ନୂଆଦିଲ୍ଲୀ, ୨୧।୬- ଚଳିତ ବର୍ଷ ଶେଷ ଭାଗରେ ଭାରତୀୟ କ୍ରିକେଟ୍ ଦଳ ଅଷ୍ଟ୍ରେଲିଆ ଗସ୍ତରେ ଯାଇ ସେଠାରେ ଟେଷ୍ଟ ସିରିଜ ଖେଳିବାର କାର୍ଯ୍ୟସୂଚୀ ରହିଛି। ଶେଷଥର ପାଇଁ ଭାରତ ଯେତେବେଳେ ଅଷ୍ଟ୍ରେଲିଆ ଗସ୍ତରେ ଯାଇଥିଲା ସେଠାରେ ଟେଷ୍ଟ ସିରିଜ ବିଜୟୀ ହେବାର ସୌଭାଗ୍ୟ ଲାଭ କରିଥିଲା। ଅଷ୍ଟ୍ରେଲିଆ ମାଟିରେ ଭାରତର ଏହା ପ୍ରଥମ ଟେଷ୍ଟ ସିରିଜ ବିଜୟ ଥିଲା। ବିରାଟ କୋହଲି ଓ ଷ୍ଟିଭ ସ୍ମିଥ୍ଙ୍କ ପରି ବିଶ୍ୱସ୍ତରୀୟ ବ୍ୟାଟ୍ସମ୍ୟାନ ଉଭୟ ଦଳରେ ରହିଥିବାରୁ ଚଳିତ ବର୍ଷ ଶେଷ ଭାଗରେ ହେବାକୁ ଥିବା ଏହି ସିରିଜ ବେଶ୍ ରୋମାଞ୍ଚକ ହେବ ବୋଲି ଆଶା କରାଯାଉଛି। ତେବେ ଏହି ସିରିଜରେ ଭାରତୀୟ ଦଳର ଅଧିନାୟକ କୋହଲିଙ୍କୁ ସ୍ଲେଜିଂ କରିବାର କିଛି ଯୋଜନା ନାହିଁ ବୋଲି ଦୁର୍ଦ୍ଦର୍ଷ ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ ଡେଭିଡ୍ ଓ୍ବାର୍ନର ଏକ ସାକ୍ଷାତ୍କାର ଅବସରରେ କହିଛନ୍ତି। ‘ଆମ ଟିମ୍ ପାଖରେ ଏମିତି କୌଣସି କାରଣ ନାହିଁ ଯେଉଁଥି ପାଇଁ କି ଆମେ ବିରାଟଙ୍କୁ ସ୍ଲେଜିଂ କରିବୁ। ଆମେ ବିରାଟଙ୍କୁ ଟାର୍ଗେଟ୍ କରିବୁ ନାହିଁ। ତାଙ୍କୁ ଟାର୍ଗେଟ୍ କରିବା ଅର୍ଥ ଭାଲୁ ଟାର୍ଗେଟ୍ କରିବା ପରି ହେବ। କୋହଲି ଏଭଳି ଜଣେ ଖେଳାଳି ଯାହାଙ୍କ ସହ ଲାଗିପାରିବ ନାହିଁ। ତାଙ୍କ ସହ ଲାଗିବା ଅର୍ଥ ତୁମ ପାଇଁ ସମସ୍ୟା ବଢ଼ିପାରେ’ ବୋଲି ଓ୍ବାର୍ନର ପ୍ରକାଶ କରିଛନ୍ତି। ଦୁଇ ଦେଶ ମଧ୍ୟରେ ଡିସେମ୍ବର ୩ରେ ୪ ମ୍ୟାଚ୍ବିଶିଷ୍ଟ ସିରିଜର ପ୍ରଥମ ମ୍ୟାଚ୍ ଖେଳାଯିବ। ବ୍ରିସବେନର ଆଇକନିକ ଗାବା ଷ୍ଟାଡିୟମ ପ୍ରଥମ ଟେଷ୍ଟ ଆୟୋଜିତ ହେବ।