ଧର୍ମଶାଳା,୧୪।୯: ଏଠାରେ ରବିବାର ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ପ୍ରଥମ ଟି୨୦ ମ୍ୟାଚ୍ ଖେଳାଯିବ। ଏହି ମ୍ୟାଚ୍ରେ ଭାରତୀୟ ଅଧିନାୟକ ବିରାଟ କୋହଲି ଓ ଉପ-ଅଧିନାୟକ ରୋହିତ ଶର୍ମା ବ୍ୟକ୍ତିଗତ ରେକର୍ଡ ଅଧିକାରୀ ହୋଇପାରନ୍ତି। ରୋହିତ ବର୍ତ୍ତମାନ ଟି୨୦ ଫର୍ମାଟରେ ସର୍ବାଧିକ ରନ୍ କରିଥିବା ବ୍ୟାଟ୍ସମ୍ୟାନ। ତାଙ୍କ ପଛକୁ ଦ୍ୱିତୀୟ ସ୍ଥାନରେ ରହିଛନ୍ତି କୋହଲି। ଦୁହିଁଙ୍କ ମଧ୍ୟରେ ୫୩ ରନ୍ର ବ୍ୟବଧାନ ରହିଛି। ରୋହିତ ୮୮ ଇନିଂସରେ ୨୪୨୨ ରନ୍ କରିଥିବାବେଳେ ୬୫ ଇନିଂସରେ କୋହଲି ୨୩୬୯ ରନ୍ କରିଛନ୍ତି। ଏଣୁ ରୋହିତ ଏକ ବଡ଼ ଇନିଂସ ଖେଳି ନିଜର ଅଗ୍ରଣୀ ବ୍ୟବଧାନକୁ ଅଧିକ ଦୂରକୁ ନେବା ପାଇଁ ଲକ୍ଷ୍ୟ ରଖିଛନ୍ତି। ଅନ୍ୟପକ୍ଷରେ କୋହଲି ଏକ ଜବରଦସ୍ତ ଇନିଂସ ଖେଳି ରୋହିତଙ୍କୁ ପଛରେ ପକାଇବାକୁ ଚାହିଁବେ। କେବଳ ଏତିକି ନୁହେଁ ଆଉ ଏକ ତାଲିକାରେ ମଧ୍ୟ ଦୁହେଁ ଆଗପଛ ହୋଇ ରହିଛନ୍ତି। କୋହଲି ଓ ରୋହିତ ଏବେ ଟି୨୦ ଫର୍ମାଟରେ ସବୁଠୁ ଅଧିକ ଅର୍ଦ୍ଧଶତକ ଲଗାଇଥିବା ବ୍ୟାଟ୍ସମ୍ୟାନଙ୍କ ତାଲିକାର ଶୀର୍ଷରେ ରହିଛନ୍ତି। ରୋହିତ ଏପର୍ଯ୍ୟନ୍ତ ୧୭ ଅର୍ଦ୍ଧଶତକ ଓ ୪ ଶତକ ଲଗାଇସାରିଛନ୍ତି। କୋହଲିଙ୍କ ନାମରେ ୨୧ ଅର୍ଦ୍ଧଶତକ ରହିଛି, ଯାହାକି ଟି୨୦ରେ ସବୁଠୁ ଅଧିକ।