ମୁମ୍ବାଇ,୭ା୩(ପି.ଟି.)- ପୂର୍ବତନ ଭାରତୀୟ ଓପନର ଓ୍ବାସିମ ଜାଫର ଶନିବାର କ୍ରିକେଟ୍ର ସମସ୍ତ ଫର୍ମାଟ୍ରୁ ଅବସର ଘୋଷଣା କରିଛନ୍ତି। ଏଥିସହ ଏକ ଯୁଗର ଅବସାନ ଘଟିଛି। ୪୨ ବର୍ଷୀୟ ଜାଫର ଅନ୍ତର୍ଜାତୀୟ ସ୍ତରରେ ଭାରତ ପାଇଁ ୩୧ ଟେଷ୍ଟରେ ପ୍ରତିନିଧିତ୍ୱ କରି ୩୪.୧୧ ହାରରେ ୧,୯୪୪ ରନ୍ କରିଥିଲେ। ଛୋଟିଆ କ୍ୟାରିୟରରେ ୫ ଶତକ ଓ ୧୧ ଅର୍ଦ୍ଧଶତକ ରହିଛି। ତାଙ୍କର ସର୍ବାଧିକ ବ୍ୟକ୍ତିଗତ ସ୍କୋର ହେଉଛି ୨୧୨। ପ୍ରଥମତଃ ମୁଁ ସବୁକିଛି ପାଇଁ ଭଗବାନଙ୍କୁ ଧନ୍ୟବାଦ ଦେଉଛି। ଭଗବାନ ମୋତେ ଏହି କ୍ରୀଡ଼ାରେ ଖେଳିବା ଲାଗି ପ୍ରତିଭା ଦେଇଥିଲେ। କ୍ରିକେଟ କ୍ୟାରିୟର ଜାରି ରଖିବାକୁ ପରିବାର ବର୍ଗ ମୋତେ ଉତ୍ସାହିତ କରିଥିଲେ। ମୋର ସମସ୍ତ କୋଚ୍ଙ୍କୁ ଅନେକ ଅନେକ ଧନ୍ୟବାଦ୍। ସ୍କୁଲବେଳେ କୋଚ୍ ମୋ ପ୍ରତିଭାକୁ ଚିହ୍ନଟ କରି ଅଧିକ ତୀକ୍ଷ୍ଣ କରିଥିଲେ। ମୋ ଉପରେ ବିଶ୍ୱାସ ଦେଖାଇଥିବାରୁ ଚୟନକର୍ତ୍ତାଙ୍କ ନିକଟରେ ମୁଁ କୃତଜ୍ଞ ବୋଲି ରଣଜୀ ଟ୍ରଫି ଇତିହାସର ସର୍ବାଧିକ ରନ୍ କରିଥିବା ଜାଫର କହିଛନ୍ତି। ସେ ଦେଶର ପ୍ରଥମ ବ୍ୟାଟ୍ସମ୍ୟାନ ଭାବେ ରଣଜୀ ଟୁର୍ନାମେଣ୍ଟରେ ୧୨ ହଜାର ରନ୍ କରିଛନ୍ତି। ସର୍ବାଧିକ ୧୫୦ ରଣଜୀ ମ୍ୟାଚ୍ ଖେଳିବାର ରେକର୍ଡ ମଧ୍ୟ ତାଙ୍କ ନାମରେ ରହିଛି। ଓ୍ବେଷ୍ଟଇଣ୍ଡିଜରେ ଦ୍ୱିଶତକ ହାସଲ କରିଥିବା ଅଳ୍ପ ଭାରତୀୟ ବ୍ୟାଟ୍ସମ୍ୟାନଙ୍କ ମଧ୍ୟରେ ଜାଫର ଅନ୍ୟତମ। ସେ ସେଣ୍ଟ ଲୁସିଆଠାରେ ୨୧୨ ରନ୍ର ଇନିଂସ ଖେଳିଥିଲେ। ସେ କ୍ୟାରିୟରରେ ପ୍ରାୟତଃ ମୁମ୍ବାଇ ପାଇଁ ଖେଳିଥିଲେ। ଗତ ତିନି ସିଜନ ହେଲା ସେ ବିଦର୍ଭ ପାଇଁ ଖେଳୁଥିଲେ। ତାଙ୍କ ପ୍ରତିନିଧିତ୍ୱରେ ବିଦର୍ଭ କ୍ରମାଗତ ଦୁଇ ଥର ରଣଜୀ ଚାମ୍ପିୟନ ହୋଇଥିଲା। ଷ୍ଟାଇଲିଶ ଶଟ୍ ଲାଗି ଜଣାଶୁଣା ଜାଫରଙ୍କ କଭର ଡ୍ରାଇଭ ସ୍ବତନ୍ତ୍ର ଥିଲା। ୧୯୯୬-୯୭ ସିଜନରେ ଜାଫର ପ୍ରଥମ ଶ୍ରେଣୀ ପଦାର୍ପଣ କରିଥିଲେ। ସେ ୨୬୦ ମ୍ୟାଚ୍ରେ ୧୯,୪୧୦ ରନ୍ କରିଥିଲେ।