କାଳିଆପାଣି,୨୨ା୧୧(ଡି.ଏନ୍.ଏ.): ସୁକିନ୍ଦା କ୍ରୋମାଇଟ ଖଣି ପରିବହନରେ ଶ୍ରମିକମାନେ ଟ୍ରକ୍ ଲୋଡିଂ କ୍ଷେତ୍ରରେ ବେଆଇନ ଚାନ୍ଦା (ମାମୁଲି) ଆଦାୟ କରୁଥିବା ଅଭିଯୋଗ ହୋଇଛି। ଏ ନେଇ ଗୁରୁବାର ଟ୍ରକ୍ମାଲିକ ସଂଘ ପକ୍ଷରୁ ଖଣି କର୍ତ୍ତୃପକ୍ଷ ରାଜେଶ ପଟେଲ୍ ଏବଂ କାଳିଆପାଣି ଥାନାଧିକାରୀ ରାମାକାନ୍ତ ମୁଦୁଲିଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ଏ ସମ୍ପର୍କରେ ଶୁକ୍ରବାର ଜିଲାପାଳ ଓ ଏସ୍ପିଙ୍କୁ ଦାବିପତ୍ର ପ୍ରଦାନ କରାଯିବା ନେଇ ସଂଘ ସୂଚନା ଦେଇଛି। ଆଗାମୀ ୧୫ ଦିନ ମଧ୍ୟରେ କୌଣସି କାର୍ଯ୍ୟାନୁଷ୍ଠାନ ନ ହେଲେ ଆଇନର ଆଶ୍ରୟ ନେବେ ବୋଲି ମଧ୍ୟ ସଂଘ ପ୍ରକାଶ କରିଛି।
କ୍ରୋମାଇଟ ଖଣି ଅଞ୍ଚଳରେ କ୍ରୋମାଇଟ ଲୋଡିଂ (ବୋଝେଇ) କରୁଥିବା ଶ୍ରମିକଙ୍କୁ ଖଣି କର୍ତ୍ତୃପକ୍ଷ ଲୋଡିଂ ବାବଦ ପ୍ରାପ୍ୟ ନିୟୋଜିତ ଠିକାଦାରଙ୍କୁ ପ୍ରଦାନ କରିଥାନ୍ତି। କିନ୍ତୁ ଖଣିରେ ଲୋଡ଼ିଂ କରୁଥିବା ଶ୍ରମିକମାନେ ବେଆଇନଭାବେ ୬ ଚକ ଟ୍ରକ୍ରୁ ୫ ଶହ ଟଙ୍କା, ୧୦ ଚକରୁ ୧୨୦୦, ୧୨ ଚକରୁ ୧୫୦୦ ଏବଂ ୧୪ ଚକ ଟ୍ରକ୍ରୁ ୧୬୦୦ ଟଙ୍କା ଆଦାୟ କରୁଛନ୍ତି। ଟ୍ରକ୍ ଡ୍ରାଇଭର ଚାନ୍ଦା ନ ଦେଲେ ଲୋଡିଂ ଶ୍ରମିକଙ୍କ ଖାତାଦାର(ଗ୍ୟାଙ୍ଗଲିଡର) ଗାଡି ଲୋଡିଂ ନ କରି ବିଳମ୍ବ କରିବା ସହ ବେଳେ ବେଳେ ଧମକ ଦେବା ଓ ଟ୍ରକ ସିରିୟଲ ନାମରେ ୩୦ ଟଙ୍କା ଲେଖାଏଁ ନେଉଥିବା ଟ୍ରକ୍ ମାଲିକ ସଂଘ, କୁହିକା, ସୁକିନ୍ଦା, ଡୁବୁରୀ, ଦାନଗଦୀ, ଯାଜପୁର ରୋଡ, ଚଣ୍ଡିଖୋଲ, ଟମକା ପ୍ରଭୃତି ସଂଘର କର୍ମକର୍ତ୍ତା ଅଭିଯୋଗ କରିଛନ୍ତି। ଯାଜପୁର ଟ୍ରକ୍ ମାଲିକ ସଂଘର ହୃଦାନନ୍ଦ ସାମଲ, ଅଶୋକ ନାୟକ, ଅଶୋକ ଦାସ, ରାଜକିଶୋର ପ୍ରଧାନ, ବିଜୟ କୁମାର ମହାନ୍ତି, ସୂର୍ଯ୍ୟମଣି ବେହେରା, ପ୍ରଶାନ୍ତ ବେହେରା, ସୁରେନ୍ଦ୍ର ସାହାଣୀ, ଅରୁଣ ପରିଡ଼ା, ରଞ୍ଜନ ନାୟକ, ନାରାୟଣ ବେହେରା, ଅଭିମୁନ୍ୟୁ ଦାସ, ସଞ୍ଜୟ ଶତପଥୀ, ସୁଦର୍ଶନ ପାତ୍ର, ଚିତ୍ତରଞ୍ଜନ ରାଜ, ପ୍ରଶାନ୍ତ ସାହୁ ପ୍ରମୁଖ ଦାବିପତ୍ର ପ୍ରଦାନରେ ଉପସ୍ଥିତ ଥିଲେ।