ବଲିଉଡର ପ୍ରସିଦ୍ଧ କୋରିଓଗ୍ରାଫର ରେମୋ ଡିସୋଜାଙ୍କ ନାଁରେ ଜାମିନବୀହିନ ପରଓ୍ବାନା ଜାରି କରାଯାଇଛି। ୫ କୋଟି ଟଙ୍କା ହଡପ ଅଭିଯୋଗରେ ଗାଜିଆବାଦର ଜିଲା ଅଦାଲତ ଏହି ନିର୍ଦ୍ଦେଶ ଦେଇଛନ୍ତି। ସୂଚନାଯୋଗ୍ୟ, ମୋରଟି ଗ୍ରାମର ସତ୍ୟେନ୍ଦ୍ର ତ୍ୟାଗି ନାମକ ଜଣେ ବ୍ୟକ୍ତି ୨୦୧୬ରେ ସିହାନୀ ଥାନାରେ ରେମୋଙ୍କ ନାଁରେ ଟଙ୍କା ହଡପ ଅଭିଯୋଗ ଆଣିଥିଲେ। ଅଭିଯୋଗ ଅନୁଯାୟୀ, ଏକ ବଡ ଫିଲ୍ମ ନିର୍ମାଣ କରିବା କହି ରେମୋ ତାଙ୍କଠାରୁ ୫ କୋଟି ନେଇ ଏକ ବର୍ଷ ଭିତରେ ୧୦ କୋଟି ଫେରେଇ ଦେବେ ବୋଲି ପ୍ରତିଶ୍ରୁତି ଦେଇଥିଲେ। ୨୦୧୪ରେ ରିଲିଜ୍ ହୋଇଥିବା ଅମର ମଷ୍ଟ ଡାଏ ଫିଲ୍ମରେ ଏହି ଟଙ୍କା ଲାଗିଥିଲା। କିନ୍ତୁ ପରେ ଟଙ୍କା ମାଗିବାରୁ ତାଙ୍କୁ ଧମକ ଦିଆଯାଇଥିଲା ବୋଲି ସତ୍ୟେନ୍ଦ୍ର କହିଛନ୍ତି। ଖୁବ୍ଶୀଘ୍ର ଗାଜିଆବାଦ ପୋଲିସର ଏକ ଟିମ୍ ତାଙ୍କୁ ଗିରଫ କରିବା ପାଇଁ ମୁମ୍ବାଇ ଯିବ ବୋଲି ଜଣାପଡିଛି।