ମୁମ୍ବାଇ,୧୧।୯: ହାର୍ଦ୍ଦିକ ପାଣ୍ଡ୍ୟା ଓ କ୍ରୁନାଲ ପାଣ୍ଡ୍ୟାଙ୍କୁ ଦକ୍ଷିଣ ଆଫ୍ରିକା ବିପକ୍ଷ ଟି୨୦ ସିରିଜ୍ରେ ବ୍ଲୁ ଜର୍ସିରେ ଦେଖିବାକୁ ମିଳିବ। ବୁଧବାର ପାଣ୍ଡ୍ୟା ବ୍ରଦର୍ସ ଅଭ୍ୟାସ କରୁଥିବାବେଳେ ଏକ ଦୁର୍ଘଟଣାରୁ ବର୍ତ୍ତି ଯାଇଛନ୍ତି। ନେଟ୍ସରେ କ୍ରୁନାଲଙ୍କ ବୋଲିଂରେ ହାର୍ଦ୍ଦିକ ହେଲିକାପ୍ଟର ଶଟ୍ ମାରିବାକୁ ଉଦ୍ୟମ କରିଥିଲେ। ହେଲେ ବଲଟି ସିଧା କ୍ରୁନାଲଙ୍କ ମୁଣ୍ଡ ଆଡ଼କୁ ଚାଲିଯାଇଥିଲା। ସୌଭାଗ୍ୟ ବଶତଃ କ୍ରୁନାଲ ଅଳ୍ପକେ ବର୍ତ୍ତି ଯାଇଥିଲେ। ଏହାର ଏକ ଭିଡିଓ ଟୁଇଟରରେ ଅପଲୋଡ କରିବା ସହ ହାର୍ଦ୍ଦିକ ବଡ଼ ଭାଇଙ୍କୁ କ୍ଷମାପ୍ରର୍ଥାନା କରିଛନ୍ତି। ଏଥିସହ ଲେଖିଛନ୍ତି, ମୁଁ ଉକ୍ତ ରାଉଣ୍ଡକୁ ଜିତିଛି। ଏହାର ଜବାବ ଦେଇଛନ୍ତି ବାମହାତୀ ସ୍ପିନର କ୍ରୁନାଲ। ସେ ଏକ ଭିଡିଓ ଶେୟାର କରିଛନ୍ତି, ଯେଉଁଥିରେ କ୍ରୁନାଲଙ୍କ ବଲକୁ ଖେଳିବାରେ ୨୫ ବର୍ଷୀୟ ହାର୍ଦ୍ଦିକ ବିଫଳ ହେଉଛନ୍ତି। ଖେଳରେ ସବୁ ଚଳେ। କିନ୍ତୁ ତୁମେ ଏ ଭିଡିଓକୁ ଭୁଲି ଗଲ ବୋଲି ଏହାର କ୍ୟାପଶନରେ କ୍ରୁନାଲ ଲେଖିଛନ୍ତି। ବିଶ୍ୱକପ୍ ପରେ ହାର୍ଦ୍ଦିକ ପ୍ରଥମ ଥର ପାଇଁ ଅନ୍ତର୍ଜାତୀୟ କ୍ରିକେଟ ଖେଳିବାକୁ ଯାଉଛନ୍ତି। ବିସ୍ଫୋରକ ବ୍ୟାଟ୍ସମ୍ୟାନଙ୍କୁ ଓ୍ବେଷ୍ଟଇଣ୍ଡିଜ ସିରିଜ୍ରୁ ବିଶ୍ରାମ ଦିଆଯାଇଥିଲା। ଆସନ୍ତା ୧୫ ତାରିଖରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଧର୍ମଶାଳାଠାରେ ପ୍ରଥମ ଟି୨୦ ଖେଳିବ। ପରବର୍ତ୍ତୀ ଦୁଇଟି ମୋହାଲି ଓ ବେଙ୍ଗାଲୁରୁଠାରେ ଖେଳାଯିବ।