ନୂଆଦିଲ୍ଲୀ,୧୮।୫: ଲୋକ ସଭା ନିର୍ବାଚନ ଶେଷ ପର୍ଯ୍ୟାୟ ମତଦାନ ମେ ୧୯ରେ ହେବ। ଏହା ପୂର୍ବରୁ ଆଚରଣ ବିଧି ଉଲ୍ଲଂଘନ ନେଇ କ୍ଲିନ୍ ଚିଟ୍ ପ୍ରସଙ୍ଗକୁ କେନ୍ଦ୍ରକରି ନିର୍ବାଚନ କମିଶନରେ ମତଭେଦ ଦେଖାଦେଇଛି। ମୁଖ୍ୟ ନିର୍ବାଚନ କମିଶନ ସୁନୀଲ ଅରୋରା ଏବଂ ନିର୍ବାଚନ କମିଶନ ଅଶୋକ ଲବାସା ମୁହାଁମୁହିଁ ହୋଇଛନ୍ତି। ଆଚରଣ ବିଧି ଉଲ୍ଲଂଘନ ଅଭିଯୋଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହଙ୍କୁ ଲଗାତାର କ୍ଲିନ୍ ଚିଟ୍ ଦିଆଯାଉଥିବାବେଳେ ବିରୋଧୀ ଦଳ ସଦସ୍ୟଙ୍କୁ କାହିଁକି କାରଣ ଦର୍ଶାଅ ନୋଟିସ୍ ଜାରି କରାଯାଉଛି ସେ ନେଇ ଲବାସା ଯୁକ୍ତି ବାଢ଼ିଛନ୍ତି। ଲବାସା ଦେଶର ପରବର୍ତ୍ତୀ ନିର୍ବାଚନ କମିଶନ ଦୌଡ଼ରେ ରହିଛନ୍ତି। ଏପରି ସ୍ଥଳେ ସୁନୀଲ ଏବଂ ଲବାସା ମୁହାଁମୁହିଁ ହେବା ସାଧାରଣ କଥା ନୁହେଁ ବୋଲି କୁହାଯାଉଛି। ଏନେଇ କଂଗ୍ରେସ ସଦସ୍ୟ ରଣଦୀପ୍ ସୁରଜୱାଲା ମୁଖ୍ୟ ନିର୍ବାଚନ କମିଶନ ଭାଜପାର ସପକ୍ଷ ନେଉଥିବା ଅଭିଯୋଗ କରିଛନ୍ତି।