ନୂଆଦିଲ୍ଲୀ, ୧୭ା୪ (ପି.ଟି.)- କ୍ରୀଡ଼ା ମନ୍ତ୍ରଣାଳୟ ଓ ୧୧ରୁ ଅଧିକ ଜାତୀୟ କ୍ରୀଡ଼ା ମହାସଂଘ (ଏନ୍ଏସ୍ଏଫ୍) ମଧ୍ୟରେ ଏକ ବୈଠକ ଗୁରୁବାର ଅନୁଷ୍ଠିତ ହୋଇଯାଇଛି। କରୋନା ଭାଇରସ୍ ସଂକ୍ରମଣର ମୁକାବିଲା ପାଇଁ ବର୍ତ୍ତମାନ ସମଗ୍ର ଦେଶରେ ଲକ୍ଡାଉନ୍ ଲାଗୁ କରାଯାଇଛି। ବୈଠକରେ ଟୋକିଓ ଅଲିମ୍ପିକ୍ସକୁ ଦୃଷ୍ଟିରେ ରଖି ଭବିଷ୍ୟତ ଯୋଜନା ବ୍ୟତୀତ ଅନ୍ୟାନ୍ୟ କାର୍ଯ୍ୟକ୍ରମ ଉପରେ ଆଲୋଚନା ହୋଇଥିଲା। ଏହା ଏକ ନିୟମିତ ବୈଠକ ଥିଲା। ମନ୍ତ୍ରଣାଳୟ ଇତିମଧ୍ୟରେ ଭିଡିଓ କନଫରେନ୍ସ ଜରିଆରେ ହକି ଇଣ୍ଡିଆ, ନ୍ୟାଶନାଲ ରାଇଫଲ ଆସୋସିଏଶନ ଅଫ୍ ଇଣ୍ଡିଆ, ରେସ୍ଲିଂ ଫେଡେରେଶନ ଅଫ୍ ଇଣ୍ଡିଆ ସମେତ ଅନ୍ୟ କେତେକ କ୍ରୀଡ଼ା ମହାସଂଘ ସହିତ ଆଲୋଚନା କରିସାରି ଥିବା ମନ୍ତ୍ରଣାଳୟର ଜଣେ ଅଫିସିଆଲ କହିଛନ୍ତି। ଅନ୍ୟ କ୍ରୀଡ଼ା ମହାସଂଘଗୁଡ଼ିକ ସହ ଆଲୋଚନା ଜାରି ରହିବ ବୋଲି ସେ କହିଛନ୍ତି। ଗୁରୁବାର ବୈଠକରେ ହ୍ୟାଣ୍ଡବ୍ଲ, ଟେନିସ୍, ସ୍କ୍ବାଶ, ବାସ୍କେଟବଲ, ସ୍ପେଶିିଆଲ ଅଲିମ୍ପିକ୍ସ ଭାରତ ଭଲିବଲ୍, ଉଷୁ, ୟାଚିଂ, କାୟାକିଂ ଓ କାନୋଇଂ, କବାଡ଼ି ଏବଂ ଅଲ୍ ଇଣ୍ଡିଆ ୟୁନିଭର୍ସିଟି (ଏଆଇୟୁ)ର ଦୁଇ ଜଣ ଲେଖାଏଁ ଅଫିସିଆଲଙ୍କ ସହ କ୍ରୀଡ଼ା ସଚିବ ରାଧେଶ୍ୟାମ ଜୁଲାନିୟା ଆଲୋଚନା କରିଥିଲେ। ଜୁଲାନିୟାଙ୍କ ସହିତ ଆଲୋଚନାରେ ଭାଗ ନେଇଥିବା ଜଣେ ଏନ୍ଏସ୍ଏଫ୍ର ପ୍ରତିନିଧି କହିଛନ୍ତି ମନ୍ତ୍ରଣାଳୟ ଏସିଆନ ଗେମ୍ସ ବ୍ୟତୀତ ୨୦୨୪ ଓ ୨୦୮୨ ଅଲିମ୍ପିକ୍ସ ସମେତ ଅନ୍ୟାନ୍ୟ ଇଭେଣ୍ଟଗୁଡ଼ିକ ଲାଗି ଆମର ଭବିଷ୍ୟତ ଯୋଜନା ସମ୍ପର୍କରେ ଜାଣିବାକୁ ଚାହିଁଥିଲା। ଟୋକିଓ ଅଲିମ୍ପିକ୍ସ ଆହୁରି ମଧ୍ୟ ୨୦୨୧କୁ ଘୁଞ୍ଚତ୍ୟାଇଛି। ସମସ୍ତ ଜାତୀୟ ମହାସଂଘ ଏନେଇ ମନ୍ତ୍ରଣାଳୟଠାରୁ କ’ଣ ଆଶା କରୁଛନ୍ତି ତାହା ଦର୍ଶାଇଥିଲେ। ଅନ୍ୟପକ୍ଷରେ ମନ୍ତ୍ରଣାଳୟ କୋଚ୍ମାନଙ୍କ ଟ୍ରେନିଂ ପ୍ରୋଗ୍ରାମ ବିକଶିତ କରିବା ସହ ଁ ସେଣ୍ଟର ଅଫ୍ ଏକ୍ସଲେନ୍ସି ସେଣ୍ଟରମାନ ସ୍ଥାପନ ଉପରେ ଗୁରୁତ୍ୱାରୋପ କରିଥିବା ଅଫିସିଆଲ ଜଣକ କହିଛନ୍ତି।