କେନ୍ଦୁଝର,୧୩।୯(ସ୍ବ.ପ୍ର.) : ରାଜ୍ୟରେ ବିଭିନ୍ନ ଚିଟ୍ଫଣ୍ଡ କମ୍ପାନୀ ଲୋକଙ୍କୁ ଠକିବା ପରେ ଏମାନଙ୍କ ପ୍ରତି କଡ଼ା ଆଭିମୁଖ୍ୟ ଗ୍ରହଣ କରିଥିଲେ ରାଜ୍ୟ ସରକାର। ହେଲେ ଏମାନେ ଆହୁରି ଚାଲାକ ହୋଇ ସିଧାସଳଖ ପଇସା ନ ନେଇ ବିଭିନ୍ନ ଯୋଜନା ଆଳରେ ପଇସା ହାତଉଛନ୍ତି। ଏହିପରି କ୍ଷତିଗ୍ରସ୍ତ ଆଦିବାସୀ ମହିଳାଙ୍କୁ ନ୍ୟାୟ ପାଇଁ ଅଣ୍ଟା ଭିଡ଼ିଛନ୍ତି ପଦ୍ମଶ୍ରୀ ଦୈତାରୀ ନାଏକ। ମିଳିତ ଅଭିଯୋଗ ଶୁଣାଣିରେ ଜିଲାପାଳଙ୍କୁ ଭେଟି ମହିଳାଙ୍କ ଦୁଃଖ ଜଣାଇଛନ୍ତି। ଏବେ ସବୁଠାରୁ ବଡ଼ ପ୍ରଶ୍ନ ଏହି ସବୁ କମ୍ପାନୀ ଉପରେ ସରକାରଙ୍କର ଆଭିମୁଖ୍ୟରେ ଶୀତଳତା ଆସିଗଲା ନା ଏ ବିଷୟରେ ସରକାର ଅବଗତ ନାହାନ୍ତି ।
କେନ୍ଦୁଝର ଜିଲା ବାଂଶପାଳ ବ୍ଲକ ଗୋନାସିକା ପଞ୍ଚାୟତ ଶିକୁଳାପଦାର ଶତାଧିକ ମହିଳାଙ୍କଠାରୁ ଏକ କମ୍ପାନୀ ଛେଳିଚାଷର ପ୍ରଲୋଭନ ଦେଖାଇ ଲକ୍ଷାଧିକ ଟଙ୍କା ଠକି ନଇଥିବା ଜିଲାପାଳଙ୍କ ଅଭିଯୋଗ ଶୁଣାଣିରେ ଦୈତାରୀ ନାଏକ ମହିଳାମାନଙ୍କ ସହ ଆସିଥିଲେ। ଆଦିବାସୀ ମହିଳାମାନେ ଋଣ କରି ସର୍ବସ୍ବାନ୍ତ ହୋଇଥିବାବେଳେ ସେମାନଙ୍କୁ ନ୍ୟାୟ ପ୍ରଦାନ କରାଇବାରେ ସହାୟତା ପାଇଁ ଜିଲାପାଳଙ୍କ ମିଳିତ ଅଭିଯୋଗ ଶୁଣାଣିରେ ଜିଲାପାଳଙ୍କୁ ଅନୁରୋଧ କରିଛନ୍ତି ପଦ୍ମଶ୍ରୀ ଦୈତାରୀ। ଉକ୍ତ ସଂସ୍ଥା ଆଦିବାସୀ ଅଧ୍ୟୁଷିତ ବାଂଶପାଳ, ହରିଚନ୍ଦନପୁର, ସାହାରାପଡ଼ା, ଝୁମ୍ପୁରା ଆଦି ବ୍ଲକର ନିରୀହ ଆଦିବାସୀ ମହିଳାଙ୍କୁ ଟାର୍ଗେଟ କରି ଛେଳିଚାଷ ପାଇଁ ଛେଳି ଓ ଗୁହାଳ ଯୋଗାଇବା, ଖଲି ଚଉପଦୀ ସିଲାଇ ମେଶିନ ଯୋଗାଇବା ତଥା ଅର୍ଥ ଲଗାଇଥିବା ଲୋକଙ୍କୁ ମାସିକିଆ ଭତ୍ତାର ବ୍ୟବସ୍ଥାର ପ୍ରଲୋଭନ ଦେଖାଇ ବହୁ କୋଟି ଟଙ୍କା ହରିଲୁଟ୍ କରିଥିଲା। ମହିଳାମାନଙ୍କ ଦ୍ୱାରା ବିଭିନ୍ନ ଅର୍ଥ ଲଗାଣକାରୀ ସଂସ୍ଥା ନିକଟରୁ ଋଣ କରାଇ ଟଙ୍କା ନେଇଯିବା ପରେ ଉକ୍ତ କମ୍ପାନୀ ଧରାଛୁଆଁ ଦେଉ ନ ଥିବା ଜିଲାପାଳଙ୍କ ମିଳିତ ଅଭିଯୋଗ ଶୁଣାଣିରେ ଅଭିଯୋଗ ହେବା ପରେ ଏ ନେଇ ପ୍ରଶାସନିକ ତତ୍ପରତା ପ୍ରକାଶ ପାଇଛି। ଉକ୍ତ ସଂସ୍ଥା ଏହି ନାମରେ ବହୁ ପୂର୍ବରୁ ସଦରଥାନାରେ ଅଭିଯୋଗ ହୋଇଆସୁଛି । ତା’ ପରେ ବି ଏହି ସଂସ୍ଥା ଜିଲାର ବିଭିନ୍ନ ଜାଗାରେ ଲୋକଙ୍କୁ ଠକୁଥିବା ଅଭିଯୋଗ ହେଉଛି। ହେଲେ ପୋଲିସ ସଂସ୍ଥାର ଦୁଇ ଜଣଙ୍କୁ ଗିରଫ କରି ଚୁପ୍ହୋଇ ବସିପଡ଼ିଛି । ଏସ୍ପି ଏ ବିଷୟ ଜାଣିବା ପରେ ଏହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ ସହ କିପରି ଗରିବ ଲୋକମାନେ ପଇସା ଫେରିପାଇବେ ତା’ର ବ୍ୟବସ୍ଥା କରାଯିବ ବୋଲି ପ୍ରଶାସନ କହିଛନ୍ତି।