ଭୁବନେଶ୍ୱର,୨୦।୪: କରୋନା କଟକଣା ପାଇଁ ଦ୍ୱିତୀୟ ପର୍ଯ୍ୟାୟରେ ମେ’ ୩୦ ପର୍ଯ୍ୟନ୍ତ ଲକ୍ଡାଉନ୍କୁ ବଢ଼ାଇ ଦିଆଯାଇଛି। ତେବେ ଏଥିଯୋଗୁ ଜୀବନଜୀବିକାଠାରୁ ଆରମ୍ଭ କରି ଅର୍ଥନୀତି ଓ ସାମାଜିକ ସ୍ଥିତି ବିଗିଡି ଯାଉଥିବାରୁ ସରକାର ୨୦ ତାରିଖରୁ କଟକ ଓ ଭୁବନେଶ୍ୱରକୁ ଛାଡ଼ି ଅନ୍ୟସବୁ ଅଞ୍ଚଳ ପାଇଁ କେତେକ କ୍ଷେତ୍ରରେ କୋହଳ ଆଭିମୁଖ୍ୟ ଗ୍ରହଣ କରିଛନ୍ତି। ଏନେଇ ରବିବାର ସରକାର ଘୋଷଣା କରିବା ପରେ ଲୋକେ ଆଶ୍ୱସ୍ତ ହୋଇଛନ୍ତି। ତେବେ ଏହାକୁ ସୁଯୋଗ ବୋଲି ଭାବି କେତେକ ଲୋକ ଅନ୍ୟସବୁ କଟକଣା ଓ ନିୟମକୁ ମଧ୍ୟ ଉଲ୍ଲଂଘନ କରିବାର ସମ୍ଭାବନା ରହିଛି। ଫଳରେ ରାଜ୍ୟରେ ନିୟନ୍ତ୍ରଣାଧୀନ ଥିବା କରୋନା ସଂକ୍ରମଣ ପୁଣି ବ୍ୟାପିବାର ଆଶଙ୍କା ଦେଖା ଦେଇଛି। ତେଣୁ କଟକଣା ଯେପରି ଭଙ୍ଗ ନ ହେବ ଓ ବିଶେଷକରି ରାଜ୍ୟ ସୀମା ଉପରେ କଡ଼ା ନଜର ରଖିବାକୁ ମତ ପ୍ରକାଶ ପାଇଛି।
ସୀମାରେ କଟକଣା କଡ଼ା ରହୁ, ପଶି ଆସିପାରନ୍ତି ଆକ୍ରାନ୍ତ
ଆଗାମୀ ଦିନରେ ଆର୍ଥିକ ମାନ୍ଦାବସ୍ଥା ଦୂର ପାଇଁ ଲକ୍ଡାଉନ୍କୁ କିଭଳି ଯଥାଶୀଘ୍ର ଉଠାଯାଇପାରିବ ତାହା ଉପରେ ଗୁରୁତ୍ୱ ଦିଆଯିବା ଉଚିତ୍। ଓଡ଼ିଶା ଧୀରେ ଧୀରେ ଭଲ ସ୍ଥିତି ଆଡକୁ ଗତି କରୁଛି। ମାତ୍ର ପଡ଼ୋଶୀ ପଶ୍ଚିମବଙ୍ଗର ଅବସ୍ଥା ବହୁତ ଖରାପ। ସେଠାରୁ ବହୁ ସଂକ୍ରମିତ ବ୍ୟକ୍ତି ଲକ୍ଡାଉନ୍ ଉଠିବା ପରେ ଓଡ଼ିଶା ଆସିବାର ସମ୍ଭାବନା ରହିଛି। ଆମ୍ବୁଲାନ୍ସ ଓ ଅତ୍ୟାବଶ୍ୟକ ସାମଗ୍ରୀ ପରିବହନ ହେଉଥିବା ଗାଡ଼ିରେ ସଂକ୍ରମିତ ଓଡ଼ିଶା ଆସିଥିବା ନଜିର ରହିଛି। ଯଦି ଏବେଠାରୁ ଓଡ଼ିଶା-ପଶ୍ଚିମବଙ୍ଗ ସୀମା ଉପରେ ଗୁରୁତ୍ୱ ଦିଆ ନ ଯାଏ ତେବେ ଓଡ଼ିଶା ସରକାରଙ୍କ ସବୁ କଷ୍ଟ ଶୁଖୁଆ ଝୋଳରେ ଚାଲିଯିବା ଭଳି ହେବ।
– ପ୍ରଭୁ ପ୍ରସାଦ ମିଶ୍ର
ଭାରତ ପ୍ରଥମରୁ ଭୁଲ୍ କରିଥିଲା
କେବଳ ଏବେ ନୁହେଁ, ଲକ୍ଡାଉନ୍ ଉଠିବା ପରେ ପୁଣିଥରେ କରୋନା ବ୍ୟାପିବନି ବୋଲି କହିହେଉନି। ତେଣୁ ସ୍ଥିତି ଉପରେ କଡ଼ା ନଜର ରଖିବା ଉଚିତ୍। ରାଜ୍ୟ ଓ ଦେଶ ସୀମାକୁ ସିଲ୍ କରି ରଖିବା ସବୁଠାରୁ ଅଧିକ ଗୁରୁତ୍ୱପୁର୍ଣ୍ଣ। ଭାରତ ଏହି ଭୁଲ୍ ପ୍ରଥମରୁ କରିଥିଲା ବୋଲି ଆଜି ଏଭଳି ଦୁର୍ଦ୍ଦଶା ହୋଇଛି। ଅନେକ ରାଷ୍ଟ୍ର ଲକ୍ଡାଉନ୍ ନ କରି କେବଳ ବର୍ଡର ସିଲ୍ କରି ପରିସ୍ଥିତିକୁ ଆୟତ କରିପାରିଛନ୍ତି। ଏହାବ୍ୟତୀତ ଚୀନ୍ ଭଳି ବାହାରୁ ଆସୁଥିବା ଲୋକଙ୍କୁ ବାଧ୍ୟତାମୂଳକ ଭାବେ କ୍ୱାରାଣ୍ଟାଇନ୍ରେ ରଖିବା ଉଚିତ୍।
– ସୁଶୀଲ ପାଣିଗ୍ରାହୀ
ସ୍ବାଗତଯୋଗ୍ୟ, କିନ୍ତୁ ବିପଜ୍ଜନକ
ମେ’ ୩ ପୂର୍ବରୁ କଟକଣାରେ କୋହଳ ଆଣିବା ଯେତିକି ସ୍ବାଗତଯୋଗ୍ୟ ସେତିକି ବିପଦଜନକ। ଯଦି ଲୋକ ଠିକ୍ଭାବେ ନିୟମ ପାଳନ ନ କରନ୍ତି ତା’ ହଲେ ପରିସ୍ଥିତି ଅଣାୟତ ହୋଇଯିବ। ଯେତିକି ସୁଧାର ଆସିଛି, ଅଧିକ ବିଗିଡ଼ି ଯିବ। ତେଣୁ ପୋଲିସ ଓ ପ୍ରଶାସନ ପରିସ୍ଥିତିକୁ ଗମ୍ଭୀରତାର ସହ ଗ୍ରହଣ କରିବା ଉଚିତ୍। ସବୁସ୍ଥାନରେ ଯେପରି ସାମାଜିକ ଦୂରତା ରକ୍ଷା କରାଯାଏ ତାହା ଉପରେ ନଜର ରଖିବା ଉଚିତ୍।
– ଶରତ ଚନ୍ଦ୍ର ସେଠୀ
ଦ୍ୱୈତନଗରୀରେ କଟକଣା ରହିବା ଭଲ ନିଷ୍ପତ୍ତି
ଯେତେବେଳେ ପରିସ୍ଥିତି ଠିକ୍ ହେବ, ସେତେବେଳେ ଖୁସି ହେବା ଯଥାର୍ଥ। ତେବେ କଟକ, ଭୁବନେଶ୍ୱରରେ କଟକଣାକୁ କଡ଼ାକଡ଼ା ରଖାଯିବା ଏକ ଭଲ ନିଷ୍ପତ୍ତି। ଭୁବନେଶ୍ୱର ହଟ୍ସ୍ପଟ୍ ହୋଇଥିବାରୁ ଏହାକୁ ସିଲ୍ କରି ରଖିବାର ଆବଶ୍ୟକତା ରହିଛି। ହେଲେ ଯେଉଁ ସ୍ଥାନରେ ଲକ୍ଡାଉନକୁ ସାମାନ୍ୟ କୋହଳ କରାଯାଇଛି ସେଠାକାର ଲୋକେ ସଚେତନ ହେବା ଆବଶ୍ୟକ। ସାମାନ୍ୟ ଭୁଲ୍ ହେଲେ ପୁଣିଥରେ ସ୍ଥିତି ବିଗିଡିଯିବ। ଲୋକ ସଚେତନ ରହିଲେ ଏହି ମହାମାରୀକୁ ମାତ୍ ଦେଇପାରିବା। ( ପ୍ରତିଭା ବର୍ମା ମହାପାତ୍ର)
ସସ୍ମିତା ପାଇକରାୟ