ମେଲବୋର୍ନ, ୧୬ା୬ (ପି.ଟି.)-କ୍ରିକେଟ ଅଷ୍ଟ୍ରେଲିଆ (ସିଏ)ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) କେଭିନ ରବଟର୍ସ ମଙ୍ଗଳବାର ତାଙ୍କ ପଦବୀରୁ ଇସ୍ତଫା ଦେଇଛନ୍ତି। ତାଙ୍କ ସ୍ଥାନରେ ଆଇସିସି ଟି୨୦ ବିଶ୍ୱକପ୍ ମୁଖ୍ୟ କାର୍ଯ୍ୟନିର୍ବାହୀ ନିକ୍ ହକ୍ଲେ କାମଚଳା ଦାୟିତ୍ୱ ତୁଲାଇବେ। କୋଭିଡ୍-୧୯ ଯୋଗୁ ଅଷ୍ଟ୍ରେଲିଆ କ୍ରିକେଟ ବୋର୍ଡ ଗୁରୁତର ଆର୍ଥିକ ସଙ୍କଟରେ ପଡ଼ିଥିବା ବେଳେ ଏହି ପରିବର୍ତ୍ତନ ଘଟିଛି। ବୋର୍ଡ ରବଟର୍ସଙ୍କ ଇସ୍ତଫା ପତ୍ର ଗ୍ରହଣ କରାଯାଇଛିି ଏବଂ ତାଙ୍କ ସ୍ଥାନରେ ହକ୍ଲେଙ୍କୁ ନିଯୁକ୍ତି ଦିଆଯାଇଥିବା କ୍ରିକେଟ ଅଷ୍ଟ୍ରେଲିଆର ଚେୟାରମ୍ୟାନ ଇଅଲର୍ସ ଏଡିଙ୍ଗ୍ସ ସୂଚନା ଦେଇଛନ୍ତି। ୪୭ ବର୍ଷୀୟ ରବଟର୍ସ ୮ବର୍ଷ ଧରି କ୍ରିକେଟ ଅଷ୍ଟ୍ରେଲିଆ ସହିତ ସମ୍ପୃକ୍ତ ରହି ଆସିଥିଲେ। ପ୍ରଥମେ ସେ ବୋର୍ଡର ଜଣେ ସଦସ୍ୟ ଥିଲେ। ୨୦୧୮ ଅକ୍ଟୋବରରେ ସେ ଜେମ୍ସ ସଦରଲାଣ୍ଡଙ୍କ ସ୍ଥାନରେ ୩ ବର୍ଷ ପାଇଁ ନିଯୁକ୍ତି ପାଇଥିଲେ। ଅଷ୍ଟ୍ରେଲିଆ ବଲ୍ ଟ୍ୟାମ୍ପରିଂ ସ୍କାଣ୍ଡାଲରେ ଛନ୍ଦି ହୋଇଯାଇଥିବାବେଳେ ସେ ଦାୟିତ୍ୱ ଗ୍ରହଣ କରିଥିଲେ।
ମହାମାରୀ ଯୋଗୁ ଅକ୍ଟୋବର-ନଭେମ୍ବରରେ ଦେଶରେ ଟି୨୦ ବିଶ୍ୱକପ୍ ଆୟୋଜନ ନେଇ ଅନିଶ୍ଚିତତା ଦେଖାଦେଇଛି ବୋଲି ରବଟର୍ସ କିଛି ଦି ପୂର୍ବେ କହିଥିଲେ। ତେବେ ଏନେଇ ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ଯାହା ଚୂଡ଼ାନ୍ତ ନିଷ୍ପତ୍ତି ନେବ। ଫେବୃୟାରୀ ଓ ମାର୍ଚ୍ଚରେ ମହିଳା ଟି୨୦ ବିଶ୍ୱକପ୍ର ସଫଳ ଆୟୋଜନ ପଛରେ ଇଂଲଣ୍ଡରେ ଜନ୍ମିତ ହକ୍ଲେଙ୍କ ବିଶେଷ ଭୂମିକା ରହିଛି। ଅଷ୍ଟ୍ରେଲିଆ ମଧ୍ୟ ଏଥିରେ ଚାମ୍ପିୟନ ହୋଇଥିଲା। ମହିଳା ଟି୨୦ ବିଶ୍ୱକପ୍ ପୂର୍ବରୁ ହକ୍ଲେ ୨୦୧୫ରୁ ୨୦୧୭ ପର୍ଯ୍ୟନ୍ତ କ୍ରିକେଟ ଅଷ୍ଟ୍ରେଲିଆ କମର୍ସିଆଲ ପ୍ରୋଜେକ୍ଟ ମୁଖ୍ୟଥିଲେ। ଏହା ପୂର୍ବରୁ ୨୦୧୫ରେ ପୁରୁଷ ଅନ୍ତର୍ଜାତୀୟ ଦିନିକିଆ ବିଶ୍ୱକପ୍ ଏବଂ ଲଣ୍ଡନ ଅଲିମ୍ପିକ୍ସ ଆୟୋଜକ କମିଟିରେ ୬ ବର୍ଷ ଧରି କାର୍ଯ୍ୟ କରିଛନ୍ତି।