ବାଲେଶ୍ୱର ଅଫିସ,୨୧।୧୨: ବାଲେଶ୍ୱର ସିଭିଲ ଜଜ୍ ଜୁନିୟର ଡିଭିଜନ୍ (ମୁନସିଫ୍) କୋର୍ଟର ନିର୍ବାଚନ ମିସ୍ କେସ୍ (ନଂ. ୧୬/୧୭)ର ଫାଇଲ୍ ଚୋରି ହୋଇଯାଇଥିବା ଶନିବାର ଜଣାପଡ଼ିଥିଲା। ସିସିଟଭି ଫୁଟେଜ୍କୁ ଆଧାର କରି ଅଭିଯୁକ୍ତଙ୍କୁ ଆଇନଜୀବୀମାନେ ଅଟକାଇଥିଲେ। ଦୀର୍ଘସମୟ ପଚରାଉଚରା ପରେ ଅଭିଯୁକ୍ତ ଉକ୍ତ ଫାଇଲ୍କୁ ଚୋରାଇଥିବା ସ୍ବୀକାର କରିବା ସହ ତାଙ୍କୁ ପଠାଇଥିବା ୨ଜଣ ଲୋକ ଫାଇଲ୍ ନେଇଯାଇଥିବା କହିଛନ୍ତି। ଏହାପରେ ଜିଲା ଜଜ୍ ହିରଣ୍ମୟୀ ବିଶୋଇଙ୍କ ନିର୍ଦ୍ଦେଶରେ ସହଦେବଖୁଣ୍ଟା ମଡ଼େଲ ଥାନାରେ ଲିଖିତ ଅଭିଯୋଗ କରାଯାଇଥିଲା। ପୋଲିସ ପହଞ୍ଚତ୍ ଅଟକ ଅଭିଯୁକ୍ତଙ୍କୁ ଥାନାକୁ ନେଇ ପଚରାଉଚରା କରିବା ସହ ତଦନ୍ତ ଆରମ୍ଭ କରିଛି।
୨୦୧୮ ପଞ୍ଚାୟତ ନିର୍ବାଚନ ସମୟରେ ଏକ ମାମଲା ରୁଜୁ କରାଯାଇ କୋର୍ଟରେ ବିଚାରାଧୀନ ଥିବା ବେଳେ ଗତ ଶୁକ୍ରବାର କୋର୍ଟରେ ତାରିଖ ଥିଲା। ରେମୁଣା ବ୍ଲକ ଆମ୍ବୁଡ଼ିଆସ୍ଥିତ ରବି ମଲ୍ଲିକ ନାମକ ଜଣେ ବ୍ୟକ୍ତି ନିଜକୁ ଆଇନଜୀବୀର ପରିଚୟ ଦେଇ ଉକ୍ତ ଫାଇଲ୍କୁ ଦେଖିବା ପାଇଁ ମୁନସିଫ୍ ପେସ୍କାରଙ୍କୁ ଅନୁରୋଧ କରିଥିଲେ। ଜଜ୍ଙ୍କ ଡାକରାରେ ପେସ୍କାର ଉଠିଯାଇଥିବାବେଳେ ଆସି ଫାଇଲ୍ ଖୋଜି ପାଇ ନ ଥିଲେ। ପେସ୍କାର ରବିଙ୍କୁ ପଚାରିବାରୁ ସେ ମାନି ନ ଥିଲେ। ପରେ ସିସିଟିଭିର ସହାୟତା ନିଆଯାଇଥିଲା। ସିସି ଟିଭିରୁ ମିଳିଥିବା ତଥ୍ୟ ଅନୁସାରେ ରବି ଫାଇଲ୍ ଦେଖି ସାରି ଟେବୁଲ୍ରେ ରଖି ବାହାରେ ଦୁଇଜଣ ଲୋକଙ୍କ ସହ ଅପେକ୍ଷା କରିଥିଲେ। ଜଜ୍ଙ୍କ ଡାକରାରେ ପେସ୍କାର ସିଟ୍ରୁ ଉଠି ଯାଇଥିବାବେଳେ ରୁମ୍ ଭିତରେ ପଶି ଉକ୍ତ ଫାଇଲ୍କୁ ଆଣିଥିବା ପଲିଥିନ୍ରେ ପୂରାଇ ସହଯୋଗୀ ଦୁଇଜଣଙ୍କ ଦେଇଥିବା ପ୍ରମାଣ ମିଳିଥିଲା। ଶନିବାର ତାଙ୍କୁ ପଚାରିବାରୁ ପ୍ରଥମେ ସେ ମନା କରିଥିଲେ। ବାର୍ର ସମସ୍ତ ଆଇନ୍ଜୀବୀ ଏକାଠି ହୋଇ ଉକ୍ତ ଫାଇଲ୍ର ସନ୍ଧାନ ପାଇଁ ଚେଷ୍ଟା କରିଥିଲେ। ଦୀର୍ଘ ସମୟ ପଚରାଉଚରା ପରେ ଶେଷରେ ସେ ଫାଇଲ୍କୁ ନେଇଥିବା ସ୍ବୀକାର କରିଥିଲେ।
ଅପରାହ୍ନରେ ଆଇନଜୀବୀ ସଂଘର ପରାମର୍ଶଦାତା ଆଇନଜୀବୀ ରଘୁନାଥ ପ୍ରଧାନଙ୍କ ସଭାପତିତ୍ୱରେ ଜରୁରୀକାଳୀନ ବୈଠକ ଡକାଯାଇଥିଲା। ସମ୍ପାଦକ ଆଇନଜୀବୀ ସମ୍ବିତ ନନ୍ଦୀ, ସହସମ୍ପାଦକ ଆଇନଜୀବୀ ଦୀପକ କୁମାର ଦାସଙ୍କ ସମେତ ବହୁ ସଦସ୍ୟ ଏକାଠି ହୋଇ ଉକ୍ତ ଘଟଣାକୁ ଆଲୋଚନା କଲା ପରେ ରବି ମଲ୍ଲିକ କୌଣସି ଆଇନଜୀବୀ ନୁହେଁ କିମ୍ବା ବାର୍ ଆସୋସିଏଶନ୍ର ସଦସ୍ୟ ନୁହନ୍ତି ବୋଲି ଜଣାପଡ଼ିଥିଲା। ଦୀର୍ଘଦିନ ଧରି ଆଇନଜୀବୀମାନଙ୍କୁ ସହଯୋଗ କରିବା ଆଳରେ ନିଜକୁ ଆମତ୍ଘୋଷିତ ଆଇନଜୀବୀ ପରିଚୟରେ କାର୍ଯ୍ୟ କରିଆସୁଥିଲେ। ଏଭଳି ଘଟଣାକୁ ଦୃଢ଼ ନିନ୍ଦା କରିବା ସହ ଅଭିଯୁକ୍ତଙ୍କ ନାମରେ ଲିଖିତ ଅଭିଯୋଗ କରିବା ପାଇଁ ଜିଲା ଜଜ୍ଙ୍କୁ ଅନୁରୋଧ କରିଥିଲେ। ଅନ୍ୟପଟେ ମକଦ୍ଦମାରେ ଅଭିଯୁକ୍ତଙ୍କ ସପକ୍ଷରେ କୌଣସି ଆଇନଜୀବୀ ନ ଲଢ଼ିବା ପାଇଁ ପ୍ରସ୍ତାବ ଗୃହୀତ ହୋଇଥିବା ସହସମ୍ପାଦକ ଆଇନଜୀବୀ ଦାସ ପ୍ରକାଶ କରିଛନ୍ତି।