କୋଲକାତା, ୨୩।୧୧(କ୍ରୀଡ଼ା ପ୍ରତିନିଧି)-
ଇଡେନ ଗାର୍ଡେନରେ ଆରମ୍ଭ ହୋଇଥିବା ଦିବାରାତ୍ର କ୍ରିକେଟ ଟେଷ୍ଟରେ ରେକର୍ଡର ଅଧିକାରୀ ହୋଇଛନ୍ତି ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି। ସେ ଅଧିନାୟକଭାବେ ଟେଷ୍ଟରେ ୫୦୦୦ ରନ ପୂରଣ କରିବାରେ ଦ୍ରୁତତମ ସାବ୍ୟସ୍ତ ହୋଇଛନ୍ତି। କ୍ୟାରିୟରର ୮୬ତମ ଇନିଂସରେ ସେ ଏହି ମାଇଲଖୁଣ୍ଟ ସ୍ପର୍ଶ କରିଛନ୍ତି। ସେ ୬୫ତମ ଇନିଂସରୁ ୪୦୦୦ ରନ ପୂରଣ କରି ମଧ୍ୟ ରେକର୍ଡର ଅଧିକାରୀ ଥିଲେ। ଅନ୍ତର୍ଜାତୀୟ କ୍ରିକେଟରେ ୬ଷ୍ଠ ଅଧିନାୟକଭାବେ ସେ ୫୦୦୦ ରନର ମ୍ୟାଜିକ୍ ସଂଖ୍ୟା ଅତିକ୍ରମ କରିଛନ୍ତି। ଅଷ୍ଟ୍ରେଲିଆର ପୂର୍ବତନ ଅଧିନାୟକ ରିକି ପଣ୍ଟିଂ ୯୭ ଇନିଂସରୁ ୫୦୦୦ ରନ ପୂରଣ କରିଥିଲେ। ସେହିପରି ଓ୍ବେଷ୍ଟଇଣ୍ଡିଆନ ଲିଜେଣ୍ଡ କ୍ଲାଇଭ୍ ଲଏଡ ୧୦୬, ଦକ୍ଷିଣ ଆଫ୍ରିକାର ଗ୍ରେମ୍ ସ୍ମିଥ ୧୧୦, ଅଷ୍ଟ୍ରେଲିଆର ଆଲାନ ବର୍ଡର ୧୧୬ ଓ ନ୍ୟୁଜିଲାଣ୍ଡର ଷ୍ଟିଫେନ ଫ୍ଲେମିଂ ୧୩୦ ଇନିଂସରୁ ୫୦୦୦ ରନ ପୂରଣ କରିଛନ୍ତି।
