ରସୁଲପୁର,୬।୪(ଡିଏନଏ): କରୋନା କଟକଣା ପାଇଁ ଚାରିଆଡ ଶୂନଶାନ ରହିଛି। ଏହାସତ୍ତ୍ୱେ ଜଣେ ପୋଲିସ କର୍ମଚାରୀଙ୍କ ବେପରୁଆ ଗାଡ଼ି ଚାଳନା ଓ ରାସ୍ତା ନିୟମ ଉଲ୍ଲଂଘନ ଯୋଗୁ ରସୁଲପୁର ବ୍ଲକ ୧୬ନଂ ଜାତୀୟ ରାଜପଥର ବାରବାଟୀ ନିକଟସ୍ଥ ବ୍ରାହ୍ମଣୀ ନଦୀ ପୋଲ ନିକଟରେ କୋର୍ଟ ଭ୍ୟାନ (ଓଡି୦୫ଏଏମ୨୨୦୯) ସହ ଏକ ଟ୍ରକ(ଡବ୍ଲ୍ୟୁବି୧୫ବି୫୮୯୬)ର ଦୁର୍ଘଟଣା ଘଟିଛି। ଫଳରେ ୪ ପୋଲିସ କର୍ମଚାରୀଙ୍କ ସମେତ ଜଣେ କଏଦୀ ଓ ଟ୍ରକ ଚାଳକ ଆହତ ହୋଇଛନ୍ତି। ଆହତକଙ୍କ ମଧ୍ୟରୁ ଉଭୟ ଗାଡି ଚାଳକଙ୍କ ଅବସ୍ଥା ଗୁରୁତର ଥିବା ଜଣାପଡିଛି। ସମସ୍ତ ଆହତକଙ୍କୁ କଟକ ବଡ ଡାକ୍ତରଖାନା ସ୍ଥାନାନ୍ତର କରାଯାଇଛି। ଆହତ ପୋଲିସ କର୍ମଚାରୀମାନେ ବାଲେଶ୍ୱର ଅଞ୍ଚଳର ଭ୍ୟାନ ଚାଳକ ହାବିଲଦାର ବନୋଜ କୁମାର ମହାନ୍ତି, ଲାନ୍ସର ମନୋରଞ୍ଜନ ମହାପାତ୍ର, କନଷ୍ଟେବଳ ନାରାୟଣ ରାଉତ, ମମତା ମୁର୍ମୁ ହୋଇଥିବାବେଳେ କଏଦୀ ଜଣକ ଚୌଦ୍ୱାର ଜେଲରୁ ବାଲେଶ୍ୱର ଅଭିମୁଖେ ଯାଉଥିବା ବାଂଲାଦେଶ ଅଞ୍ଚଳର ମହମ୍ମଦ ବାବୁ ଖାନ୍ ଓ ଟ୍ରକ ଚାଳକ ବିହାର ଅଞ୍ଚଳର ଅଜୟ କୁମାର ବୋଲି ଜଣାପଡିଛି।
ପ୍ରକାଶ ଯେ, ସୋମବାର ଅପରାହ୍ନରେ କୋର୍ଟ ଭ୍ୟାନ ଚୌଦ୍ୱାରରୁ ବାଲେଶ୍ୱର ଅଭିମୁଖେ ଯାଉଥିବାବେଳେ ଜାରକା ନିକଟସ୍ଥ ଗୋକର୍ଣ୍ଣେଶ୍ୱର ପୀଠ ନିକଟରେ ଡାଇଭର୍ସନକୁ ବ୍ୟବହାର ନ କରି ଭୁଲ ପୋଲ ଦେଇ ଯାଉଥିଲା। ପୋଲ ଅତିକ୍ରମ କରିବା ସମୟରେ ବିପରୀତ ଦିଗରୁ ଏକ ଟ୍ରକର ସମ୍ମୁଖ ଭାଗକୁ ଧକ୍କା ଦେଇଥିଲା। ଖବରପାଇ ଧର୍ମଶାଳା ଥାନାଧିକାରୀ ସରୋଜ କୁମାର ସାହୁ, କୁଆଖିଆ ଥାନାଧିକାରୀ ମନୋଜ କୁମାର ସ୍ବାଇଁ, ଜାରକା ବିଟ୍ ହାଉସ ଅଧିକାରୀ ରାଜ କିଶୋର ନାୟକ, ଯାଜପୁର ଏସଡିପିଓ ଚିନ୍ମୟ କୁମାର ନାୟକ ପ୍ରମୁଖ ଘଟଣାସ୍ଥଳରେ ପହଞ୍ଚତ୍ ଥିଲେ। ଆହତଙ୍କୁ ତାଙ୍କ ଗାଡିରେ ଧର୍ମଶାଳା ଥାନାକୁ ନେଇଥିଲେ।