ଚେନ୍ନାଇ,୧୩।୧୨(ପି.ଟି.): ଓ୍ବେଷ୍ଟଇଣ୍ଡିଜ ଆସିଷ୍ଟାଣ୍ଟ କୋଚ୍ ରୋଡି ଇଷ୍ଟ୍ଓ୍ବିକ୍ ନିଜ ଖେଳାଳିମାନଙ୍କୁ ଭାରତୀୟ ଅଧିନାୟକ ବିରାଟ କୋହଲିଙ୍କ ଭଳି କଠିନ ପରଶ୍ରମ କରିବାକୁ ପରାମର୍ଶ ଦେଇଛନ୍ତି। ନିଜ ଲକ୍ଷ୍ୟ ସ୍ଥଳରେ ପହଞ୍ଚିବାକୁ ହେଲେ କୋହଲିଙ୍କ ପରି ଅଧ୍ୟବସାୟର ଆବଶ୍ୟକତା ରହିଛି ବୋଲି ସେ କହିଛନ୍ତି। ରବିବାର ଚେନ୍ନାଇରେ ଖେଳାଯିବାକୁ ଥିବା ପ୍ରଥମ ଦିନିକିଆ ମ୍ୟାଚ୍ ପୂର୍ବରୁ ଖବରଦାତାଙ୍କ ସହ କଥାହେବା ବେଳେ ସେ ଏହି କଥା କହିଛନ୍ତି। ସିମରନ ହେଟମେର ଓ ନିକୋଲାସ ପୁରନ କୋହଲିଙ୍କଠାରୁ ଶିକ୍ଷା କରିବା ଆବଶ୍ୟକ ବୋଲି ସେ କହିଛନ୍ତି। ଆମ ଯୁବ ଖେଳଳିମାନେ ପ୍ରତିଭାସମ୍ପନ୍ନ। କିନ୍ତୁ ଏମାନଙ୍କୁ କଠିନ ପରିଶ୍ରମ କରିବାର ଆବଶ୍ୟକତା ରହିଛି। ଏମାନେ କୋହଲିଙ୍କୁ ଆଦର୍ଶ ମାନିବା ଉଚିତ୍। ବହୁ ଖେଳାଳି କୋହଲିଙ୍କଠାରୁ ବହୁତ କିଛି ଶିଖି ପାରିବେ। କଠିନ ପରିଶ୍ରମ ବିନା ସଫଳତା ମିଳିବ ନାହିଁ। କଠିନ ପରିଶ୍ରମ ଅରୁଚିକର ହୋଇଥିଲେ ମଧ୍ୟ ସଫଳତାର ରାସ୍ତା ଦେଖାଇଥାଏ। ତେଣୁ ଜଣେ ଖେଳାଳିକୁ ସଫଳତା ପାଇଁ କଠିନ ପରିଶମ୍ର କରିବା ଏକାନ୍ତ ଆବଶ୍ୟକ ବୋଲି ସେ ସ୍ପଷ୍ଟ କରିଛନ୍ତି। ଟି୨୦ରେ ଭଲ ଖେଳୁଥିଲେ ମଧ୍ୟ ଲମ୍ବା ଫର୍ମାଟରେ ଖେଳାଳିମାନେ ଭଲ ପ୍ରଦର୍ଶନ କରିବା ଆବଶ୍ୟକ। ଟି୨୦ ସିରିଜରେ ୨-୧ରେ ପରାସ୍ତ ହୋଇଥିଲେ ମଧ୍ୟ ଦିନିକିଆରେ ଓ୍ବେଷ୍ଟଇଣ୍ଡିଜ୍ ଭଲ ପ୍ରଦର୍ଶନ କରିବ ବୋଲି ସେ ଆଶା ପ୍ରକାଶ କରିଛନ୍ତି। ସେହିପରି ହେଡେନ ଓ୍ବାଲ୍ସ ଜୁନିୟର ଓ କୋରୀ ପିଲେର ଓ ରଷ୍ଟନ ଚେଜ୍ଙ୍କ ଭଳି ଯୁବ ସ୍ପିନର ଧୀରେଧୀରେ ଅଭିଜ୍ଞତା ହାସଲ କରିଛନ୍ତି। ବିଶ୍ୱ ଶ୍ରେଷ୍ଠ ଦଳ ବିପକ୍ଷରେ ଖେଳିଲେ ଖେଳାଳିମାନେ ପରିପକ୍ୱ ହେବ ଓ ଏହାର ଫଳ ଭବିଷ୍ୟତରେ ମିଳିବ ବୋଲି ସେ କହିଛନ୍ତି।