କୋର୍ଟରେ ବାଜିଲା ଚିଦାମ୍ବରମଙ୍କ ଫୋନ: ଜଜ୍‌ କହିଲେ, ‘ନ୍ୟାୟିକ କାର୍ଯ୍ୟରେ ବାଧା ଦେଲେ ଜବତ ହୋଇପାରେ ମୋବାଇଲ’

ଅହମ୍ମଦାବାଦ,୨୧।୬: ଗୁଜରାଟ ହାଇକୋର୍ଟରେ ୨୦୧୭ ରାଜ୍ୟସଭା ନିର୍ବାଚନକୁ ନେଇ ଗୁରୁବାର କଂଗ୍ରେସର ବରିଷ୍ଠ ନେତା ଅହମଦ ପଟେଲଙ୍କ ସହ ଭାଜପା ନେତାଙ୍କ ଓକିଲ ମଧ୍ୟରେ ପ୍ରଶ୍ନ ଉତ୍ତର ଚାଲିଥିଲା। ଏହି ସମୟରେ ଏକ ମଜାଳିଆ ଘଟଣା ଦେଖିବାକୁ ମିଳିଛି। ପୂର୍ବତନ ଅର୍ଥମନ୍ତ୍ରୀ ତଥା କଂଗ୍ରେସର ବରିଷ୍ଠ ନେତା ପି.ଚିଦାମ୍ବରମ ମଧ୍ୟ କୋର୍ଟରେ ଉପସ୍ଥିତ ଥିଲେ। ଓକିଲ ପଟେଲଙ୍କୁ ପ୍ରଶ୍ନ ପଚାରିବା ସମୟରେ ହଠାତ୍‌ ଚିଦାମ୍ବରମଙ୍କ ଫୋନ ବାଜି ଉଠିଥିଲା। ବହୁ ଚେଷ୍ଟା ପରେ ବି ସେ ଫୋନଟିକୁ ବନ୍ଦ କରିପାରି ନ ଥିଲେ। ସେହି ସମୟରେ ଜଜ୍‌ ବେଲା ତ୍ରିବେଦୀ ସ୍ମିତହାସ୍ୟ ଦେଇ କହିଥିଲେ ଯେ, ସାଧାରଣତଃ ନ୍ୟାୟିକ ପ୍ରକ୍ରିୟା ସମୟରେ ଏଭଳି ଧରଣର ବାଧା ଉପୁଜିଲେ ସେ ମୋବାଇଲକୁ ଜବତ କରିନିଅନ୍ତି। ଜଜ୍‌ଙ୍କ ଏଭଳି ମନ୍ତବ୍ୟ ପରେ ଚିଦାମ୍ବରମ ନିଜର ସଫେଇ ରଖିଥିଲେ। ସେ କହିଥିଲେ, ନିକଟରେ ଏହି ନୂଆ ଫୋନଟିକୁ କିଣିଛନ୍ତି ଏବଂ ତାଙ୍କୁ ଜଣା ନାହିଁ ମ୍ୟୁଟ କିପରି କରାଯାଏ। ଏହାପରେ କୋର୍ଟର ଜଣେ କର୍ମଚାରୀ ଚିଦାମ୍ବରମଙ୍କ ପାଖକୁ ଆସି ମୋବାଇଲ ଫୋନକୁ ମ୍ୟୁଟ କରିବାରେ ସାହାଯ୍ୟ କରିଥିଲେ।