ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ବିସିସିଆଇ ଅଧ୍ୟକ୍ଷ ହେବା ନିଶ୍ଚିତ ହୋଇଛି। ଜଣେ କ୍ରିକେଟରରୁ ଏହି ହାଇପ୍ରୋଫାଇଲ ପଦ ପର୍ଯ୍ୟନ୍ତ ତାଙ୍କର ଯାତ୍ରା ବେଶ୍ ସଂଘର୍ଷପୂର୍ଣ୍ଣ…
ବିଶ୍ୱ କ୍ରିକେଟରେ ସୌରଭ ଗାଙ୍ଗୁଲିଙ୍କ ପରିଚୟ ଦେବାର କୌଣସି ଆବଶ୍ୟକତା ନାହିଁ। ଭାରତୀୟ କ୍ରିକେଟକୁ ନୂଆ ପରିଚୟ ଦେଇଥିବା ପୂର୍ବତନ ଅଧିନାୟକ ଗାଙ୍ଗୁଲିଙ୍କୁ ଏବେ ନୂଆ ଭୂମିକାରେ ଦେଖବାକୁ ମିଳିବ। ଯଦିଓ ସେ କ୍ରିକେଟ ପ୍ରଶାସନରେ ବହୁଦିନ ହେବ କାର୍ଯ୍ୟ କରିଛନ୍ତି ସେ ବିଶ୍ୱର ସବୁଠାରୁ ଧନୀ କ୍ରିକେଟ ବୋର୍ଡ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ନୂଆ ଅଧ୍ୟକ୍ଷ ରୂପେ ଦାୟିତ୍ୱ ସମ୍ଭାଳିବେ। ଜଣେ ଅଲରାଉଣ୍ଡର ଭାବେ ଭାରତୀୟ ଦଳରେ ସ୍ଥାନ ହାସଲ କରିଥିବା ଗାଙ୍ଗୁଲି ପରେ ଅଧିନାୟକ ନିଯୁକ୍ତ ହୋଇଥିଲେ। ଏବେ ସେ ବିସିସିଆଇର ଅଧ୍ୟକ୍ଷ ହେବାକୁ ଯାଉଛନ୍ତି। କେବଳ ଏ ନେଇ ଓପଚାରିକତା ବାକି ରହିଛି। ତେବେ ଜଣେ କ୍ରିକେଟରରୁ ବିସିସିଆଇ ଅଧ୍ୟକ୍ଷ ପଦକୁ ନିର୍ବାଚିତ ହେବାର ଦୀର୍ଘ ଯାତ୍ରା ତାଙ୍କ ପାଇଁ ଆଦୌ ସହଜ ନ ଥିଲା। ଏହା ବେଶ୍ କଣ୍ଟକିତ ଓ ଚ୍ୟାଲେଞ୍ଜ ପୂର୍ଣ୍ଣ ଥିଲା। ୧୯୯୨ରେ ଗାଙ୍ଗୁଲି ଓ୍ବେଷ୍ଟଇଣ୍ଡିଜ ବିପକ୍ଷରୁ ନିଜର ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ। ପ୍ରଥମ ମ୍ୟାଚ୍ରେ ୩ ରନ କରି ଆଉଟ ହୋଇଥିଲେ। ଫଳରେ ତାଙ୍କୁ ଟିମ୍ରୁ ବାହାର କରିଦିଆଯାଇଥିଲା। ଏହାପରେ ଆଗାମୀ ୪ ବର୍ଷ ତାଙ୍କୁ ଟିମ୍ରୁ ବାହାରେ ରଖାଗଲା। ଏହାପରେ ୧୯୯୬ରେ ଇଂଲଣ୍ଡ ବିପକ୍ଷ ଦିନିକିଆ ସିରିଜରେ ସେ ପ୍ରତ୍ୟାବର୍ତ୍ତନ କରିଥିଲେ। ଏହା ପରେ ସେ ଧୀରେ ଧୀରେ ଦଳରେ ନିଜର ସ୍ଥାନ ପକ୍କା କରିଥିଲେ।
ପ୍ରତିକୂଳ ପରିସ୍ଥିତିରେ ନେତୃତ୍ୱ: ଯେତେବେଳେ କଷ୍ଟକର ପରିସ୍ଥିତି ଦେଇ ଭାରତୀୟ ଦଳ ଗତି କରୁଥିଲା ସେତେବେଳେ ଗାଙ୍ଗୁଲିଙ୍କୁ ନେତୃତ୍ୱ ପ୍ରଦାନ କରାଯାଇଥିଲା। କ୍ରିକେଟରେ ମ୍ୟାଚ୍ ଫିକ୍ସିଂର କଳା ବାଦଲର ଛାୟା ରହିଥିବାବେଳେ ଭଦ୍ରଲୋକଙ୍କ ଏହି ଖେଳ ବେଶ୍ ବିବାଦରେ ଫସିଯାଇଥିଲା। ପୂର୍ବତନ ଅଧିନାୟକ ମହମ୍ମଦ ଆଝାରୁଦ୍ଦିନଙ୍କ ସ୍ଥାନରେ ଗାଙ୍ଗୁଲିଙ୍କୁ ନେତୃତ୍ୱ ଦିଆଯାଇଥିଲା। ଏହାପରେ ଗାଙ୍ଗୁଲି ପଛକୁ ଫେରି ଚାହିଁ ନ ଥିଲେ ଓ ସାରା ବିଶ୍ୱ ନେତୃତ୍ୱର ଏକ ନୂଆ ଉଦାହରଣ ଦେଖିବାକୁ ପାଇଥିଲା। ୧୯୯୯ରୁ ୨୦୦୫ ପର୍ଯ୍ୟନ୍ତ ଗାଙ୍ଗୁଲି ଭାରତର ନେତୃତ୍ୱ ନେଇଥିଲେ। ସେ ୪୯ଟି ଟେଷ୍ଟ ଓ ୧୪୬ଟି ଦିନିକିଆ ନେତୃତ୍ୱ ନେଇଥିଲେ। ତାଙ୍କ ନେତୃତ୍ୱରେ ଭାରତ ୭୬ଟି ଦିନିକିଆ ଓ ୨୧ଟି ଟେଷ୍ଟରେ ବିଜୟୀ ହୋଇଥିଲା।
ଚାପେଲ ବିବାଦ: କୋଚ୍ ଗ୍ରେଗ୍ ଚାପେଲଙ୍କ ସହ ହୋଇଥିବା ବିବାଦ ଗାଙ୍ଗୁଲିଙ୍କ କ୍ୟାରିୟରର ଅନ୍ୟତମ ଅଧ୍ୟାୟ। ଏହା ସର୍ବ ସାଧାରଣରେ ବେଶ୍ ଚର୍ଚ୍ଚିତ ଘଟଣା ଥିଲା। ପୂର୍ବତନ ଅଷ୍ଟ୍ରେଲିଆ ଅଧିନାୟକ ଗ୍ରେଗ୍ ଚାପେଲଙ୍କୁ କୋଚ୍ ନିଯୁକ୍ତ କରିବାକୁ ଗାଙ୍ଗୁଲି ପ୍ରସ୍ତାବ ଦେଇଥିଲେ। ଚାପେଲ କୋଚ୍ ନିଯୁକ୍ତ ହେବା ପରେ ଗାଙ୍ଗୁଲିଙ୍କ ସହ ତାଙ୍କର ମତପାର୍ଥକ୍ୟ ହୋଇଥିଲା। ଏହା ନେଇ ବିବାଦ ଏତେ ଉତ୍କଟ ହୋଇଥିଲା ଯେ, ଶେଷରେ ଗାଙ୍ଗୁଲିଙ୍କୁ ଅଧିନାୟକ ପଦ ଛାଡିବାକୁ ପଡିଥିଲା। କଥା ସେତିକିରେ ରହି ନ ଥିଲା। ତାଙ୍କୁ ଦଳରୁ ମଧ୍ୟ ବାହାରିବାକୁ ପଡିଥିଲା। ଏହା ପରେ ଗାଙ୍ଗୁଲି ଦଳକୁ ଫେରିଥିଲେ ମଧ୍ୟ ପୂର୍ବ ଚମକ ନ ଥିଲା। ଶେଷରେ ଗାଙ୍ଗୁଲିଙ୍କ କ୍ୟାରିୟର ଅନ୍ତ ହୋଇଥିଲା।