କାଏରୋ,୧୯ା୬(ଆଇଏଏନ୍ଏସ୍): ଇଜିପ୍ଟର ପୂର୍ବତନ ରାଷ୍ଟ୍ରପତି ମହମ୍ମଦ ମୋର୍ସି(୬୭) କୋର୍ଟରୁମ୍ରେ ଅଚାନକ ଟଳିପଡ଼ିବା ପରେ ଆଖି ବୁଜିଦେଇଛନ୍ତି। ମୋର୍ସିଙ୍କ ପୁତ୍ର ଅହମଦ୍ଙ୍କ ସୂଚନା ଅନୁଯାୟୀ, ପିତାଙ୍କୁ ପୂର୍ବ କାଏରୋ ଅଧୀନ ନାସେର ସିଟି ଡିଷ୍ଟ୍ରିକ୍ଟରେ ମୁସଲିମ୍ ବ୍ରଦରହୁଡ ଗାଇଡ୍ଙ୍କ ନିମନ୍ତେ ଉଦ୍ଦିଷ୍ଟ ସମାଧିସ୍ଥଳରେ କବର ଦିଆଯାଇଛି। କେବଳ ମୋର୍ସିଙ୍କ ପରିବାର ସଦସ୍ୟଙ୍କୁ ସମାଧିସ୍ଥଳରେ ଉପସ୍ଥିତ ରହିବାକୁ ଅନୁମତି ଦିଆଯାଇଥିଲା।
ଇତିହାସରେ ମୋର୍ସି ହେଉଛନ୍ତି ଗଣତାନ୍ତ୍ରିକ ଭାବେ ନିର୍ବାଚିତ ହୋଇଥିବା ଏକମାତ୍ର ରାଷ୍ଟ୍ରପତି। ବିଭିନ୍ନ ଅପରାଧରେ ଜଡିତ ଥିବା ଅଭିଯୋଗରେ ତାଙ୍କ ନାମରେ ଅଦାଲତରେ ମାମଲା ଚାଲୁଥିଲା। ଶାସନ କ୍ଷମତାରେ ଥିବାବେଳେ ସେ ବିଭିନ୍ନ ଆପରାଧିକ କାର୍ଯ୍ୟ ପାଇଁ ୬ ବର୍ଷ ଗୃହ ବନ୍ଦୀ ଥିଲେ ଏବଂ ଅତ୍ୟନ୍ତ ଦୟନୀୟସ୍ଥିତିରେ ଜୀବନ ବିତାଉଥିଲେ। ତାଙ୍କୁ ଏକୁଟିଆ ଏକ କୋଠରି ମଧ୍ୟରେ ରଖାଯାଇଥିଲା ଏବଂ ଉପଯୁକ୍ତ ଚିକିତ୍ସା ଯୋଗାଇ ଦିଆଯାଉ ନ ଥିଲା। ମୋର୍ସିଙ୍କ ବିରୋଧରେ ଗୁପ୍ତଚର ବୃତ୍ତି ଅଭିଯୋଗର ବିଚାର ଚାଲିଥିବାବେଳେ ସେ କୋର୍ଟରୁମ୍ରେ ଅଚାନକ ଟଳିପଡ଼ିଥିଲେ। ତାଙ୍କୁ ତୁରନ୍ତ କାଏରୋ ହସ୍ପିଟାଲ୍ ନିଆଯିବା ପରେ ଡାକ୍ତର ମୃତ ଘୋଷଣା କରିଥିଲେ।