ବାହାରେ ଝିପିଝିପି ବର୍ଷା। ଘର ଭିତରେ ବସି ଝରକା ଫାଙ୍କରେ ତାହାକୁ ଉପଭୋଗ କରିବାର ମଜା ନିଆରା। ବର୍ଷା ହେଲା ମାତ୍ରେ ସେ ଝରକା ପାଖରେ ବସି ଏହାକୁ ମନଭରି ଉପଭୋଗ କରନ୍ତି। କେବଳ ଅଭିନୟ ନୁହେଁ, ବକ୍ସିଂ ପ୍ରାକ୍ଟିସ୍ କରିବାକୁ ସେ ପସନ୍ଦ କରନ୍ତି। ଶୁଟିଂରୁ ଫୁର୍ସତ ମିଳିଲେ ସେ ବାଇକ୍ ହେଉ କି କାର୍ ଧରି ଲଙ୍ଗ୍ ଡ୍ରାଇଭ୍ରେ ବାହାରି ଯାଆନ୍ତି। ହଁ, ଏହି ଅଭିନେତ୍ରୀ ଜଣକ ହେଲେ କ୍ରିତି ସାନନ୍। ‘ହେରୋପନ୍ଥୀ’ରୁ ଆରମ୍ଭ ହୋଇଥିଲା ତାଙ୍କର ବଲିଉଡ୍ କ୍ୟାରିୟର। ବର୍ଷ କେଇଟା ଭିତରେ ସେ ବେଶ୍ କେତୋଟି ହିଟ୍ ସିନେମାରେ ଅଭିନୟ କରି ନିଜକୁ ନାୟିକା ଦୌଡ଼ରେ ସାମିଲ କରିଛନ୍ତି। ‘ବର୍ଲି କି ବର୍ଫି’, ‘ଦିଲ୍ଓ୍ବାଲେ’ରେ ତାଙ୍କର ଅଭିନୟକୁ ଯେତେ ପ୍ରଶଂସା କରାଯିବ ତାହା ସେତେ କମ୍ ହେବ। ଦିଲ୍ଲୀରେ ଜନ୍ମିତା କ୍ରିତିଙ୍କର ଶିକ୍ଷାଗତ ଯୋଗ୍ୟତା ହେଲା ବି.ଟେକ୍। ଆକ୍ଟିଂ କରିବା ପୂର୍ବରୁ ସେ ମଡେଲିଂ ସହ ଜଡ଼ିତ ଥିଲେ। ବଲିଉଡ୍ରେ ଏଣ୍ଟ୍ରି କରିବା ପୂର୍ବରୁ ସେ କ୍ୟାମେରା ସାମ୍ନା କରିସାରିଥିଲେ। ଲୋକପ୍ରିୟ ଷ୍ଟାର୍ ମହେଶ ବାବୁଙ୍କ ଅପୋଜିଟ୍ରେ ତେଲୁଗୁ ଥ୍ରୀଲର ‘ନେନୋକ କାଡନି’ରେ ଅଭିନୟ କରି ବେଶ୍ ପ୍ରଶଂସିତ ହୋଇଥିଲେ। ମିଠା ଖାଇବାକୁ କ୍ରିତି ଭାରି ଭଲ ପାଆନ୍ତି। ଆଉ ଏକ ମଜାଦାର କଥା। ସଲ୍ମାନଙ୍କର ସେ ହେଉଛନ୍ତି ଜଣେ ବଡ଼ ପ୍ରଶଂସକ। ସଲମାନଙ୍କ ଅଭିନୀତ ପ୍ରତିଟି ଫିଲ୍ମକୁ ସେ ଦେଖିସାରିଛନ୍ତି। କ୍ରିତି ହେଉଛନ୍ତି ଜଣେ କଥକ ନୃତ୍ୟଶିଳ୍ପୀ। ତା’ସହ ସ୍ବାଦିଷ୍ଟ ଖାଦ୍ୟ ରୋଷେଇ କରିବା ତାଙ୍କର ଏକ ଅଭ୍ୟାସ। ଗପ, କବିତା ପଢ଼ିବାକୁ ସେ ଭଲ ପାଆନ୍ତି। ତାଙ୍କର ଫେଭରାଇଟ ଟୁରିଷ୍ଟ ପ୍ଲେସ୍ ହେଲା ଗୋଆ। କାଜୋଲ ଏବଂ ରେଖାଙ୍କୁ ସେ ନିଜର ରୋଲ୍ ମଡେଲ ଭାବେ ଗ୍ରହଣ କରିଛନ୍ତି। ସୌଭାଗ୍ୟବଶତଃ ‘ଦିଲ୍ଓ୍ବାଲେ’ରେ ସେ କାଜୋଲଙ୍କ ସହ ଅଭିନୟ କରିଥିଲେ, ଯାହାର ସ୍ମୃତିକୁ ସେ ଶେୟାର କରିବାକୁ ଭୁଲି ନ ଥାନ୍ତି।
