ମୁମ୍ବାଇ, ୨୩।୧୦ (ପି.ଟି.)- ମୁମ୍ବାଇ ଦଳର ଭେଟେରାନ ଅଲ୍ରାଉଣ୍ଡର ଅଭିଷେକ ନାୟାର ବୁଧବାର କ୍ରିକେଟ୍ର ସମସ୍ତ ପ୍ରକାର ଫର୍ମାଟ୍ରୁ ଅବସର ଘୋଷଣା କରିଛନ୍ତି। ୩୬ ବର୍ଷୀୟ ଏହି ବାମହାତୀ ବ୍ୟାଟ୍ସମ୍ୟାନ ଓ ଡାହାଣହାତୀ ମଧ୍ୟଗତିର ବୋଲର ଭାରତ ପକ୍ଷରୁ ମଧ୍ୟ ୩ଟି ଏକଦିବସୀୟ ମ୍ୟାଚ୍ ଖେଳିବାର ସୌଭାଗ୍ୟ ଲାଭ କରିଥିଲେ। ୨୦୦୯ରେ ଓ୍ବେଷ୍ଟଇଣ୍ଡିଜ ସିରିଜରେ ସେ ପଦାର୍ପଣ କରିଥିଲେ ମଧ୍ୟ ଏହାପରେ ତାଙ୍କୁ ଆଉ ଜାତୀୟ ଦଳରେ ସୁଯୋଗ ମିଳି ନ ଥିଲା। ତେବେ ଘରୋଇ କ୍ରିକେଟ୍ରେ ସେ ବେଶ୍ ସଫଳତା ପାଇଥିଲେ। ମୁମ୍ବାଇର ସଙ୍କଟମୋଚନ ଭାବେ ପରିଚିତ ନାୟାର ୧୦୩ ପ୍ରଥମ ଶ୍ରେଣୀ ମ୍ୟାଚ୍ରୁ ୧୩ ଶତକ ସହାୟତାରେ ୫୭୪୯ ରନ ଓ ବୋଲିଂରେ ୧୭୩ ଉଇକେଟ୍ ଅକ୍ତିଆର କରିଛନ୍ତି। ୨୫୯ ତାଙ୍କ ଶ୍ରେଷ୍ଠ ସ୍କୋର ରହିଥିଲା। ସେହିଭଳି ସେ ୯୯ ଲିଷ୍ଟ-ଏ ଓ ୯୫ ଟି୨୦ ମ୍ୟାଚ୍ରେ ମୁମ୍ବାଇ ପକ୍ଷରୁ ପ୍ରତିନିଧିତ୍ୱ କରିଛନ୍ତି। ଲିଷ୍ଟ-ଏ’ରେ ୨୧୪୫ ଓ ଟି୨୦ରେ ୧୨୯୧ ରନ ସଂଗ୍ରହ କରିଥିବାବେଳେ ବୋଲିଂରେ ଯଥାକ୍ରମେ ୭୯ ଓ ୨୭ ଉଇକେଟ୍ ନେଇଛନ୍ତି। ସ୍ମରଣୀୟ କ୍ୟାରିୟରରେ ନାୟାର ବିପଦ ସମୟରେ ମୁମ୍ବାଇକୁ ଅନେକ ମ୍ୟାଚ୍ରେ ଉଦ୍ଧାର କରିଛନ୍ତି।
