ନୂଆଦିଲ୍ଲୀ, ୨୪ା୩: କରୋନା ବିଶ୍ୱବ୍ୟାପୀ ଆତଙ୍କ ଖେଳାଇ ଦେଇଛି। ବିଭିନ୍ନ ଦେଶରେ ଲୋକମାନେ ପୋକମାଛି ଭଳିି ମରୁଛନ୍ତି। ଭାରତ ବି ଏଥିରୁ ବାଦ୍ପଡ଼ିନି। ସୋମବାର ଆଉ ୨ ଜଣଙ୍କ ମୃତ୍ୟୁ ହେବା ପରେ ଦେଶରେ କରୋନାଜନିତ ମୃତ୍ୟୁ ସଂଖ୍ୟା ୯ରେ ପହଞ୍ଚତ୍ଛ ଓ ୪୩୫ରୁ ଊର୍ଦ୍ଧ୍ୱ ଆକ୍ରାନ୍ତ ଅଛନ୍ତି। ସୋମବାର ଅପରାହ୍ନ ୩.୩୫ରେ କୋଲକାତାରେ ପ୍ରଥମ କରୋନା ମୃତ୍ୟୁ ହୋଇଥିବା ଜଣାପଡ଼ିଛି। ଦମ୍ ଦମ୍ର ଜଣେ ୫୫ ବର୍ଷୀୟ ଯୁବକ କରୋନା ଭୂତାଣୁ ଦ୍ୱାରା ସଂକ୍ରମିତ ହେବା ପରେ ଚିକିତ୍ସାଧୀନ ଅବସ୍ଥାରେ ସ୍ଥାନୀୟ ଆମ୍ରି ହସ୍ପିଟାଲରେ ପ୍ରାଣ ହରାଇଥିବା ସରକାରୀ ଭାବେ କୁହାଯାଇଛି। ହସ୍ପିଟାଲ ପକ୍ଷରୁ ଏନେଇ ସ୍ବାସ୍ଥ୍ୟ ବିଭାଗକୁ ଅବଗତ କରାଯାଇଛି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପତ୍ରଲେଖି ପଶ୍ଚିମବଙ୍ଗକୁ ଆସୁଥିବା ସମସ୍ତ ବିମାନ ଉଡ଼ାଣକୁ ବନ୍ଦ କରିବା ଲାଗି କହିଛନ୍ତି। ବିମାନ ଉଡ଼ାଣ ଦ୍ୱାରା କ୍ୱାରାଣ୍ଟାଇନ ପ୍ରୋଟୋକଲ ଓ ସଟ୍ଡାଇନରେ ବ୍ୟତିକ୍ରମ ଘଟୁଛି। ବିମାପ ଉଡ଼ାଣ ବନ୍ଦ ହେଲେ କରୋନା ସଂକ୍ରମଣକୁ ସହଜେ ରୋକାଯାଇପାରିବ ବୋଲି ମମତା ପତ୍ର ଦ୍ୱାରା ଦର୍ଶାଇଛନ୍ତି। ମମତାଙ୍କ ଅନୁରୋଧ କ୍ରମେ ବେସାମରିକ ବିମାନ ଚଳାଚଳ ମନ୍ତ୍ରୀ ହର୍ଦୀପ ସିଂ ପୁରୀ ଖୁବ୍ଶୀଘ୍ର କେନ୍ଦ୍ର ସରକାର ଏହା ଉପରେ ପଦକ୍ଷେପ ଗ୍ରହଣ କରିବେ ବୋଲି ପ୍ରକାଶ କରିଛନ୍ତି। ଅନ୍ୟପକ୍ଷରେ ପ୍ରଧାନମନ୍ତ୍ରୀ ମୋଦି ଦେଶର ବିଭିନ୍ନ ସ୍ଥାନରେ ଲକ୍ଡାଉନକୁ ଗମ୍ଭୀରତାର ସହ ନେଉ ନ ଥିବାରୁ ଚିନ୍ତାବ୍ୟକ୍ତ କରିଛନ୍ତି। ଦେଶରେ କରୋନା ସଂକ୍ରମଣକୁ ରୋକିବା ଲାଗି ରାଜ୍ୟ ସରକାର କେନ୍ଦ୍ରର ନିର୍ଦ୍ଦେଶାବଳୀକୁ ପାଳନ କରି ବିଶେଷ ପଦକ୍ଷେପ ଗ୍ରହଣ କରିବା ଲାଗି ଅନୁରୋଧ କରିଛନ୍ତି।
ପୁଣି ୫୫ ମାମଲା ସାମ୍ନାକୁ ଆସିଛି। ରବିବାର ଗୁଜରାଟ, ବିହାର ଓ ମହାରାଷ୍ଟ୍ରରେ ଜଣେ ଲେଖାଏ ବ୍ୟକ୍ତି ପ୍ରାଣ ହରାଇଥିଲେ। ତାହା ପୂର୍ବରୁ କର୍ନାଟକ, ଦିଲ୍ଲୀ, ମହାରାଷ୍ଟ୍ର, ପଞ୍ଜାବରେ ମୃତ୍ୟୁଲୀଳା ଦେଖିବାକୁ ମିଳିଥିଲା। ଏପର୍ଯ୍ୟନ୍ତ ୨୪ ସଂକ୍ରମିତ ବ୍ୟକ୍ତି ସଫଳ ଚିକିତ୍ସା ଦ୍ୱାରା ଭଲହୋଇ ଘରକୁ ଯାଇଥିବା ଜଣାପଡ଼ିଛି। ମହାରାଷ୍ଟ୍ରରେ ଏବେ ସର୍ବାଧିକ ୬୭ କରୋନା ସଂକ୍ରମିତ ଥିବା ବେଳେ କେରଳରେ ମଧ୍ୟ ସମାନ ସଂଖ୍ୟକ ଅଛନ୍ତି। ଦିଲ୍ଲୀରେ ୨୯, ଉତ୍ତରପ୍ରଦେଶରେ ୨୮, ରାଜସ୍ଥାନରେ ୨୭, ତେଲଙ୍ଗାନାରେ ୨୬, କର୍ନାଟକରେ ୨୬ ସଂକ୍ରମିତ ଥିବା ଜଣାପଡ଼ିଛି।