ମେଲବୋର୍ନ, ୪ା୫ (ପି.ଟି.): କୋଭିଡ୍-୧୯ ଯୋଗୁ ଯଦି ଭାରତ ଟୁର୍ରେ ନ ଆସେ ତେବେ କ୍ରିକେଟ ଅଷ୍ଟ୍ରେଲିଆକୁ ବିପୁଳ ଆର୍ଥିକ କ୍ଷତି ସହିବାକୁ ପଡ଼ିବ। ଏଥିପାଇଁ ଆଗୁଆ ବିକଳ୍ପ ବ୍ୟବସ୍ଥା ସ୍ବରୂପ କ୍ରିକେଟ ଅଷ୍ଟ୍ରେଲିଆ କମନଓ୍ବେଲ୍ଥ ବ୍ୟାଙ୍କ୍ରୁ ୫୦ ନିୟୁତ ଡଲାର ଋଣନେଇଛି। କ୍ରିକେଟ ଅଷ୍ଟ୍ରେଲିଆ ଏବେ ଆର୍ଥିକ ସଂକଟ ଦେଇ ଗତି କରୁଥିବାରୁ ଏହାର ଗଭର୍ନିଂବଡି ଗତ ମାସରେ କର୍ମଚାରୀ ସଂଖ୍ୟା ୮୦ ପ୍ରତିଶତ ହ୍ରାସ କରିବା ଲାଗି ନିଷ୍ପତ୍ତି ନେଇଛି। ଏଥିସହିତ ଜୁନ୍ ଶେଷ ଭାଗ ପର୍ଯ୍ୟନ୍ତ କର୍ମଚାରୀଙ୍କ ୨୦ ପ୍ରତିଶତ ବେତନ କାଟ୍ କରାଯାଇଛି। ଏହି ପଦକ୍ଷେପ ଗ୍ରହଣ କରାଯାଇ ନ ଥିଲେ ହୁଏତ ଅଗଷ୍ଟ ବେଳକୁ କ୍ରିକେଟ ଅଷ୍ଟ୍ରେଲିଆର ହାତଶୂନ୍ୟ ହୋଇଯାଇଥାନ୍ତା ବୋଲି ମୁଖ୍ୟ କାର୍ଯ୍ୟନିର୍ବାହୀ କେଭିନ୍ ରବଟର୍ସ ପ୍ରକାଶ କରିଛନ୍ତି। ଏହି ନିଷ୍ପତ୍ତି ଯୋଗୁ କ୍ରିକେଟ ଅଷ୍ଟ୍ରେଲିଆ ୩ ନିୟୁତ ଆମେରିକୀୟ ଡଲାର ବଞ୍ଚାଇ ପାରିଛି। ଗଭର୍ନିଂବଡି ବର୍ତ୍ତମାନ ୫୦ ନିୟୁତ ଡଲାର ଋଣ କରିଛି। ତାହା କିପରି ଶୁଝାଯିବ ଏକ ବଡ଼ ପ୍ରଶ୍ନ। ରବଟର୍ସ ନିଜେ ତାଙ୍କ ବେତନର ୮୦ ପ୍ରତିଶତ ପାଉଛନ୍ତି। ରାଜ୍ୟ ଆସୋସିଏଶନଗୁଡ଼ିକର ଗ୍ରାଣ୍ଟ୍ ୨୫ ପ୍ରତିଶତ ହ୍ରାସ କରିବା ଲାଗି ସେ ବିଚାର କରୁଥିବା ଏକ ରିପୋର୍ଟରେ ପ୍ରକାଶ ପାଇଛି। କରୋନା ମହାମାରୀ ଯୋଗୁ କ୍ରିକେଟ ଅଷ୍ଟ୍ରେଲିଆ ଇତିମଧ୍ୟରେ ୩୦୦ ନିୟୁତ ଅଷ୍ଟ୍ରେଲୀୟ ଡଲାର ହରାଇ ସାରିଲାଣି। ଡିସେମ୍ବର-ଜାନୁୟାରୀରେ ଯଦି ଭାରତ ବିପକ୍ଷ ୪ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳାଯାଏ ତା’ହେଲେ ଆର୍ଥିକ ସଂକଟରୁ ମୁକ୍ତି ପାଇବା ପାଇଁ ସଂଘର୍ଷ ଚଳାଇଥିବା କ୍ରିକେଟ ଅଷ୍ଟ୍ରେଲିଆକୁ ଆଶ୍ୱସ୍ତି ମିଳି ପାରନ୍ତା। ଅଷ୍ଟ୍ରେଲିଆନ କ୍ରିକେଟର୍ସ ଆସୋସିଏଶନ ବୋର୍ଡର ସଭାପତି ଥିବା ପୂର୍ବତନ ଟେଷ୍ଟ ଅଲ୍ରାଉଣ୍ଡର ଶେନ୍ ଓ୍ବାଟ୍ସନ ଆସନ୍ତା ସପ୍ତାହରେ ଏକ ବୈଠକ ଡକାଇଛନ୍ତି। କ୍ରିକେଟ ଅଷ୍ଟ୍ରେଲିଆର ଆର୍ଥିକ ଅବସ୍ଥା ସ୍ବାଭାବିକ କରିବା କ୍ଷେତ୍ରରେ କ’ଣ କରାଯାଇ ପାରେ ସେ ନେଇ ଆଲୋଚନା ହେବ।