେଙ୍ଗିରି ଜଳ ଭଣ୍ଡାରର ଜଳସ୍ତର ୬୨୭ ମିଟରକୁ ବୃଦ୍ଧି ପାଇଛି। କୋଲାବ ଜଳଭଣ୍ଡାର ଜଳସ୍ତର ୮୪୮.୬୬ ମିଟରକୁ ବୃଦ୍ଧି ପାଇଛି । ସେହିପରି ଅପର ଇନ୍ଦ୍ରାବତୀ ଜଳଭଣ୍ଡାରର ଜଳସ୍ତର ୬୩୩.୨୪ ମିଟରକୁ ବୃଦ୍ଧି ପାଇଥିବା ଖବର ମିଳିଛି।