ଖଣ୍ଡପଡ଼ା,୧୪ା୧୧ (ସ୍ବ.ପ୍ର.): ଲୋକମାନଙ୍କୁ ଅଳ୍ପ ମୂଲ୍ୟରେ ପ୍ରାକୃତିକ ଉପଚାର ଓ ଉତ୍ତମ ସ୍ବାସ୍ଥ୍ୟସେବା ଯୋଗାଇଦେବା ଲକ୍ଷ୍ୟରେ ରାଜ୍ୟ ସରକାର ୧୯୬୮ ମସିହାରୁ ଆୟୁର୍ବେଦିକ ଚିକିତ୍ସା ବ୍ୟବସ୍ଥା ଆରମ୍ଭ କରିଥିଲେ। ଏହି ବ୍ୟବସ୍ଥା ଅନୁଯାୟୀ ଖଣ୍ଡପଡା ବ୍ଲକ କୋସକାଠାରେ ଆୟୁର୍ବେଦିକ ଚିକିତ୍ସାଳୟ ଖୋଲାଯାଇଛି। ହେଲେ ସ୍ଥାୟୀ ଡାକ୍ତର ଅଭାବରୁ ଏଠାରେ ସ୍ବାସ୍ଥ୍ୟସେବା ବାଧାପ୍ରାପ୍ତ ହୋଇଛି।
ନୟାଗଡ଼ ଜିଲାର ୮ ବ୍ଲକ ମଧ୍ୟରୁ ଖଣ୍ଡପଡା ବ୍ଲକର କାଦୁଆ ଜଗନ୍ନାଥ ପ୍ରସାଦ, ସିଧାମୂଳା ଓ କୋସକାରେ ୩ଟି ଆୟୁର୍ବେଦିକ ଚିକିତ୍ସାଳୟ ପ୍ରତିଷ୍ଠା କରାଯାଇଛି। ଏଥିମଧ୍ୟରୁ ଅନେକ ସ୍ଥାନରେ ସ୍ବାସ୍ଥ୍ୟକେନ୍ଦ୍ରଗୁଡ଼ିକ ନାମକୁମାତ୍ର ଚାଲିଛି। କେଉଁଠି ଡାକ୍ତର ପଦବୀ ଖାଲି ପଡ଼ିଛି ତ କେଉଁଠି ଡାକ୍ତର ଥାଇ ମଧ୍ୟ ମାସ ମାସ ଧରି ସ୍ବାସ୍ଥ୍ୟକେନ୍ଦ୍ରକୁ ଆସୁ ନ ଥିବା ଅଭିଯୋଗ ହେଉଛି। କୋସକା ଆୟୁର୍ବେଦିକ ସ୍ବାସ୍ଥ୍ୟକେନ୍ଦ୍ର ଉପରେ ଢୋଲମରା, କୁମ୍ଭାରପଡା ଓ କୋସକା ପଞ୍ଚାୟତ ଅଧୀନ ରତାଖଣ୍ଡୀ, ଗୁଡିଆବାରୀ, ଆମ୍ବଅଠା, କୁସୁମଡା, ଲୁହାରଖଣି, ମୁଡକାବାଦ, ସାପୁଆ, ରାଇମ୍ବା ଆଦି ଗ୍ରାମର ହଜାର ହଜାର ଜନସାଧାରଣ ନିର୍ଭର କରିଥାନ୍ତି। ୨୦୦୮ ମସିହାରୁ ଏଠାରେ ସ୍ଥାୟୀ ଭାବେ କୌଣସି ଡାକ୍ତରଙ୍କୁ ନିଯୁକ୍ତି ଦିଆଯାଇ ନାହିଁ। ନୟାଗଡ଼ ଜିଲାର ବାଲୁଗଁ। ଆୟୁର୍ବେଦିକ ଚିକିତ୍ସାଳୟରେ ନିଯୁକ୍ତି ପାଇଥିବା ଡା. ସୁମିତ୍ରା ବିଶ୍ୱାଳ ଏବେ କୋସକା ଆୟୁର୍ବେଦିକ ଚିକିତ୍ସାଳୟର ଅତିରିକ୍ତ ଦାୟିତ୍ୱ ତୁଲାଉଥିବା ପ୍ରଶାସନ ସୂତ୍ରରୁ ଜଣାପଡିଛି। ସପ୍ତାହର ବୁଧବାର ଓ ଶନିବାର ୨ଦିନ ସେ ଏଠାକୁ ଆସୁଥିବା ବେଳେ ନିୟମିତ ଆସୁ ନ ଥିବାରୁ ସ୍ବାସ୍ଥ୍ୟକେନ୍ଦ୍ର ଉପରେ ରୋଗୀମାନଙ୍କ ଅସ୍ଥା ତୁଟି ଯାଉଛି। ସରକାର ନିରାମୟ ଯୋଜନାରେ ପର୍ଯ୍ୟାପ୍ତ ପରିମାଣର ଆୟୁର୍ବେଦିକ ଔଷଧ ଉକ୍ତ ଚିକିତ୍ସାଳୟକୁ ଯୋଗାଇ ଦେଉଛନ୍ତି। ମାତ୍ର ଡାକ୍ତରଙ୍କ ଅଭାବରୁ ରୋଗୀମାନେ ଆବଶ୍ୟକ ପରାମର୍ଶ ଓ ଔଷଧ ପାଇବାରୁ ବଞ୍ଚତ୍ତ ହେଉଥିବା ଅଭିଯୋଗ ହେଉଛି। ଏଠାରେ ଥିବା ଜଣେ ଆୟୁର୍ବେଦିକ ସହାୟକଙ୍କ ଦ୍ୱାରା ଉକ୍ତ ସ୍ବାସ୍ଥ୍ୟକେନ୍ଦ୍ର ପରିଚାଳନା ହେଉଥିବା ବେଳେ ଆବଶ୍ୟକ ସ୍ଥଳେ ସେ ରୋଗୀମାନଙ୍କୁ ଔଷଧ ଦେଇଥାନ୍ତି ବୋଲି ଗ୍ରାମବାସୀଙ୍କଠାରୁ ଜଣାପଡିଛି। ଅଞ୍ଚଳବାସୀ ଓ ଆଞ୍ଚଳିକ ଯୁବଛାତ୍ର ସଂଗଠନର ସଦସ୍ୟମାନେ ଜିଲା ମୁଖ୍ୟ ଚିକିତ୍ସାଧିକାରୀ ଓ ଜିଲାପାଳଙ୍କୁ ଭେଟି ଏହି ସମସ୍ୟା ସମ୍ପର୍କରେ ଆଲୋଚନା କରିଥିଲେ ହେଁ ସୁଫଳ ମିଳି ନ ଥିବା ଅନୁଷ୍ଠାନର ସାମାଜିକ କର୍ମୀ କୈଳାସ ଚନ୍ଦ୍ର ପଣ୍ଡା ସୂଚନା ଦେଇଛନ୍ତି। ଏହି ଚିକିତ୍ସାଳୟରେ ଜଣେ ସ୍ଥାୟୀ ଡାକ୍ତର ନିଯୁକ୍ତି ଦେବାକୁ ଅଞ୍ଚଳର ଜନସାଧାରଣ ଦାବି କରିଛନ୍ତି।