କୋଲ୍କାତା, ୨୪।୧୧- ପିଙ୍କ୍ ବଲ୍ ଦିବାରାତ୍ର କ୍ରିକେଟ ଟେଷ୍ଟରେ ଭାରତ ପକ୍ଷରୁ ପ୍ରଥମ ଶତକ ହାସଲ କରିଛନ୍ତି ଅଧିନାୟକ ବିରାଟ କୋହଲି। ସ୍ଥାନୀୟ ଇଡେନ୍ ଗାର୍ଡେନ୍ସରେ ଚାଲିଥିବା ବାଂଲାଦେଶ ବିପକ୍ଷ ଦ୍ୱିତୀୟ ଟେଷ୍ଟରେ ବିରାଟଙ୍କ ଶତକ ସହାୟତାରେ ଭାରତ ଦୃଢ଼ ସ୍ଥିତିରେ ରହିଛି। ଚା’ ବିରତି ପୂର୍ବରୁ ଏହାର ପ୍ରଥମ ଇନିଂସ୍କୁ ୩୪୭/୯ରେ ଘୋଷଣା କରି ୨୪୧ ରନ୍ରେ ଅଗ୍ରଣୀ ଲାଭ କରିଛି ଟିମ୍ ଇଣ୍ଡିଆ। ବାଂଲାଦେଶ ପ୍ରଥମ ଇନିଂସ୍ ୧୦୬ ରନ୍ରେ ସୀମିତ ରହିଥିଲା। ଦ୍ୱିତୀୟ ଦିବସ ଶେଷ ବେଳକୁ ବାଂଲାଦେଶ ଦ୍ୱିତୀୟ ଇନିଂସରେ ୬ ଉଇକେଟ ହରାଇ ୧୫୨ ରନ ସଂଗ୍ରହ କରିଛି। ଦଳ ଏକଦା ୧୩ ରନରେ ୪ ଉଇକେଟ ହରାଇ ବିପଦରେ ପଡ଼ିଥିବାବେଳେ ମୁଶଫିକର ରହିମ ଓ ମହମୁଦୁଲ୍ଲା ଇନିଂସ ସମ୍ଭାଳିଥିଲେ। ମହମୁଦୁଲ୍ଲା ୩୯ ରନ କରି ରିଟାୟର୍ଡ ହର୍ଟ ହୋଇଥିବାବେଳେ ମୁଶ୍ଫିକର ୫୯ ରନରେ ଅପରାଜିତ ରହିଛନ୍ତି। ଭାରତ ପକ୍ଷରୁ ଈଶାନ୍ତ ଶର୍ମା ୪ଟି ଓ ଉମେଶ ଯାଦବ ୨ଟି ଉଇକେଟ ନେଇଛନ୍ତି। ୪ ଉଇକେଟ ହାତରେ ଥାଇ ବାଂଲାଦେଶ ଆହୁରି ୮୯ ରନ ପଛରେ ରହିଛି।
ଶୁକ୍ରବାର ପ୍ରଥମ ଦିବସ ଶେଷସୁଦ୍ଧା ଭାରତ ୩ ଉଇକେଟ ହରାଇ ୧୭୪ ରନ୍ କରିଥିଲା। କୋହଲି ୫୯ ଓ ଅଜିଙ୍କ୍ୟ ରାହାନେ ୨୩ ରନ୍ରେ ଅପରାଜିତ ଥିଲେ। ଦ୍ୱିତୀୟ ଦିବସରେ ଏହି ଦୁଇ ବ୍ୟାଟ୍ସମ୍ୟାନ ଭଲ ଆରମ୍ଭ କରିଥିଲେ। ରାହାନେ କ୍ୟାରିୟରର ୨୨ତମ ଅର୍ଦ୍ଧଶତକ ହାସଲ କରିଥିବାବେଳେ କୋହଲି ଶତକ ଆଡ଼କୁ ମୁହାଁଇଥିଲେ। ୬୫ ବଲ୍ରୁ ୫୦ ରନ୍ ପୂରଣ କରିଥିବା ରାହାନେ ବ୍ୟତିଗତ ୫୧(୭ ଚୌକା) ରନ୍ କରିଥିବାବେଳେ ତାଇଜୁଲ ଇସ୍ଲାମଙ୍କ ବଲ୍ରେ ଏବାଦତ ହୋସେନଙ୍କୁ କ୍ୟାଚ୍ ଦେଇ ପ୍ୟାଭିଲିୟନ ଫେରିଥିଲେ। ବିରାଟ କିନ୍ତୁ ଥିଲେ ଦୃଢ଼ନିଶ୍ଚିତ। ଆତ୍ମବିଶ୍ୱାସର ସହ ବ୍ୟାଟିଂ ଜାରି ରଖି ସେ ପ୍ରଥମ ସେସନରେ ହିଁ ଶତକ (୧୫୯ ବଲ୍ରୁ ୧୦୦ ରନ୍, ୧୨ ଚୌକା) ପୂରଣ କରିଥିଲେ। ଲଞ୍ଚ୍ ବ୍ରେକ୍ ବେଳକୁ ଭାରତ ୪ ଉଇକେଟ ହରାଇ ୨୮୯ ରନ୍ କରିଥିଲା। ଲଞ୍ଚ୍ ବ୍ରେକ୍ ପରେ ଜାଡେଜା ଆଉ କୌଣସି ରନ୍ ଯୋଗ କରିବା ପୂର୍ବରୁ ଆଉଟ ହୋଇଥିଲେ। ସେ ୧୨ ରନ୍ କରିବାକୁ ସକ୍ଷମ ହୋଇଥିଲେ। ଶତକ ହାସଲ ପରେ କେତେକ ଦର୍ଶନୀୟ ଶଟ୍ ଖେଳିଥିବା ବିରାଟ ବ୍ୟକ୍ତିଗତ ୧୩୬(୧୯୪ ବଲ, ୧୮ ଚୌକା) ରନ୍ କରିଥିବାବେଳେ ଆଉଟ ହୋଇଥିଲେ। ଏବାଦତ୍ ହୋସେନଙ୍କ ବଲ୍ରେ କୋହଲିଙ୍କ ଚିତ୍ତାକର୍ଷକ କ୍ୟାଚ୍ ନେଇଥିଲେ ବଦଳ ଖେଳାଳି ତାଇଜୁଲ ଇସ୍ଲାମ। ଅଧିନାୟକ ଭାବେ ଏହା ଥିଲା କୋହଲିଙ୍କର ୨୦ତମ ଓ ମୋଟ ୨୭ତମ ଶତକ। ଅନ୍ତର୍ଜାତୀୟ କ୍ରିକେଟରେ ଏହା ଥିଲା ତାଙ୍କର ୭୦ତମ ଶତକ। କୋହଲିଙ୍କ ବିଦାୟ ପରେ ଅଭିଜ୍ଞ ରବିଚନ୍ଦ୍ରନ ଅଶ୍ୱିନ, ଉମେଶ ଯାଦବ ଓ ଈଶାନ୍ତ ଶର୍ମା ଶୀଘ୍ର ଆଉଟ ହୋଇଥିଲେ। ଅଶ୍ୱିନ ୯ ରନ୍ କରିଥିବାବେଳେ ଉମେଶ ଓ ଈଶାନ୍ତ ଖାତା ଖୋଲିପାରି ନ ଥିଲେ। ବାଂଲାଦେଶ ପକ୍ଷରୁ ଏବାଦତ୍ ହୋସେନ ଓ ଅଲ୍-ଅମିନ ହୋସେନ ୩ଟି ଲେଖାଏ, ଆବୁ ଜାୟେଦ ୨ଟି ଓ ତାଇଜୁଲ ଇସ୍ଲାମ ଗୋଟିଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ବାଂଲାଦେଶ ପ୍ରଥମ ଇନିଂସ: ୧୦୬।
ଭାରତ ପ୍ରଥମ ଇନିଂସ: ୩୪୭/୯/ଘୋଷଣା (କୋହଲି-୧୩୬, ଚେତେଶ୍ୱର ପୂଜାରା-୫୫, ରାହାନେ-୫୧, ଏବାଦତ୍-୩/୯୧, ଅଲ୍ ଅମିନ-୩/୮୫, ଆବୁ ଜାୟେଦ-୨/୭୭, ତାଇଜୁଲ ଇସ୍ଲାମ-୧/୮୦)। ବାଂଲାଦେଶ ଦ୍ୱିତୀୟ ଇନିଂସ: ୧୫୨/୬(ମୁଶ୍ଫିକର-୫୯, ମହମୁଦୁଲ୍ଲା-୩୯, ଈଶାନ୍ତ-୪/୩୯, ଉମେଶ-୨/୪୦)।
୧
