ନୟାଗଡ଼ ଅଫିସ,୧୦ା୧୧- ନୟାଗଡ଼ ଜିଲା ଗଣିଆ ତହସିଲ ଅନ୍ତର୍ଗତ ଖଲିସିରା ଗ୍ରାମର ନୂଆତଇଲାଠାରେ ଏକ ବେଆଇନ କ୍ରଶର ଯୋଗୁ ଜଣେ ବ୍ୟକ୍ତିଙ୍କ ଜମି ନଷ୍ଟ ହେଉଛି। ଏ ନେଇ ବ୍ୟକ୍ତି ଜଣଙ୍କ ତହସିଲଦାରଙ୍କଠାରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିପାରି ନାହିଁ। ଫଳରେ ସେ ଏ ନେଇ ଜିଲାପାଳଙ୍କଠାରେ ଅଭିଯୋଗ କରିଛନ୍ତି।
ବ୍ଲକ ଓସ୍ତିଆ ଗ୍ରାମର ସୁଲୋଚନା ମୁଦୁଲିଙ୍କ ଅଭିଯୋଗ ଅନୁଯାୟୀ, ନୂଆତଇଲା ନିକଟରେ ତାଙ୍କର ଏକ ଚାଷ ଜମି ରହିଛି। ଉକ୍ତ ଜମିରେ ଚାଷ୍କରି ପରିବାର ପ୍ରତିପୋଷଣ କରନ୍ତି। ହେଲେ କିଛି ବର୍ଷ ହେଲାଣି ସେଠାରେ ୩ ଜଣ ବ୍ୟକ୍ତି ବେଆଇନ ଭାବେ କ୍ରଶର କରି ପଥର ଫଟାଉଛନ୍ତି। ପଥର ଫାଟି ଜମିରେ ପଡ଼ିବା ଦ୍ୱାରା ଜମିର ଉର୍ବରତା ନଷ୍ଟ ହୋଇ ଫସଲ ହେଉ ନ ଥିବା ସେ କହିଛନ୍ତି। ତେଣୁ ଏହାର ସମାଧାନ ପାଇଁ ସେ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ଏ ସମ୍ପର୍କରେ ଗଣିଆ ତହସିଲଦାର ମିତାଲି ପାତ୍ରଙ୍କୁ ପଚାରିବାରେ ସେ କହିଥିଲେ ଏ ଦିଗରେ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇ ଦିଆଯାଇଛି। ତୁରନ୍ତ ଏ ନେଇ କାର୍ଯ୍ୟାନୁଷ୍ଠାନ ନିଆଯିବ ।