ଜୟପୁର,୧୦।୨- ୧୯ ବର୍ଷରୁ କମ୍ ବିଶ୍ୱକପ୍ ଫାଇନାଲରେ ଭାରତୀୟ ଦଳ ପାଇଁ ସଫଳ ପ୍ରଦର୍ଶନ କରିଥିବା ବୋଲର ରବି ବିଷ୍ଣୋଇଙ୍କ ସମ୍ପର୍କରେ କିଛି ରୋଚକ କଥା ଜଣାପଡ଼ିଛି। ୧୬ ବର୍ଷରୁ କମ୍ ବୟସ ବର୍ଗରେ ସେ ଚୟନ ହୋଇ ନ ଥିଲେ। ୧୯ ବର୍ଷରୁ କମ୍ ବର୍ଗର ଟ୍ରାଏଲରେ ମଧ୍ୟ ସେ ଦୁଇ ଥର ବିଫଳ ହୋଇଥିଲେ। ଏହାପରେ ମଧ୍ୟ ସେ ବିଶ୍ୱାସ ହରାଇ ନ ଥିଲେ। ରାଜସ୍ଥାନ ରୟାଲ୍ସ ନେଟ୍ସରେ ବୋଲିଂ କରିବା ପରେ ହିଁ ତାଙ୍କୁ ବିଶେଷ ପରିଚୟ ମିଳିଥିଲା। ୨୦୧୮ର ଘଟଣା। ସେ ରାଜସ୍ଥାନ ରୟାଲ୍ସ ଦଳର ନେଟ୍ସରେ ଅଭ୍ୟାସ କରୁଥିଲେ। ଦ୍ୱାଦଶ ପରୀକ୍ଷା ଦେବା ପାଇଁ ତାଙ୍କ ବାପା ଫୋନ୍ କରି କହିଥିଲେ। ଏହା ଥିଲା ତାଙ୍କ ଜୀବନର ସବୁଠୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି। ଦୁଇ କୋଚ୍ଙ୍କ ପରାମର୍ଶ ନେଇଥିଲେ। ସେମାନେ କହିଥିଲେ, ଏବେ ନ ହେଲେ କେବେ ନୁହେଁ। ପାଠ ଓ କ୍ରିକେଟ ମଧ୍ୟରେ ଗୋଟିଏ ଚୟନ କରିବାକୁ କହିଥିଲେ। ଏହି ବର୍ଷ ହିଁ ବିଷ୍ଣୋଇ କ୍ରିକେଟ ଜଗତର ନଜରକୁ ଆସିଥିଲେ। ଯୋଧପୁରସ୍ଥିତ ସ୍ପାର୍ଟନ ଏକାଡେମୀର ଅନ୍ୟତମ କୋଚ୍ ପ୍ରଦ୍ୟୋତ୍ ସିଂ କହିଛନ୍ତି, ୨୦୧୮ ମାର୍ଚ୍ଚରେ ତାଙ୍କୁ ରୟାଲ୍ସ ଦଳର ନେଟ୍ସରେ ବୋଲିଂ କରିବାକୁ ସୁଯୋଗ ମିଳିବ କି ନାହିଁ ଜଣା ନ ଥିଲା। ସୁଯୋଗ ମିଳିବା ପରେ ତାଙ୍କ ବାପା ଘରକୁ ଫେରି ଦ୍ୱାଦଶ ପରୀକ୍ଷା ଦେବାକୁ କହିଥିଲେ। ସେ ଫେରିବାକୁ ଚିନ୍ତା କରିଥିଲେ। କିନ୍ତୁ ଭାଗ୍ୟରେ କିଛି ଅଲଗା ହିଁ ଲେଖାଥିଲା। ସେ ସେହି ବର୍ଷ ଦ୍ୱାଦଶ ପରୀକ୍ଷା ଦେଇ ନ ଥିଲେ। ଏବେ ପର୍ଯ୍ୟନ୍ତ ସେ ଦ୍ୱାଦଶ ପରୀକ୍ଷାରେ ଉତ୍ତୀର୍ଣ୍ଣ ହୋଇନାହାନ୍ତି। ସିଂଙ୍କ ସହ ଶାହରୁଖ ପଠାନ ମେଣ୍ଟର ଥିଲେ। ଉଲ୍ଲେଖଯୋଗ୍ୟ, ୧୯ବର୍ଷରୁ କମ୍ ବିଶ୍ୱକପ୍ରେ ସେ ୧୭ ଉଇକେଟ ନେଇଛନ୍ତି।
