ନୂଆଦିଲ୍ଲୀ,୧୬ା୫ (ପି.ଟି.)-ଜାତୀୟ କ୍ରୀଡ଼ା ପୁରସ୍କାର ଚୟନ ପଦ୍ଧତିିରେ ପରିବର୍ତ୍ତନ ଆଣିବା ଲାଗି କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁଙ୍କୁ ଅନୁରୋଧ କରିଛନ୍ତି ଏସିଆନ ଗେମ୍ସ ସ୍ବର୍ଣ୍ଣ ପଦକ ବିଜୟୀ ବକ୍ସର ଅମିତ୍ ପଙ୍ଘାଲ। ଅଜାଣତରେ ଡୋପ୍ ଅପରାଧରେ ଫସିଯାଇଥିବାରୁ ବାରମ୍ବାର ଅର୍ଜୁନ ପୁରସ୍କାର ପାଇବାରୁ ବଞ୍ଚତ୍ତ ହୋଇ ଆସୁଛନ୍ତି। ଜାତୀୟ କ୍ରୀଡ଼ା ପୁରସ୍କାର ପାଇଁ ବର୍ତ୍ତମାନ ଯେଉଁ ଚୟନ ପ୍ରକ୍ରିୟା ଚାଲିଛି, ସେଥିରେ ବାଛବିଚାର ହେଉଛି ବୋଲି ପଙ୍ଘାଲ ଅଭିଯୋଗ କରିଛନ୍ତି। ଗତବର୍ଷ ବିଶ୍ୱ ଚାମ୍ପିୟନଶିପ୍ରେ ପ୍ରଥମ ଭାରତୀୟ ଭାବେ ରୌପ୍ୟ ପଦକ ଲାଭ କରିଥିବା ଏହି ବକ୍ସର ମନ୍ତ୍ରୀଙ୍କ ନିକଟକୁ ପଠାଇଥିବା ଚିଠିରେ ଉଲ୍ଲେଖ କରିଛନ୍ତି ଯେ, ଏକ ପୁରସ୍କାର ପାଇବା ଲାଗି ଜଣେ ଆଥଲେଟ୍ ନିଜକୁ ଯୋଗ୍ୟ ବୋଲି ଉପସ୍ଥାପନ କରିବା ଉଚିତ ନୁହେଁ। ପ୍ରଚଳିତ ବ୍ୟବସ୍ଥା ଅନୁସାରେ ପୁରସ୍କାର ପାଇଁ ଜଣେ ଆଥଲେଟଙ୍କୁ ଦରଖାସ୍ତ କରିବାକୁ ହେଉଛି। ସିଲେକ୍ସନ କମିଟି ସେମାନଙ୍କ ଆବେଦନପତ୍ରକୁ ଭିତ୍ତି କରି ବିଜେତାଙ୍କ ନାମ ଘୋଷଣା କରୁଛନ୍ତି। ସ୍ପୋଟର୍ସ ସିଲେକ୍ସନ କମିଟିର ସଦସ୍ୟମାନେ ଉତ୍ତରଦାୟୀ ରହୁ ନ ଥିବାରୁ ଚୟନବେଳେ ବାଛବିଚାର ହେଉଥିବା ପଙ୍ଘାଲ ଅଭିଯୋଗ କରିଛନ୍ତି। ଏସିଆନ ଗେମ୍ସ ସ୍ବର୍ଣ୍ଣ ପଦକ ବିଜେତା ପଙ୍ଘାଲ ପୂର୍ବରୁ ଦୁଇଥର ଅର୍ଜୁନ ପୁରସ୍କାର ପାଇଁ ପ୍ରାର୍ଥୀ ହୋଇଛନ୍ତି। ମାତ୍ର ଅତୀତର ଡୋପ୍ ନିୟମ ଉଲ୍ଲଂଘନ ରେକର୍ଡ ଯୋଗୁ ତାଙ୍କ ନାମ ବିଚାରକୁ ନିଆଯାଇ ନାହିଁ। ପଙ୍ଘାଲ କହିଛନ୍ତି, ସେ ୨୦୧୨ରେ ହାଡ଼ଫୁଟିରେ ପୀଡ଼ିତ ଥିଲେ। ସେତେବେଳେ ସେ ଯେଉଁ ଔଷଧ ସେବନ କରିଥିଲେ ସେଥିରେ ନିଷିଦ୍ଧ ଦ୍ରବ୍ୟ (ଏକ ଆନାବୋଲିକ୍ ଷ୍ଟେରଏଡ୍) ରହିଥିଲା। ଫଳରେ ଡୋପ୍ ଟେଷ୍ଟରେ ଧରାପଡ଼ିଥିଲେ। ସେତେବେଳେ ତାଙ୍କର ଆଣ୍ଟି ଡୋପିଂ ନିୟମ ଉପରେ ସେତେଟା ଜ୍ଞାନ ନ ଥିଲା। ଚଳିତ ବର୍ଷର ଜାତୀୟ କ୍ରୀଡ଼ା ପୁରସ୍କାର ପାଇଁ ଆବେଦନ ପ୍ରକ୍ରିୟା ଆରମ୍ଭ ହୋଇଛି। ଦରଖାସ୍ତ କରିବାର ଶେଷ ତାରିଖ ଜୁନ୍ ୩ ରହିଛି।