ପୁରୀ ଅଫିସ,୧୮ା୫: କ୍ବାରାଣ୍ଟାଇନରେ ରହିଲେ କୁମ୍ଭାରପଡ଼ା ଥାନାର ସମସ୍ତ କର୍ମଚାରୀ। ଜଣେ କରୋନା ଆକ୍ରାନ୍ତ ଗିରଫ ଅଭିଯୁକ୍ତଙ୍କ ସଂସ୍ପର୍ଶରେ ଆସିଥିବାରୁ ଏହି ଥାନାର ଆଇଆଇସିଙ୍କ ସମେତ ପ୍ରାୟ ୩୦ କର୍ମଚାରୀଙ୍କୁ ବିଭାଗୀୟ ଅଧିକାରୀଙ୍କ ନିର୍ଦ୍ଦେଶ ମୁତାବକ ସରକାରୀ କ୍ବାରାଣ୍ଟାଇନ ସେଣ୍ଟରରେ ରହିବାକୁ ପଡ଼ିଛି। ପ୍ରଶାସନ ପକ୍ଷରୁ ରବିବାର ସନ୍ଧ୍ୟାରେ ଥାନାକୁ ବିଶୋଧନ କରାଯାଇଥିବାବେଳେ ସୋମବାର ସମସ୍ତ କର୍ମଚାରୀଙ୍କ ସ୍ବାବ୍ ନମୁନା ସଂଗ୍ରହ ହେବ ବୋଲି ସୂଚନା ମିଳିଛି।
ସୂଚନା ଅନୁଯାୟୀ, ଏକ ଚୋରି କେସ୍ରେ କୁମ୍ଭାରପଡ଼ା ପୋଲିସ ୩/୪ ଦିନ ତଳେ ଜଣେ ଅଭିଯୁକ୍ତଙ୍କୁ ଗିରଫ କରିଥିଲା। ତାଙ୍କର କୋଭିଡ୍ ଟେଷ୍ଟ ପାଇଁ ସ୍ବାବ୍ ସଂଗ୍ରହ କରାଯାଇଥିଲା। ରବିବାର ସମ୍ପୃକ୍ତ ଅଭିଯୁକ୍ତଙ୍କ ରିପୋର୍ଟ ପଜିଟିଭ ବାହାରିଥିବା ନେଇ ବିଭାଗୀୟ ଅଧିକାରୀଙ୍କୁ ସୂଚନା ମିଳିବା ପରେ ଥାନା କର୍ମଚାରୀଙ୍କ ମଧ୍ୟରେ ଛନକା ପଶିଥିଲା। ଅନ୍ୟପକ୍ଷରେ ରବିବାର ଅପରାହ୍ନ ସୁଦ୍ଧା ପୁରୀ ଜିଲାରୁ ବାହାରିଥିବା ୭ ପଜିଟିଭଙ୍କ ମଧ୍ୟରେ ସମ୍ପୃକ୍ତ ଅଭିଯୁକ୍ତଙ୍କ ନାମ ନ ଥିବା କୁହାଯାଉଛି। ତେବେ ରାତିରେ ଆଉ ୪ଜଣଙ୍କ କରୋନା ପିଜିଟିଭ ମିଳିଛି। କିନ୍ତୁ ପୋଲିସ ଏବଂ ଜିଲା ପ୍ରଶାସନର ତତ୍ପରତା ଏବଂ ବିଭାଗୀୟ ଅଧିକାରୀଙ୍କ ନିର୍ଦ୍ଦେଶ କ୍ରମେ ଥାନା କର୍ମଚାରୀମାନେ କ୍ବାରାଣ୍ଟାଇନରେ ଯିବା ଏହାର ସତ୍ୟତାକୁ ସ୍ପଷ୍ଟ କରିଛି। ସନ୍ଧ୍ୟାରେ ଅଗ୍ନିଶମ ବାହିନୀର କର୍ମଚାରୀମାନେ ଥାନାକୁ ସମ୍ପୂର୍ଣ୍ଣ ଭାବେ ସାନିଟାଇଜ କରିଥିବାବେଳେ ଥାନା ଖାଲି ରହିଛି। ଏ ସମ୍ପର୍କରେ ଏସ୍ପି ଉମାଶଙ୍କର ଦାଶ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ସବୁ ପୋଲିସଙ୍କୁ କ୍ବାରାଣ୍ଟାଇନରେ ରଖାଯାଇ ନାହିଁ। ସମ୍ପୃକ୍ତ ଅଭିଯୁକ୍ତଙ୍କ ରିପୋର୍ଟ ପଜିଟିଭ ବାହାରିବା ପରେ ତାଙ୍କ କଣ୍ଟାକ୍ଟରେ ଆସିଥିବା ଲୋକମାନଙ୍କୁ ଟ୍ରେସିଂ କରାଯାଉଛି। ତାଙ୍କ ସଂସ୍ପର୍ଶରେ ଆସିଥିବା ପୋଲିସ କର୍ମଚାରୀମାନଙ୍କୁ ଅସ୍ଥାୟୀ ଭାବେ ଗୋଟିଏ ଜାଗାରେ ରଖାଯାଇଛି। ସେମାନଙ୍କର ସ୍ବାବ ସଂଗ୍ରହ କରାଯିବ।