ଜୋହାନ୍ସବର୍ଗ,୨୩।୮(ପିଟି): ପୂର୍ବତନ ଦକ୍ଷିଣ ଆଫ୍ରିକୀୟ ଅଲରାଉଣ୍ଡର ଲାନ୍ସ କ୍ଲୁଜନର ଶୁକ୍ରବାର ଜାତୀୟ ଦଳର ବ୍ୟାଟିଂ କୋଚ୍ ନିଯୁକ୍ତ ହୋଇଛନ୍ତି। ତେବେ ତାଙ୍କୁ କେବଳ ଭାରତ ବିପକ୍ଷରେ ଖେଳାଯିବାକୁ ଥିବା ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ ଲାଗି ଦାୟିତ୍ୱ ଦିଆଯାଇଛି। କ୍ରିକେଟ ଦକ୍ଷିଣ ଆଫ୍ରିକା (ସିଏସ୍ଏ) ପୂର୍ବତନ ପେସର ଭିନସେଣ୍ଟ ବର୍ନସଙ୍କୁ ବୋଲିଂ କୋଚ୍ ପଦରେ ନିଯୁକ୍ତ କରିଛି। ଫିଲ୍ଡିଂ କୋଚ୍ ଜଷ୍ଟିନ ଅନଟଙ୍ଗ ତାଙ୍କ ସ୍ଥାନ ବଜାୟ ରଖିଛନ୍ତି। ନୂଆ ନିୟମ ଅନୁଯାୟୀ ଟିମ୍ ଡିରେକ୍ଟର ତାଙ୍କର ୩ ସହାୟକ କୋଚ୍ ନିଯୁକ୍ତ କରିଛନ୍ତି ବୋଲି ସିଏସ୍ଏ କାର୍ଯ୍ୟକାରୀ ନର୍ଦ୍ଦେଶକ କୋରି ଭାନ ଜିଲ କହିଛନ୍ତି। କ୍ଲୁଜନର କେବଳ ଭାରତ ବିପକ୍ଷ ଟି୨୦ ସିରିଜ୍ରେ ବ୍ୟାଟିଂ କୋଚ୍ ସମ୍ଭାଳିବେ। ସେ ସମସ୍ତ ଫର୍ମାଟ ପାଇଁ ବର୍ତ୍ତମାନ ଉପଲବ୍ଧ ନାହାନ୍ତି। ହ୍ବାଇଟ୍ ବଲ କ୍ରିକେଟରେ ତାଙ୍କ ରେକର୍ଡ ବହୁତ ଭଲ ରହିଛି, ଯାହା ଜାତୀୟ ଦଳର ଖେଳାଳିଙ୍କୁ ସହାୟକ ହେବ ବୋଲି ଭାନ ଜିଲ କହିଛନ୍ତି। କ୍ଲୁଜନର ଟେଷ୍ଟରେ ୧୯୦୬ ରନ୍ କରିବା ସହ ୮୦ ଉଇକେଟ ନେଇଥିଲେ। ସେହିଭଳି ଦିନିକିଆ ଫର୍ମାଟରେ ୩୫୭୬ ରନ୍ ଓ ୧୯୨ ଉଇକେଟ ଅକ୍ତିଆର କରିଥିଲେ। ଦକ୍ଷିଣ ଆଫ୍ରିକା ଦଳ ସେପ୍ଟେମ୍ବର ୧୫ ତାରିଖରେ ଟି୨୦ ସିରିଜ୍ ଲାଗି ଭାରତ ଗସ୍ତ କରିବ। ଏହାପରେ ଦୁଇ ଦଳ ମଧ୍ୟରେ ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଖେଳାଯିବ।