ବ୍ରହ୍ମପୁର ଅଫିସ,୧୯ା୭: ଜଣେ ବିଲ୍ଡରଙ୍କୁ ବ୍ରହ୍ମପୁର ମହାନଗର ନିଗମର ପୂର୍ବତନ ମେୟର ପିଣ୍ଟୁ ଓରଫ ଶିବଶଙ୍କର ଦାସ ଓ ତାଙ୍କ ସହଯୋଗୀମାନେ ବନ୍ଧୁକ ଦେଖାଇ ୧୬ଲକ୍ଷ ଟଙ୍କା ଦାଦାବଟି ମାଗିଥିଲେ। ଏହି ମାମଲାର ବିଚାର ଏବେ ଅତିରିକ୍ତ ଜିଲା ଦୌରାଜଜ୍-୨ ଦୀପକ କୁମାରଙ୍କ କୋର୍ଟରେ ଚାଲିଛି। ସମସ୍ତଙ୍କ ସାକ୍ଷ୍ୟ ଗ୍ରହଣ ସରିଥିବାବେଳେ ଅତିରିକ୍ତ ପିପି ଘଟଣାବେଳେ ବ୍ୟବହୃତ ହୋଇଥିବା ବନ୍ଧୁକ ଜୁଲାଇ ୧୮ରେ କୋର୍ଟରେ ଦାଖଲ କରିବା ପାଇଁ ତତ୍କାଳୀନ ତଦନ୍ତକାରୀ ଅଧିକାରୀ ତଥା ଏସ୍ଆଇ ଲକ୍ଷ୍ମଣ ସେଠୀ, ଗୋଳନ୍ଥରା ଥାନା ଅଧିକାରୀ, ବ୍ରହ୍ମପୁର ଏସ୍ପି ଓ ଡାଇରେକ୍ଟର ଅଫ୍ ପବ୍ଲିକ୍ ପ୍ରୋସିକ୍ୟୁଟରଙ୍କୁ ଚିଠି ଲେଖିଥିଲେ। ଗୁରୁବାର ଏସ୍ଆଇ ଲକ୍ଷ୍ମଣ ସେଠୀ ଅତିରିକ୍ତ ଜିଲା ଦୌରାଜଜ୍-୨ଙ୍କ ନିକଟରେ ହାଜର ହୋଇ ଘଟଣାବେଳେ ବ୍ୟବହୃତ ବନ୍ଧୁକକୁ ଦାଖଲ କରିଥିଲେ।